قازاقستان پرەزيدەنتى توقاەۆ. فوتو: AP

«ەستيتىن مەملەكەت» قۇرۋدى كوكسەيتىن توقاەۆ دەموكراتياعا جول اشاتىن ساياسي رەفورمانىڭ جاڭا توپتاماسى ازىرلەنىپ جاتقانىن، ونى الداعى جىلدىڭ باسىندا جاريالايتىنىن مالىمدەدى.

پرەزيدەنت تاۋەلسىزدىك كۇنىنە ارنالعان مەملەكەتتىك ناگرادالاردى تاپسىرۋ راسىمىندە سويلەگەن سوزىندە:

«تاۋەلسىزدىگىمىزدىڭ 29 جىلى كۇردەلى ءارى ادەتتەن تىس سۇرلەۋدە ءوتتى. مۇنداي تاعدىرلى سىناقتار ءار ۇرپاقتىڭ باسىنا تۇسە بەرمەيدى.  بولاشاق ۇرپاق كۇرەسىمىزدى لايىقتى باعالارىنا سەنىمدىمىن. الەمدىك اۋىر تاۋقىمەتتى ەڭسەرگەن بويدا ءبىز الدىمىزعا بۇدان دا باتىل ماقساتتار مەن مىندەتتەر قويامىز»، – دەپ ۋادە بەردى.

ول 2021 جىلدى «تاۋەلسىزدىكتىڭ 30 جىلدىعى» دەپ جاريالايتىنىن حابارلادى. «وتكەندى سارالاۋ» ماقساتىندا كەلەسى جىلدى ەلدىك تۇرعىدا «ناقتى ىستەرمەن جانە جاڭا جوبالارمەن» وتكىزبەك كورىنەدى.

«ءبىز باسى ارتىق اكتسيالار مەن پافوستىق ءىس-شارالاردان باس تارتامىز، بارلىق جۇمىس بارىنشا پراگماتيكا تۇرىندە، ۇنەمدەۋ ارقىلى جۇرگىزىلەدى. ەكونوميكا، الەۋمەتتىك سالا، ەكولوگيادا جۇيەلى شارالاردىڭ كولەمدى كەشەنىن ىسكە اسىرۋدى جالعاستىرامىز. حالىقتىڭ بارلىق توبىن، اسىرەسە جاستار مەن ايەلدەردىڭ، مۇمكىندىگى شەكتەۋلى ادامداردىڭ مۇقتاجدىق-قاجەتتىلىكتەرىنە ءجىتى نازار اۋدارامىز»، – دەگەن ول الەۋمەتتىك ساياساتتا اتقارىلعان «شارۋالاردى» باياندادى.

توقاەۆ پاندەميانىڭ كوكتەمگى تولقىنى ەكپىن الا باستاعان تۇستا اسىعىس قابىلدانعان بەيبىت جينالىستار، ساياسي پارتيالار جانە سايلاۋ تۋرالى زاڭداردى «ساياسي وزگەرىس» رەتىندە اتادى. سونىمەن قوسا، پارلامەنت اتقارۋى ءتيىس جۇكتى كوتەرگەن ۇلتتىق كەڭەستىڭ باستاماسىمەن 9 زاڭ قابىلدانعانىن اتاپ ءوتتى. ماراپات ۇلەستىرگەنى دە وسىدان.

«ءبىز ەلدە ساياسي جاڭعىرتۋ ۇدەرىسىن جالعاستىرۋعا نىق نيەتتەمىز. قازىر ەندىگى جىلدىڭ باسىندا جاريالاناتىن ساياسي رەفورمالاردىڭ جاڭا جيىنتىعى دايىندالىپ جاتىر. بۇل «حالىق ۇنىنە قۇلاق اساتىن مەملەكەت» قۇرۋعا، ادىلەتتىلىك پەن تەڭ مۇمكىندىكتەر قاعيداتىن ىلگەرىلەتۋگە باعىتتالعان ەلىمىزدەگى دەموكراتيالىق وزگەرىستەرگە جاڭا سەرپىن بەرەدى»، – دەپ ءجىپتىڭ ۇشىن كورسەتتى توقاەۆ.

الداعى جىلعى تاۋەلسىز جەكە باقىلاۋشىلار قىزمەتىنىڭ اياسىن تارىلتۋ جانە تەك پارتيالىق ءتىزىم ارقىلى سايلانۋ مەحانيزمى سياقتى «ەرەكشە شەكتەۋلەرمەن» وتەتىن ءماجىلىس پەن ءماسليحاتتار سايلاۋىن «ەل ومىرىندەگى  ماڭىزدى وقيعا» دەيدى. ول ساياسي ناۋقان «قوعامنىڭ جوعارى ازاماتتىق بەلسەندىلىگى مەن ساياسي كەمەلدەنۋىنىڭ كورىنىسى بولارىنا سەنىمدى» ەكەنىن جەتكىزدى. سونىمەن قوسا، سايلاۋ «مەملەكەتتىلىكتىڭ ينستيتۋتسيونالدى تۇراقتىلىعىن تاعى دا  ايقىن دالەلدەيدى» دەپ تولىقتىردى.

ازاماتتىق قوعام بەلسەندىلەرى مەن تاۋەلسىز قۇقىق قورعاۋشىلار پرەزيدەنت دەموكراتيانى دامىتۋ تۋرالى كوپ ءسوز ەتەتىنىن، – ەلدە ادام قۇقىعى مەن ساياسي ومىرگە ارالاسۋدا قىسىم تىيىلماي تۇرعانىن ايتادى. ولاردىڭ سوزىنشە، ازاماتتىق بەلسەندىلىك جونىندە اقپارات مينيسترلىگى مەن پرەزيدەنت ءجيى ايتادى، الايدا قۇزىرلى ورگاندار مەن كۇشتىك قۇرىلىمدار تاراپىنان ءارتۇرلى سەبەپكە بايلانىستى ايىپتاۋ فاكتىلەرى ازايماعان.

"The Qazaq Times"