گەرمانيادا كوروناۆيرۋسقا قارسى جاپپاي ۆاكتسيناتسيالاۋ باستالدى. الەۋمەتتىك ساۋالناما ناتيجەسىندە حالىقتىڭ 65%-ى ەكپە سالدىرتۋعا دايىن ەكەنىن ايتقان. 

ءبىرىنشى بولىپ حالبەرشتادت قالاسىنىڭ قارتتار ۇيىندە تۇراتىن 101 جاستاعى تۇرعىنعا ۆاكتسينا ەگىلدى. كەيىننەن مۇنداعى 40 قاريا مەن 11 قىزمەتكەرگە ۆاكتسينا جاسالعان.

گەرمانيا دەنساۋلىق ساقتاۋ ءمينيسترى يەنس شپاننىڭ مالىمدەۋىنشە، ۇكىمەت جىلدىڭ اياعىنا دەيىن ەلدىڭ 16 وڭىرىندە ءبىر ميلليون 300 مىڭنان استام ادامعا ۆاكتسينا ەگۋدى كوزدەپ وتىر.

ۆيرۋسپەن كۇرەسۋ ماقساتىندا ۆاكتسيناتسيالاۋ گەرمانيامەن قاتار سلوۆاكيادا دا باستالدى. الدىمەن ەلگە تانىمال ينفەكتسيونيست وزىنە ەكپە سالدى. سونداي-اق دەنساۋلىق ساقتاۋ سالاسىنىڭ قىزمەتكەرلەرىنە ەكپە جاسالىپ جاتىر. سلوۆاكياعا Pfizer كومپانياسى شىعارعان ۆاكتسينانىڭ 10 مىڭ دانا مولشەرىندە ءبىرىنشى پارتياسى جەتكىزىلدى. جالپى 3 ميلليوننان اسا ادامعا ەكپە سالۋ كوزدەلىپ وتىر.

الەم بويىنشا سىناقتان ءساتتى وتكەن Pfizer, BioNTech فارماتسەۆتيكالىق كومپانياسى جاساعان ەكپە جانە امەريكالىق مoderna ەكپەسىن سالۋدى باستاعان ەلدەر قاتارىندا ۇلىبريتانيا، اقش جانە كانادا بار.

امەريكالىق Pfizer جانە ونىڭ گەرمانيالىق سەرىكتەسى BioNTech كومپانياسى بىرلەسىپ ازىرلەگەن ۆاكتسينانىڭ تيىمدىلىگى كلينيكالىق سىناقتا 90%-دان استام وڭ ناتيجە كورسەتكەن. ال وسكفورد ۋنيۆەرسيتەتى مەن AstraZeneca كومپانياسى وندىرگەن كوروناۆيرۋسقا قارسى ۆاكتسينا 70% تيىمدىلىك كورسەتتى.

"The Qazaq Times"