سايلاۋ الدىنداعى ۇگىت-ناسيحات كەزەڭى باستالدى – دەبات قاشان وتەدى؟ ساۋالناما جۇرگىزۋگە كىمدەر قۇقىلى؟

بۇگىن، 10 جەلتوقسان كەشكىسىن سايلاۋالدى ۇگىت-ناسيحات كەزەڭى باستالادى. ورتالىق سايلاۋ كوميسسياسىنىڭ مالىمەتىنشە، ۇگىت-ناسيحات كەزەڭى  كەلەسى جىلى 9 قاڭتار تۇنگى ساعات 00:00-گە دەيىن جالعاسادى.

كەلەر جىلعى 10 قاڭتارعا بەلگىلەنگەن ءماجىلىس جانە ءماسليحات سايلاۋىنا 5 پارتيا قاتىسادى. ولار – «قازاقستان حالىق پارتياسى» (بۇرىنعى قكحپ), «نۇر وتان»، «اۋىل»، «اق جول» جانە «ادال» (بۇرىنعى «بىرلىك»). رەسمي دەرەك بويىنشا، ءماجىلىس دەپۋتاتتىعىنا 3 ۇمىتكەردەن تالاسادى. 312 كاديداتتىڭ (90 ايەل، 222 ەر ادام) ورتاشا جاسى 46,7.

بەيسەنبى كۇنگى بريفينگتە وسك ماجىلىسكە تۇسەتىن پارتيالاردىڭ دەباتى 30 جەلتوقسانعا بەلگىلەنگەنىن حابارلادى. ماجىلىسكە قاتىساتىن پارتيالاردىڭ پىكىرسايىسىن وسك، ال ءماسليحات دوداسىن ايماقتارداعى كوميسسيا فيليالدارى ۇيىمداستىرادى.

سونىمەن قوسا، سايلاۋ الدىندا حالىق پىكىرىن ءبىلۋ ماقساتىندا ساۋالناما جۇرگىزۋ تەك سول سالادا 5 جىل تاجىريبەسى بار زاڭدى تۇلعالارعا عانا رۇقسات ەتىلەدى. ازىرگە وسك-عا 7 ۇيىم ءوتىنىم بەرىپ، رۇقسات العان. ولاردىڭ قاتارىندا «قوعامدىق پىكىر» قب، «دەموكراتيا ينستيتۋتى» عىلىمي-زەرتتەۋ اسسوتسياتسياسى قب، «نۇر وتان» پارتياسى، «ەۋرازيالىق ينتەگراتسيا ينستيتۋتى» جشس، «استانا زەرتتەۋ» قق، «پراۆو» قق، «شقو-نىڭ تالداۋ جانە بولجاۋ ينستيتۋتى» جشس بار. ءبىر ەسكەرە كەتەتىن جايت، وسك تىركەگەن ۇيىمداردان باسقا كەز كەلگەن زاڭدى جانە جەكە تۇلعالارعا (قاراپايىم ازامات، بلوگەر، تانىمال تۇلعا، اقپارات قۇرالى، قوعامدىق ۇيىمدار ت.ب.) قوعامدىق ساۋالناما جۇرگىزۋگە تىيىم سالىنادى.

كوميسسيانىڭ مۇشەسى اناستاسيا ششەگورتسوۆانىڭ ايتۋىنشا، قوعامدىق-الەۋمەتتىك پىكىر-ساۋالنامالار مەن سايلاۋ قورىتىندىسى تۋرالى بولجام سايلاۋدان 5 كۇن بۇرىن، ياعني 4 جەلتوقسانعا دەيىن جاريالانۋى ءتيىس. جانە ۇگىت-ناسيحات كەزەڭى اياقتالعانشا، 9 قاڭتارعا دەيىن ماجىلىسكە ءوتۋدى ماقسات تۇتقان 21 جۋرناليست-كانديدات ۋاقىتشا كاسىبي قىزمەتىن اتقارا المايدى.

جيىندا اقپارات جانە قوعامدىق دامۋ ۆيتسە-ءمينيسترى كەمەلبەك ويشىباەۆ الەۋمەتتىك جەلىلەردە ۇگىت-ناسيحات جۇرگىزۋ ماسەلەسى ۇلتتىق زاڭنامادا ناقتى قاراستىرىلماعانىن ايتتى. دەگەنمەن «الەۋمەتتىك جەلى ادامنىڭ جەكە پىكىرىن بىلدىرەتىن الاڭ» رەتىندە سانالعاندىقتان كانديداتتاردىڭ جەكە اككاۋنتىنا (رەسمي پاراقشاسى ەمەس) «مونيتورينگ» جۇرگىزىلمەيدى.

قازاقستاندا سايلاۋعا ءتۇسۋ ءۇشىن مىندەتتى تۇردە رەسمي تىركەلگەن الدەبىر پارتياعا كىرۋ قاجەت. جەكەلەگەن كانديداتتار سايلانۋ قۇقىعىنان قاعىلعان. تاۋەلسىز ساراپشىلار پارتيالىق تىزىممەن سايلاۋدى ادىلەتسىز، شىنايى وپپونەت پارتيانىڭ جوقتىعىن، ولاردىڭ «بيلىكشىل» ەكەنىن ايتىپ سىنايدى.

"The Qazaq Times"