كورنەكى سۋرەت

«The Qazaq Times» اقپاراتتىق، قوعامدىق-ساياسي پورتالىنىڭ قازاق تىلىندەگى باق قاتارىندا، اسىرەسە ەلىمىزدەگى ساناۋلى عانا تاۋەلسىز باسىلىمدار ساپىندا قىزمەت ەتىپ كەلە جاتقانىنا ءتورت جىل تولدى. تاعى دا قايتالاپ ايتار بولساق، بەيتاراپتىق قاعيداسىنا ساي ەشكىمگە بۇرا تارتپادىق جانە رەيتينگ جارىسىنا دا تۇسپەدىك. قازاق حالقىنا، قازاق مەملەكەتىنە الەمنىڭ ءار تۇكپىرىندە بولىپ جاتقان ءتۇرلى قوعامدىق-ساياسي، الەۋمەتتىك جاعدايلاردى وبەكتيۆتى تۇردە قاز-قالپىندا جەتكىزۋگە كۇش سالدىق. بيىل دا ەل ىشىندەگى قوعامدىق-ساياسي جاعدايدى ءجىتى قاداعالاۋعا تىرىستىق.

جىل باسىنداعى ۇلتارالىق جانجال رەتىندە تانىلعان قورداي قاقتىعىسىنان باستاپ كۇنى كەشە وتكەن تاۋەلسىزدىك كۇنگى ميتينگىلەرگە دەيىن، پاندەميا تۇسىنداعى بيلىكتىڭ ارەكەتى، «ماۋسىم-شىلدە قىرعىنى»، دەنساۋلىق ساقتاۋ سالاسىنداعى قوردالانعان ماسەلەلەر مەن كوروناۆيرۋس ستاتيستيكاسىنداعى كەمشىلىكتەر، كۇشتىك-ارنايى قۇرىلىمدار جانە  ازاماتتىق قوعامنىڭ قارىم-قاتىناسى، كۇندەلىكتى ەپيدەميولوگيالىق احۋال جونىندە; حالىقارالىق حابارلاردان: قايتا قالپىنا كەلگەن برەكسيت كەلىسىمى مەن ترامپ-بايدەن اراسىنداعى داۋىس داۋى، ساياسي پوليستەردىڭ سىرتقى ساياساتتاعى جۇرىستەرى جايلى ت.ب. كوپتەگەن جاڭالىقتاردى دەر ۋاقىتىندا بارىنشا قالىڭ قاۋىمعا جەتكىزۋگە كۇش سالدىق.

وتكەن كۇندەردىڭ ەستەلىگىندە قالاتىن 2020 جىلى دا جۋرناليستەرىمىز الەمنىڭ ءار قيىرىنداعى ەلەۋلى وقيعالاردى، اۋقىمدى ماسەلەلەردى قازاق قوعامىنا جەتكىزىپ، ولاردىڭ جاھاندىق ۇلى كوشتە كەلە جاتقان قازاقستان سىندى ەلىمىزگە تيگىزەتىن وڭ نەمەسە تەرىس ىقپالدارى تۋرالى، ەل ىشىندەگى الەۋمەتتىك، قوعامدىق-ساياسي احۋالدار جونىندە جۋرناليستىك ويلارىن جەتكىزىپ وتىردى. ەل جاڭالىقتارى بويىنشا ورتالىق اپپاراتتار مەن ۇكىمەت قۇرامىنىڭ نازارىن وزەكتى ماسەلەلەرگە اۋدارتۋ، سۇراستىرا-زەرتتەۋ باعىتىمىز ءبىرشاما بەكي ءتۇستى.

«The Qazaq Times» پورتالىنىڭ قۇرىلعانىنا 4 جىل تولۋىنا وراي، وسىعان دەيىن بىزگە سەنىم ارتقان تۇراقتى وقىرماندارىمىزعا العىس بىلدىرەمىز. ءارى الداعى ۋاقىتتا دا جاھاندىق جانە ەل ءىشىنىڭ جاعدايلارىنا بىرگە نازار اۋدارامىز دەپ سەنەمىز.

“TheQazaqTimes”