قىرعىزستاندا 10 قاڭتار كۇنى پرەزيدەنتتىك سايلاۋ وتپەك. قازىر ەلدىڭ بارلىق بيلىگىن وزىنە توپتاستىرعان سادىر جاپاروۆ تا پرەزيدەنتكە ۇمىتكەر قاتارىندا سايلاۋعا قاتىسادى. «ورتالىق ازيا بارومەرترى» اتتى تاۋەلسىز ۇيىم ەلدە 9-17 جەلتوقسان ارالىعىندا الەۋمەتتىك ساۋالناما جۇرگىزگەن. ناتيجەسىندە ەلدىڭ 80 پايىزى پرەزيدەنتتىك باسقارۋ جۇيەسىن قولدايتىنى بەلگىلى بولدى.

پرەزيدەنتتىككە ۇمىتكەرلەر رەتىندە سادىر جاپاروۆپەن قاتار «ءبۇتىن قىرعىزستان» پارتياسىنىڭ جەتەكشىسى، ساياساتكەر اداحان مادۋماروۆ تا بار. الايدا، ساۋالناماعا قاتىسقانداردىڭ 3 پايىزى عانا مادۋماروۆقا داۋىس بەرەتىنىن بىلدىرگەن ەكەن. جاپاروۆتى قولداۋشىلار 64 پايىز دەپ كورسەتەدى اتالعان ۇيىم.

ساۋالناماعا قاتىسىۋشىلارعا ەلدەگى ساياسي جانە ەكونوميكالىق جاعداي، 5 قازانداعى بيلىكتىڭ الماسۋى، الداعى سايلاۋ مەن رەفەرەندۋمعا دەگەن كوزقاراسى، ۇكىمەت، سوت، جوعارعى كەڭەسكە بولعان سەنىمدەرى، ەل باسقارۋ تۇزىمىنە جانە سايلاۋعا ءتۇسىپ جاتقان ساياساتكەرلەرگە دەگەن كوزقاراستارى تۋرالى سۇراۋلار قويىلعان.

ناتيجەسىندە، ساۋالناماعا قاتىسۋشىلاردىڭ 58 پايىزى بيلىكتىڭ الماسۋىن تولىعىمەنەن قولداعان، 73 پايىزى 10 قاڭتارداعى پرەزيدەنتتىك سايلاۋعا داۋىس بەرۋگە نيەتتى، ونىڭ 64 پايىزى جاپاروۆتىڭ پرەزيدەنت بولۋىن قولدايدى. سونداي-اق، قازىرگى ساساتكەرلەرگە دەگەن سەنىمدى باعالاۋدا 48 پايىز قاتىسۋشىنىڭ جاپاروۆقا سەنەتىنى بەلگىلى بولعان. دەگەنمەن، رەسپوندەنتتەر اراسىندا جاپاروۆتى سايلاۋداعى ادىلدىك پەن تەڭدىكتى بۇزىپ جاتىر دەپ ايىپتايدى.

ال، قاتىسۋشىلاردىڭ 80 پايىزى پرەزيدەنتتىك باسقارۋدى، 14 پايىزى پارلامەنتتىك باسقارۋدى قولدايدى. كونستيتۋتسيانى وزگەرتۋ بويىنشا رەفەرەندۋمدى 76 پايىز ادام قولدايدى، 7 پايىز قاتىسۋشى رەفەرەندۋم تۋراسىندا بىلمەيدى. بۇعان دەيىن قىرعىزستانداعى بىرقاتار ينستيتۋتتار مەن ساياسي توپتار كونستيتۋتسيالىق رەفەرەندۋمنىڭ ءوزى كونستيتۋتسيانى ورەسكەل بۇزۋمەن ءوتىپ جاتىر دەپ ايىپتاعانى ءمالىم.

ساراپشىلاردىڭ پىكىرىنشە، ساۋالناما نايجەسى قىرعىزستانداعى الەۋمەتتىك ساياسي جاعدايدى كورسەتىپ وتىر. ساۋالناما بويىنشا ءبىر ادامنىڭ باسىم داۋىسقا يە بولىپ تۇرعانى ونىڭ وڭىرلەردەگى تانىمالدىعىمەن بايلانىستى دەپ سانايدى قىرعىزستان ساياساتتانۋشىلارى.

“The Qazaq Times”