بۇگىن، 5 قاڭتاردا رەسپۋبليكالىق «ەگەمەن قازاقستان» مەملەكەتتىك باسىلىمىندا پرەزيدەنت توقاەۆ «تاۋەلسىزدىك بارىنەن قىمبات» دەگەن تاقىرىپتا كولەمدى ماقالاسىن جاريالادى. وندا ەلدەگى جاعداي، تاريح، جاستار جانە بولاشاق باعدار تۋرالى پىكىرى توپتاستىرىلعان. 

ماقالادا توقاەۆ تانىمىنداعى ەگەمەندىكتىڭ ءۇش تاعانىنىڭ ءبىرى – جەر ء(تىل جانە بىرلىك) تاقىرىبى تۋرالى وي قوزعالعان. تاۋەلسىزدىك كۇنى قارساڭىنداعى رەسەي دەپۋتاتتارىنىڭ قازاقستان جەرى تۋرالى داۋلى پىكىرلەرىنە جاۋاپ تۇرىندە شەكارا جونىندە «ەشكىم داۋلاسا المايتىنىن» ايتادى.

«بابالاردان مۇرا بولعان قاسيەتتى جەرىمىز – ەڭ باستى بايلىعىمىز. قازاققا وسىناۋ ۇلان-عايىر اۋماقتى سىرتتان ەشكىم سىيعا تارتقان جوق. بۇگىنگى تاريحىمىز 1991 جىلمەن نەمەسە 1936 جىلمەن ولشەنبەيدى. حالقىمىز قازاق حاندىعى كەزىندە دە، ودان ارعى التىن وردا، تۇرىك قاعاناتى، عۇن، ساق داۋىرىندە دە وسى جەردە ءومىر سۇرگەن، ءوسىپ-ونگەن. قىسقاشا ايتقاندا، ۇلتتىق تاريحىمىزدىڭ تەرەڭ تامىرلارى كونە زاماننىڭ وزەگىندە جاتىر»، – دەگەن ول شەكارا سىزىعىن رەسمي تۇردە حالىقارالىق شارتپەن بەلگىلەۋ كەيىننەن قالىپتاسقانىن ەسكەرتەدى.

ىلگەرىدە قازىرگىدەي دەليميتاتسيا، دەماركاتسيا ۇعىمدارى بولماعانىنىن ايتادى. پرەزيدەنتتىڭ پىكىرىنشە، «تاريحپەن ساياساتكەرلەر ەمەس، تاريحشىلار اينالىسۋى كەرەك».

«...اۋماقتىق تۇتاستىعىمىزعا كۇمان كەلتىرىپ، تاتۋ كورشىلىك قاتىناستارعا سىنا قاققىسى كەلەتىن كەيبىر شەتەل ازاماتتارىنىڭ ارانداتۋشىلىق ءىس-ارەكەتتەرىنە رەسمي جانە قوعامدىق دەڭگەيدە تويتارىس بەرە وتىرىپ، اعارتۋشىلىق جۇمىستارىن ۇستامدىلىقپەن جۇرگىزگەن ءجون. ءبىز ۇلتتىق مۇددەنى اسپەن دە، تاسپەن دە قورعاۋعا دايىن بولۋىمىز قاجەتتىگىن تاعى دا باسا ايتقىم كەلەدى»، – دەيدى ول.

"The Qazaq Times"