ددسۇ كەزەكتى بيۋللەتەنىندەگى دەرەككە قاراعاندا، 28 جەلتوقسان مەن 3 قاڭتار ارالىعىندا 4 035 226 ادامنان كوروناۆيرۋس انىقتالىپ، 46 017 ادام قايتىس بولعان.  

كوروناۆيرۋستىڭ جىلدامىراق جۇعاتىن بريتان شتامى العاش وتكەن دۇيسەنبىدە ۇلىبريتانيادا تىركەلگەنىمەن، بۇگىنگى تاڭدا 41 ەل-ايماققا تاراپ ۇلگەردى. سونداي-اق، وڭتۇستىك افريكا رەسپۋبليكاسىنان انىقتالعان تاڭى ءبىر  501Y.V2 ۆيرۋس شتامى التى ەلگە جايىلعان. بۇل تۋرالى جەنەۆاداعى ددسۇ حابارلاماسىندا جاريالاندى.

حالىقارالىق ۇيىمنىڭ مالىمەتىنشە، وتكەن اپتادا 28 جەلتوقسان مەن 3 قاڭتار ارالىعىندا COVID-19 جۇقتىرعان 4 035 226 ناۋقاس، 76 017 ءولىم جاعدايى تىركەلگەن. جاڭا كەيستەردىڭ كوبى سولتۇستىك جانە وڭتۇستىك امەريكا (1,9 ملن), ەۋروپا (1,5 ملن) جانە وڭتۇستىك-شىعىس ازيا (208,5 مىڭ) ايماقتارىنا تيەسىلى. ال جالپى ءولىم كورسەتكىشىنىڭ جارتىسىنا جۋىعى ەۋروپادا (33 مىڭداي) ورىن العان. 32 مىڭنان استامى امەريكا قۇرلىقتارىنا، 3,7 مىڭى وڭتۇستىك-شىعىس ازيا ەلدەرىنە جاتادى.

وتكەن جۇمادا 1,3 ملن ناۋقاس انىقتالعان اقش اپتالىق ەسەپتە ءبىرىنشى قاتاردا تۇر. ودان كەيىنگى ورىنداردا ۇلىبريتانيا (343 مىڭ), برازيليا (252 مىڭ), رەسەي (186 مىڭ), ءۇندىستان (136 مىڭ), گەرمانيا (124 مىڭ), يتاليا (102 مىڭ) ەلدەرىن كورۋگە بولادى.

سونىمەن قوسا، ومىردەن وتكەندەردىڭ دە كوبى اقش (17 مىڭ), برازيليا (5 مىڭداي), مەكسيكا (4,6 مىڭ), گەرمانيا (4,5 مىڭداي), ۇلىبريتانيا (4,1 مىڭ), رەسەي (3,7 مىڭ) ەلدەرىنە ءتان.

قاراشا ايىنىڭ باسىنان بەرى دۇنيەجۇزىندە كوروناۆيرۋستىڭ جاڭا تولقىنى ەكپىن الا باستاعان. بۇگىنگى تاڭدا جاپپاي ۆاكتسيناتسيا ءجۇرىپ جاتقانىنا قاراماستان، كوپتەگەن مەملەكەتتەردە قاتاڭ لوكداۋن، ايماقتىق دەڭگەيدە كارانتين، ءتىپتى توتەنشە جاعداي رەجيمىن ەنگىزىلىپ جاتىر.

"The Qazaq Times"