كورنەكى سۋرەت. فوتو: www.wrvo.org

ورتالىق سايلاۋ كوميسسياسى ساياسي پارتيالاردىڭ پىكىرسايىسىنا قاتىساتىن سپيكەرلەردىڭ ءتىزىمىن جاريالادى.

30 جەلتوقسانعا بەلگىلەنگەن «حابار» ارناسىندا وتەتىن سايلاۋ الدىنداعى دەباتقا ءار پارتيادان ءبىر وكىل قاتىسپاق. وسك حابارلاۋىنشا، «حابار» اگەنتتىگىندە تەلەۆيزيالىق پىكىرسايىس وتكىزۋ تۋرالى قاۋلىسى قابىلدانىپ، دەبات رەگلامەنتى بەكتىلگەن.

«ساياسي پارتيالاردىڭ شەشىمىمەن ايقىندالعان تەلەۆيزيالىق پىكىرسايىستارعا قاتىسۋشىلاردىڭ قۇرامىندا «ADAL» پارتياسىسىنىڭ ساياسي كەڭەسىنىڭ مۇشەسى جۇماعازيەۆ ەلدار تىنىشبايۇلى، «اق جول» توراعاسى پەرۋاشەۆ ازات تۇرلىبەكۇلى، «اۋىل» پارتياسىنىڭ توراعاسى بەكتاەۆ ءالي ابدىكارىمۇلى، قازاقستان حالىق پارتياسىنىڭ توراعاسى قوڭىروۆ ايقىن ويراتۇلى، «Nur Otan» پارتياسىنان توراعانىڭ ءبىرىنشى ورىنباسارى بايبەك باۋىرجان قىدىرعاليۇلى بار»، – دەدى ورتسايلاۋكوم مۇشەسى اناستاسيا ششەگورتسوۆا.

ازاماتتىق بەلسەندىلەر توراعالار مەن نازارباەۆتىڭ سەنىم بىلدىرگەن وكىلى قاتىساتىن دەباتقا ەلدىڭ قىزىعۋشىلىعى جوق دەپ سانايدى. ولار مۇنىڭ سەبەبى اتالعان پارتيالاردىڭ بيلىك پارتياسىنان «ەنشى الىپ شىعۋىن» جانە ءاردايىم ماقتاپ-ماداقتاۋىن العا تارتادى.

ادەتتە سايلاۋ قارساڭىنداعى قازاقستاندىق دەباتتار ەشبىر تارتىسسىز، «باسەكەلەس» كانديداتتاردىڭ ءبىر-ءبىرىن قۇپاتاپ-قولداۋىمەن وتەدى. بىلتىرعى پرەزيدەنت سايلاۋىنىڭ دەباتى دا سپيكەرلەردىڭ ءوزارا پىكىر قايشىلىعىنسىز، «ىڭ-شىڭسىز» وتكەن.

قازاقستاندا سايلاۋعا ءتۇسۋ ءۇشىن مىندەتتى تۇردە رەسمي تىركەلگەن الدەبىر پارتياعا كىرۋ قاجەت. جەكەلەگەن كانديداتتار سايلانۋ قۇقىعىنان قاعىلعان. تاۋەلسىز ساراپشىلار پارتيالىق تىزىممەن سايلاۋدى ادىلەتسىز، شىنايى وپپونەت پارتيانىڭ جوقتىعىن، ولاردىڭ «بيلىكشىل» ەكەنىن ايتىپ سىنايدى. تمد اياسىنان تىس ەلدەردەن كەلگەن حالىقارالىق باقىلاۋشىلار، ماسەلەن ەقۇى قازاقستاندا وسىعان دەيىن وتكەن سايلاۋدىڭ بارلىعىن ءادىل وتپەدى دەپ باعالاعان. ولار سايلاۋ كەزىندە داۋىس ۇرلاۋ مەن فالسيفيكاتسيا، وپپوزيتسيا تاراپىنا قىسىم جاساۋ، اقپارات قۇرالدارىنىڭ جۇمىسىنا كەدەرگى كەلتىرۋ سياقتى فاكتىلەر بولعانىن ءجيى ايتادى.

قازاقستاندا رەسمي تىركەلگەن التى پارتيا بار. ونىڭ ءبىرى ءوزىن «ناعىز» وپپوزيتسيا سانايتىن جسدپ قۋعىنداعى ساياساتكەر-بانكير مۇحتار ءابليازوۆتىڭ ۇگىتىنەن كەيىن سايلاۋعا قاتىسۋدان اينىپ قالعان. وزگە بەس پارتيا الداعى جىلى 10 قاڭتارعا بەلگىلەنگەن ءماجىلىس جانە ءماسليحات دەپۋتاتتارىنىڭ سايلاۋىنا قاتىسۋعا پارتيالىق ءتىزىمىن وتكىزىپ قويدى. ولار – بيلىكتىڭ «نۇر وتان» پارتياسى، «ادال» (بۇرىنعى «بىرلىك»), «قازاقستاننىڭ حالىق پارتياسى» (بۇرىنعى «قازاقستاننىڭ كوممۋنيستىك حالىق پارتياسى»), «اق جول» جانە «اۋىل» پارتيالارى. قازاقستاندا سايلاۋدان كوڭىلى قالعان نەمەسە ونىڭ ءادىل وتەرىنە سەنبەيتىن ازاماتتار از ەمەس.

"The Qazaq Times"