قىرعىزستاندا پرەزيدەنتتىك سايلاۋ وتەتىن كۇن جاقىنداعان سايىن تالاپكەرلەر اراسىنداعى جانە سايلاۋداعى ءادمينيستراتيۆتى رەسۋرستار، زاڭنىڭ ساقتالۋى، سونداي-اق، كونستيتۋتسيالىق رەفەرەندۋمنىڭ زاڭدىلىعى قاتارلى ماسەلەلەر بويىنشا قوعامدىق پىكىر تالاس ءتىپتى دە كۇشەيە ءتۇستى. پرەزيدەنتتىككە تالاپكەرلەر ەكىنشى رەت تەلەارنادا پىكىرتالاسقا شىقتى، الايدا، نەگىزگى تالاپكەر سانالعان جانە قىرعىز بيلىگىن قولىنا ۇستاپ وتىرعان سادىر جاپاروۆ پىكىرسايىسقا ەكىنشى رەت قاتىسپاي قالدى. سوندا دا ونىڭ بۇل ارەكەتى وعان دەگەن سىن-پىكىرلەردەن قورعاپ قالعان جوق.

پىكىر سايىس بارىسىندا سادىر جاپاروۆتىڭ قىتايمەن استىرتىن بايلانىسى بار بولۋى مۇمكىن دەگەن ويدىڭ ۇشىن قانات يساەۆ ورتاعا تاستاعانى كوپ تالقىعا شوق تاستادى. ول بۇعان دەيىن «قىتاي تىڭشىسى بولۋى مۇمكىن» دەلىنگەن جك دەپۋتاتى ءادىل ءجۇنىسۇلى مەن سادىر جاپاروۆتىڭ بايلانىسىن ءجىتى تەكسەرۋ كەرەك دەگەن پىكىرىن ايتقان بولاتىن.

سادىر جاپاروۆتىڭ اكەسى قىتاي جەرىندە تۋىپ وسكەنى تۋرالى كەيبىر مالىمەتتەر بۇعان دەيىن دە قىرعىز اراسىندا ايتىلىپ جۇرگەن. دەگەنمەن، قانات يساەۆ ايىتىپ وتىرعان ءادىل ءجۇنىسۇلىنىڭ ونىمەن قاتار ايتىلۋى جاپاروۆتىڭ ساياسي ىقپالىنا كوبىرەك ىقپال ەتكەندەي بولدى. ءادىل ءجۇنىسۇلى قىتايدا تۋىپ-وسەنى جانە وندا جوعارى لاۋازىمدى شەنەۋنىكتىڭ كۇيەۋ بالاسى بولعانى ءۇشىن ول تۋرالى ءتۇرلى اڭگىمەلەر ايتىلىپ كەلگەن. قانات يساەۆ ونىڭ بيزنەستەرىنىڭ بارىنە قىتايدىڭ ينۆەستورلارى سالىم سالعانىن باسا ايتا كەلىپ، ءادىل ءجۇنىستى ءوزىنىڭ دوسى دەپ اتاعان سادىر جاپاروۆتىڭ دا كۇماندى ەكەنىن ايتىپ سالدى.

قىرعىزستانداعى الەۋمەتتىك جەلى قولدانۋشىلار اراسىندا سادىر جاپاروۆ ءوزىنىڭ سايلاۋداعى باسەكەلەستەرىنە الەۋمەتتىك جەلى ارقىلى دا شابۋىل جاساپ جاتىر دەگەن پىكىرلەر بار.

10 قاڭتاردا وتەتىن سايلاۋ قىرعىزستان اۋىر ساياسي جانە ەكونوميكالىق داعدارىس بۇعاۋىنا تۇسكەن تۇستا وتكەلى تۇر. قازان ايىنىڭ باس شەنىندە بولعان بۇلعاقتاردان كەيىن قىرعىزستان بيلىگى قۇلاپ، ۋاقىتتىق ۇكىمەت قاتارىندا سادىر جاپاروۆ كومانداسى كەلگەن بولاتىن. دەگەنمەن، كەزەكتى سايلاۋدا دا قازانداعى بيلىك الماسۋعا الىپ كەلگەن كەلەڭسىز جايتتەردىڭ قايتالانىپ جاتقانى ساراپشىلاردى الاڭداتادى. كەزەكتى سايلاۋدا دا تالاپكەرلەردى ۇركىتىپ-قورقىتۋ، نەگىزگى تالاپكەردىڭ ادمينيستراتيۆتىك رەسۋرستاردى پايدالانۋى، زاڭ بۇزۋشىلىق ارەكەتتەرى سول كۇيىندە ساقتالىپ وتىر.

ارينە، قىرعىز اعايىن الداعى سايلاۋدى ەلدەگى ساياسي داعدارىستان شىعۋ ءۇشىن وتكىزگەلى وتىر جانە بۇعان دەيىنگى بولىپ جاتقان بەيباستاق ارەكەتتەردى زاڭ شەڭبەرىنە تۇسىرۋگە تىرىسۋدا. الايدا، سايلاۋ بارىسىنداعى كەلەڭسىزدىكتەر قىرعىزستاندى تاعى ءبىر تولقۋعا الىپ بارا جاتىر ما دەگەن وي تۋدىرادى.

“The Qazaq Times”