وزبەكستان ارزان باعاداعى ەلەكتر كولىكتەرىن شىعارۋى مۇمكىن

وزبەكستان پرەزيدەنتى شاۆكات ميرزيەەۆ ەلدە جىلىنا 50-60 مىڭ اۆتوكولىك جانە ەلەكتر كولىكتەرىن ءوندىرۋ كەرەكتىگىن العا تارتىپ، كولىك ءوندىرىسى تارماعىنا قولايلى شارت-جاعداي جاساۋعا تاپسىرما بەردى. ول سونداي-اق كولىك ءوندىرىسى سالاسىنا شەتەلدىك مامانداردى كوپتەپ تارتۋ تۋرالى دا ۇسىنىسىن ورتاعا سالعان.

جاسىرارى جوق، وزبەك ليدەرىنىڭ بۇنداي مالىمدەمەسى ەلدە اۆتوكولىك ءوندىرىسى سالاسىندا مونوپوليا تۋرالى داۋ-شارلاردىڭ تۇسىندا جاسالىپ وتىر. وزبەكستاندا دامىپ كەلە جاتقان كولىك ءوندىرىسى سالاسىنا سالىم قوسپاق بولعان وزگە كومپانيالار ەلدەگى اتالعان سالانى  مونوپولداعان «ۋزاۆتوموتورس» كومپانياسىنا قاتىستى شاعىمدارى بار.

بۇدان ءبىر جىل بۇرىن ميرزيەەۆ وتاندىق كولىكتەرىنىڭ باعاسى قىمبات دەپ سىن ايتقان بولاتىن. ال، جەلتوقسان ايىنداعى مالىمدەمەسىندە ەلدەگى كولىك ءوندىرىس سالاسىندا باسەكەلەستىك قالىپتاستىرۋ ارقىلى دامىتۋ تۋرالى ويلارىن ايتىپ ەدى. كاسىپكەرلەر ءۇشىن بارىنە ورتاق شارت ءتۇزۋ تۋرالى دا ءسوز قوزعاعان. ەلدەگى كولىك ءوندىرىسى سالاسىندا KIA, Volkswagen جانە Skoda سەكىلدى ءىرى كومپانيالار ۇستەمدىك ەتىپ كەلگەن. پرەزيدەنت ميرزيەەۆ الدا وزگە دە كومپانيالاردىڭ ورتاق مۇمكىندىكتەرگە يە بولاتىنى تۋرالى باستاما كوتەرۋدە.

وزبەكستاندا جاسالعان Nexia مەن RAVON كولىكتەرى قازاقستان، قىرعىزستان سەكىلدى ورتا ازيا ەلدەرىندە كوبىرەك ساتىلىمعا شىققان. الداعى ۋاقىتتا اۆتو كولىك وندىرستەرىن، اسىرەسە ەلەكتر كولىكتەردى ءوندىرۋدى جانداندىرا تۇسسە، وزبەكستان بۇل سالادا وڭىردەگى شارتسىز ليدەرگە اينالماق.

“The Qazaq Times”