پوليتسيا كاپيتانى، باسقارما باستىعىنىڭ ءبىرىنشى ورىنباسارى مايلىقباەۆ داۋرەن امانجولۇلى وقيعا كەيىپكەرى بولعان تىلشىلەردىڭ كوزىنشە ەشكىمدى ۇستاماعانىن ايتادى. ول قۇقىق قورعاۋشى جۋرناليستەردىڭ جولىن نەلىكتەن بوگەگەنىن تۇسىندىرمەدى. فوتو: 10 قاڭتار 2021 جىل. فوتو: QT

پوليتسيا الماتى قالاسىنداعى ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ جۋرناليستەرى مەن قۇقىق قورعاۋشىسىنىڭ كەشكى ايازدا اباي جانە بۇرىنعى فۋرمانوۆ داڭعىلىنىڭ قيىلىسىندا ەكى ساعات بويى جولىن بوگەپ، جۇرۋىنە كەدەرگى جاسادى.

رەداكتسيا تىلشىلەرى وقيعا ورنىنا بارىپ، جاعدايدى كوزىمەن كوردى. ينگا يمانباي، اندرەي سۆيريدوۆ جانە ەسداۋلەت قىزىربەكۇلىنىڭ الدىنان ءبىر توپ پوليتسەي شىعىپ، ەمىن-ەركىن ءجۇرىپ-تۇرۋىن شەكتەگەن.

يمانبايدىڭ ايتۋىنشا، جەتى ساعاتتان استام ارنايى جاساقتىڭ قورشاۋىندا بولعان دەمپارتيا باستاماشىل توبىنا اس-سۋ الىپ بارماق بولعان. جول-جونەكەي ون شاقتى پوليتسەي ىزىنە تۇسكەنىن ايتادى. ولارعا ءتارتىپ ساقشىسى پوليتسيا كولىگىنە وتىرۋ جونىندە تالاپ قويعان.

بىرنەشە ساعات پوليتسيانىڭ باقىلاۋىندا بولعان ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ جۋرناليستەرى ينگا يمانباي مەن اندرەي سۆيريدوۆ. الماتى قالاسى. 10 قاڭتار 2021 جىل. فوتو: QT

 «مەنىڭ بالا-شاعام بار، ۇيگە بارايىن دەسەم، ەكى ساعاتتان بەرى ءبىزدى جىبەرمەي تۇر. نە ميتينگتەگى ادامدارعا بارۋعا جىبەرمەيدى، نە تاكسي ۇستايىن دەسەك وعان مۇرسات بەرمەيدى. تەك قىزمەتتىك كولىككە وتىراسىڭدار دەپ جىبەرمەي تۇر ەدى، ەندى سەندەر كەلگەسىن جىبەرىپ تۇر. ...مەن ۇستالعانمىن با دەسەم، جوق دەيدى. بىراق كولىك ۇستايىن دەسەم، الدىمىزدان بوگەۋگە تىرىستى»، – دەيدى ينگا يمانباي.

«پوۆەستكامەن بولماسا، پوليتسيا كولىگىنە جايدان-جاي ءپرينتسيپتى تۇردە وتىرمايمىن» دەگەن قۇقىق قورعاۋشى-جۋرناليست كۇشتىك قۇرىلىم وكىلدەرىنىڭ بۇل ارەكەتىن جەكە قۇقىعىنا قول سۇعۋ دەپ سانايدى.

پوليتسيا كاپيتانى، باسقارما باستىعىنىڭ ءبىرىنشى ورىنباسارى مايلىقباەۆ داۋرەن امانجولۇلى ەشكىمدى ۇستاپ تۇرماعانىن ايتىپ، باسىن الىپ قاشۋعا تىرىستى.

پويتسيا ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ جۋرناليستەرىن مىنا كولىككە وتىرۋعا ۇگىتتەگەن. 10 قاڭتار 2021 جىل. فوتو: QT

بىراق جۋناليستەردىڭ كوزىنشە «ۇستاپ تۇرعامىز جوق، جىبەرىپ جاتىرمىز عوي. بىلمەدىم، مىنەكەي، بارسىن. ەشقانداي حاتتاما تولتىرىلعان جوق. بارسىن باراتىن جەرىنە. باسقا سۇراقتار بويىنشا ءباسپاسوز قىزمەتىنە جۇگىنىڭىز»، – دەپ قىسقا قايىردى.

ساعات 19.00-گە قاراي كولىككە وتىرىپ كەتكەن تىلشىلەردىڭ ىزىنشە ءبىر توپ پوليتسەي قىزمەتتىك كولىكپەن كەتىپ قالدى.

وقيعا ورنىنا رەداكتسيا تىلشىلەرى كەلگەن بويدا ءبىر توپ پوليتسەي ارىپتەستەرىمىزدى بوساتتى. 10 قاڭتار 2021 جىل. فوتو: QT

پرەزيدەنت توقاەۆ سايلاۋ كۇنگى سوزىندە نارازىلارعا قارسى «رەپرەسسيالىق شارالارعا جول بەرىلمەيتىنىن» ايتقان. دەگەنمەن جەكسەنبى كۇنى تەك بەيبىت ميتينگكە جينالعانداردان بولەك، سايلاۋ بارىسىن باقىلاۋعا ىنتالى تاۋەلسىز بايقاۋشىلار مەن باق وكىلدەرىنە ءارتۇرلى قىسىم جاسالدى.

"The Qazaq Times"