«وزگەرگەن» ەسكى ۇكىمەت «ەستۋشى مەملەكەت» قۇرا الا ما؟

توقاەۆ قازاقستان ۇكىمەتىنىڭ قۇرامىن ءبىردى-ەكىلى تاعايىنداۋ ارقىلى «جاڭارتتى».

اقوردا جارلىعىنا سايكەس مينيسترلەر كابينەتىنىڭ تۇگەل دەرلىگى ءوز ورنىندا قالدى. اسىلىندە، زاڭ بويىنشا، ءماجىلىس سايلاۋىنان كەيىن ۇكىمەت تاراتىلىپ، قايتا قۇرىلۋى ءتيىس. وتكەن اپتادا توقاەۆ ەكس-پرەزيدەنت نازارباەۆتىڭ ۇسىنىسىن قولداپ، پرەمەر-مينيستر لاۋازىمىنا اسقار ءماميندى قالدىرۋ وڭ شەشىم ەكەنىن ايتىپ، ءماجىلىستى داۋىس بەرۋگە شاقىرعان. وسىلايشا، مامين بۇرىنعى قىزمەتىن قايتا جالعاستىرۋعا مۇمكىندىك الدى.

سونىمەن قوسا، «قازاقستان رەسپۋبليكاسى ۇكىمەتىنىڭ قۇرامى تۋرالى» 2021 جىلعى 18 قاڭتارداعى №494 جارلىق بويىنشا، ءماميننىڭ ءبىرىنشى ورىنباسارى ءاليحان سمايىلوۆ جانە ۆيتسە-پرەمەرلەر رومان سكليار مەن ەرالى توعجانوۆ، ۇكىمەت باسشىسىنىڭ كەڭسەسىن جەتەكشىلىگىندە عالىمجان قويشىباەۆ تا بۇرىنعىشا ورنىندا قالدى.

مۇحتار تىلەۋبەردى بۇدان بىلاي سىرتقى ىستەر ءمينيسترى لاۋازىمىمەن قوسا ۆيتسە-پرەمەر قىزمەتىن اتقارادى.

ءبىرجان نۇرىمبەتوۆتىڭ ورنىنا سەرىك شاپكەنوۆ ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالسا، ال وسىعان دەيىنگى ۇلتتىق ەكونوميكا ءمينيسترى رۋسلان دالەنوۆتى اسەت ەرعاليەۆ الماستىردى.

ۇكىمەت قۇرامى:

• ءاليحان سمايىلوۆ – پرەمەردىڭ ءبىرىنشى ورىنباسارى;
• رومان سكليار – پرەمەردىڭ ورىنباسارى;
• ەرالى توعجانوۆ – پرەمەردىڭ ورىنباسارى;
• مۇحتار تىلەۋبەردى – پرەمەردىڭ ورىنباسارى – سىرتقى ىستەر ءمينيسترى;
• عالىمجان قويشىباەۆ – پرەمەر كەڭسەسىنىڭ باسشىسى;
• ايدا بالاەۆا – اقپارات جانە قوعامدىق دامۋ ءمينيسترى;
• ەرۇلان جاماۋباەۆ – قارجى ءمينيسترى;
• اسەت ەرعاليەۆ – ۇلتتىق ەكونوميكا ءمينيسترى;
• نۇرلان ەرمەكباەۆ – قورعانىس ءمينيسترى;
• ەرلان تۇرعىمباەۆ – ىشكى ىستەر ءمينيسترى;
• ماعزۇم مىرزاعاليەۆ – ەكولوگيا، گەولوگيا جانە تابيعي رەسۋرستار ءمينيسترى;
• سەرىك شاپكەنوۆ – ەڭبەك جانە حالىقتى الەۋمەتتىك قورعاۋ ءمينيسترى;
• ساپارحان وماروۆ – اۋىل شارۋاشىلىعى ءمينيسترى;
• مارات بەكەتاەۆ – ادىلەت ءمينيسترى;
• اسحات ايماعامبەتوۆ – ءبىلىم جانە عىلىم ءمينيسترى;
• الەكسەي تسوي – دەنساۋلىق ساقتاۋ ءمينيسترى;
• بەيبىت اتامقۇلوۆ – يندۋستريا جانە ينفراقۇرىلىمدىق دامۋ ءمينيسترى;
• اقتوتى رايىمقۇلوۆا – مادەنيەت جانە سپورت ءمينيسترى;
• باقىت سۇلتانوۆ – ساۋدا جانە ينتەگراتسيا ءمينيسترى;
• يۋري يلين – توتەنشە جاعدايلار ءمينيسترى;
• باعدات مۋسين – تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى;
• نۇرلان نوعاەۆ – ەنەرگەتيكا ءمينيسترى.

تاۋەلسىز ساراپشىلار مەن بەلسەندىلەر مامين باسقاراتىن ۇكىمەت پاندەميانى ەڭسەرۋگە ارنالعان بىرنەشە ايى، كوكتەمگى كارانتين مۇمكىندىگى بولا تۇرا دەرتكە دايىندىعى جەتىسپەي، «ماۋسىم-شىلدە قىرعىنىنا» جول بەرىپ العان دەپ سىنايدى. جازدىگۇنى ورشىگەن ىندەت ەلدەگى كوپتەگەن سالالارداعى «بىلىقتىڭ بەتىن اشقانى» تۋرالى نارازىلىق كوڭىل-كۇي ارتتى.

كۇنكورىس تابىسىنىنان ايىرىلعان مىڭداعان قازاقستاندىق جۇمىسسىزدىققا تاپ بولدى. بيۋروكراتيا مەن ساندىق جۇيەنىڭ ناشارلىعىنان مەملەكەتتىك جاردەماقىنىڭ بەرىلۋى ۇلكەن داۋعا اينالدى. ءبىلىم بەرۋ جانە مەديتسينا سالالارى بۇرىن-سوڭدى كەزىكپەگەن قيىن جاعدايعا ۇشىرادى. «ماۋسىم-شىلدە قىرعىنىندا» اقپارات قۇرالدارى مەن الەۋمەتتىك جەلى بەتتەرى نەكرولوگ الاڭعا اينالعانى ەلدىڭ ەسىندە. شىلدە ايىندا توقاەۆ ۇكىمەتكە جاعدايدى دەرەۋ رەتتەۋ جونىندە تاپسىرما بەرىپ، وتستاۆكا جايلى ەسكەرتىپ، سىنعا العان. قازاقستاندا ينفلياتسيا، كەدەيشىلىك، جۇمىسسىزدىق، جوسپارلى ەمدەلۋ ت.ب. ماسەلەلەر تەرىس باعىتتا كۇردەلەنە ءتۇستى.

“The Qazaq Times”