فوتو: اشىق دەرەككوز

دۇنيەجۇزىلىك دەنساۋلىق ساقتاۋ ۇيىمى COVID-19 پاندەمياسىنىڭ ەكىنشى جىلى بىرىنشىسىنە قاراعاندا اۋىر بولۋى مۇمكىن دەگەن بولجام جاسادى. سوڭعى ەكى اپتادا اۋرۋ جۇقتىرۋ ستاتيستيكاسى رەكوردتىق كورسەتكىشكە جەتكەن.

ددسۇ توتەنشە جاعدايلار جونىندەگى ديرەكتورى مايكل رايان: «كوروناۆيرۋس پاندەمياسى ەكىنشى جىلعا اۋدى. اۋرۋدىڭ تارالۋ ديناميكاسىن ەسكەرسەك، بيىلعى جاعداي بىلتىردان دا اۋىر بولۋى مۇمكىن. اسىرەسە، ەۋروپا مەن سولتۇستىك امەريكاداعى جاعداي كۇردەلى. اۋا رايىنىڭ قولايسىزدىعىنان ىندەت ەل اراسىندا تەز تاراي باستادى»، – دەيدى.

20 جەلتوقساندا كوروناۆيرۋستىڭ مۋتاتسياعا ۇشىراعان ءتۇرى ۇلىبريتانيادا تىركەلىپ، دەرت ۇدەدى. بۇل ۆيرۋس الدەقايدا تەز تارالادى دەيدى عالىمدار. جەلتوقساننىڭ باسىندا-اق لوندوندا ۆيرۋستىڭ وسى ءتۇرىن جۇقتىرعانداردىڭ ۇلەسى دەرتكە شالدىققانداردىڭ 60%-نا جەتكەن.

رەسمي مالىمەتتەر بويىنشا، ۆيرۋس ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. جاڭا شتامم الدىڭعى كوروناۆيرۋسقا قاراعاندا ادامدارعا تەز جۇعاتىنى انىقتالعان. الەمنىڭ كوپتەگەن ەلى كورولدىكپەن اۋە قاتىناسىن توقتاتىپ، بۇل ەلدەردەن كەلگەن ادامداردى قاتاڭ تەكسەرۋگە كىرىستى .

ازىرگە «بريتاندىق» ۆيرۋس ناقتى وسى ەلدە وزگەرىسكە ۇشىراعان با، ول دا بەلگىسىز. ونىڭ وسى ەلدە يممۋنيتەتى ءالسىز، ۆيرۋسپەن كۇرەسۋگە دارمەنسىز ناۋقاستىڭ اعزاسىندا پايدا بولعانىن نەمەسە بولماسا سىرتتان كەلگەنىن ءالى ەشكىم انىقتاعان جوق.

كوروناۆيرۋستىڭ وزگەرگەن ءتۇرى قازىرگە دەيىن 20-دان استام ەلدە تىركەلدى. ونىڭ ىشىندە دانيا، يتاليا، رەسەي مەن اۆستراليا بار. ۆيرۋس جۇقتىرعان ادامداردىڭ بارلىعى تاياۋدا عانا ۇلىبريتانيادان ورالعان. ال گەرمانيادا ۆيرۋس تابىلعان وتباسى افريكادا ساياحاتتا بولعان.

قازىر الەمدە دەرتكە شالدىققانداردىڭ جالپى سانى 92,3 ميلليونعا جەتتى. 2 ميلليونعا جۋىق ادام اجال قۇشقان. ددسۇ حابارلاماسىندا ۆيرۋستىڭ وزگەرگەن تۇرىنەن كەلەتىن قاۋىپتىڭ جوعارى ەكەندىگى ايتىلادى.

"The Qazaq Times"