كورنەكى سۋرەت. فوتو: inbusiness.kz

قازاقستاندا 15 جەلتوقسان 749 ادام كوروناۆيرۋسقا، 14 جەلتوقسان 181 ادام كوروناۆيرۋس پنەۆمونياسىنا شالدىققانى انىقتالعان. قازىر ەلدە 25 مىڭ ادام (U07.1 نەمەسە كۆي+ بويىنشا 13 358, U07.2 نەمەسە كۆي- بويىنشا 11 922) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – استانا (86), پاۆلودار (80), الماتى (77), قوستاناي (70), اقمولا مەن سقو (ارقايسى 70-تەن) وڭىرلەرىنەن. وتكەن تاۋلىكتە 1122 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 7 ادام ومىردەن وتكەن.

#U07.2  الدىڭعى كۇنى، ياعني جەلتوقساننىڭ 14-ءى كوروناۆيرۋس پنەۆمونياسىنا جاتاتىن 181 جاعداي تىركەلگەن. وعان قوسا، دۇيسەنبى كۇنى 158 ادام ەمدەلىپ شىققان.

#جالپى  دەنمين-ءنىڭ رەسمي مالىمەتىنشە, ەمدەلىپ جاتقان 25 280 ناۋقاستىڭ 4163-ءى اۋرۋحانادا. تاعى 21 117 ادام امبۋلاتورلىق تەراپيادا. مينيسترلىك رەسمي حابارلامانى جاڭارتتى. وندا اۋىرىپ جاتقان بالالار تۋرالى اقپارات الىنىپ تاستالعان. جانە كوروناۆيرۋس پنەۆمونياسىنىڭ مەرزىمىنە بايلانىستى ايلاپ قولدانىلعان قاتەلىك تۇزەتىلمەگەن.

احۋالى ناشار 251 ناۋقاستىڭ اراسىندا 38 ادامنىڭ جاعدايى قاتتى قيىنداعان. جانە 46 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

قازاقستاندا كوروناۆيرۋس پنەۆمونياسى («كۆي-» – QT) ءبىر كۇنگە كەشىگىپ جاريالانعانىنا قاراماستان، «وتكەن تاۋلىكتەگى» دەرەك دەپ بەرىلەدى. مىسالى، سارسەنبى كۇنى تاڭدا كوروناۆيرۋس سياقتى سەيسەنبىنىڭ ەمەس، دۇيسەنبى كۇنگە تيەسىلى مالىمەت بەرىلەدى. بىراق نەگە ەكەنى بەلگىسىز «الدىڭعى» دەپ بەرۋدىڭ ورنىنا رەسمي اقپاراتتاردا «وتكەن تاۋلىكتە» دەپ جازىلادى. وسىعان دەيىن ەلدەگى كوروناۆيرۋس جاعدايى تۋرالى رەسمي اقپارات كوزى بولىپ سانالاتىن coronavirus2020.kz سايتى مەن دەنساۋلىق ساقتاۋ مينيسترلىگىنىڭ اقپارات رەسۋرستارىندا جاريالانعان دەرەكتەر ءتورت ايدان بەرى قاتە بەرىلىپ كەلگەنى جايلى ۇستانىمىمىزدى ءبولىسىپ، اقپارات قۇرالدارىنا ەسكەرتكەنبىز. دەگەنمەن ءالى كۇنگە دەيىن كەيبىر باسىلىمدار ەكى كۇنگە تيەسىلى دەرەكتى ءبىر كۇنگە تەلىپ حابارلاپ كەلەدى.

The Qazaq Times رەداكتسياسى تومەندەگى كەستەنى ەڭ شىنايى نۇسقا دەپ سانايدى.

استانا جانە اتىراۋ وبلىسى «قىزىل ايماقتا» تۇر. پاۆلودار، سقو، بقو، شقو، قوستاناي، اقمولا وبلىستارى مەن الماتى قالاسىنداعى ەپيدەميا احۋالى «سارى ايماقتا». باسقا وڭىرلەر جاسىل ايماقتا.

9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭى تۋرالى جاڭا بولجامىن بولىسكەن. ونىڭ ايتۋىنشا، ەكىنشى تولقىننىڭ شارىقتاۋ كەزەڭى 2021 جىلدىڭ قاڭتار جانە اقپان ايلارىنا سايكەس كەلەدى.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 143 مىڭنان، 1 تامىزدان بەرگى كوروناۆيرۋس پنەۆمونياسى 44 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 186 مىڭعا جەتسە، ال ۇلتتىق ستاتيستيكادا 188 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3389-ى (كۆي+ / U07.1 – 2159, كۆي- / U07.2 – 466, ىلەسپە اۋرۋلاردان – 764) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 764 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 44-ءشى ورىندا تۇر.

"The Qazaq Times"