جاڭا پارتيا قۇرۋعا نيەتتى نۇر وتان مۇشەسى دەپۋتاتتىق مانداتىنان ايىرىلدى

ۇكىمەت باسشىسىنان جاۋاپ تالاپ ەتكەن جانە وتكەن جۇمادا جاڭا پارتيا قۇراتىنىن مالىمدەگەن ءنۇرجان التاەۆ بيلىك پارتياسى «نۇر وتان» قۇرامىنان شىعارىلىپ، دەپۋتاتتىق مانداتىنان ايىرىلدى.

بۇگىن 2 جەلتوقساندا ورتالىق سايلاۋ كوميسسياسى بۇل تۋرالى ارنايى قاۋلىسىن جاريالادى. سونىمەن قوسا، ءماجىلىس دەپۋتاتى، «نۇر وتاننىڭ» پارتيالىق باقىلاۋ كوميتەتىنىڭ جەتەكشىسى پاۆەل كازانتسەۆ Facebook جەلىسىندەگى پاراقشاسىندا ونىڭ «پارتيا بەدەلىنە نۇقسان كەلتىرگەنى ءۇشىن» ساياسي ۇيىمنان شىعارىلعانىن جازدى.

27 قاراشادا نۇرجان التاەۆ پارلامەنتتە «نۇر وتانعا» بالاما پىكىر ايتا الاتىن «شىنايى» وپپوزيتسيالىق پارتيا جوعىن ايتىپ، «ەل تىرەگى» اتتى جاڭا ساياسي پارتيا قۇراتىنىن ايتقان. الايدا ول الداعى 10 قاڭتارعا بەلگىلەنگەن سايلاۋعا ۇلگەرمەيتىن بولعاندىقتان، سەگىزىنشى سايلانىمعا قاتىسۋعا نيەتتى ەكەنىن حابارلاعان.

بۇعان دەيىن نۇرجان التاەۆ پرەمەر-مينيستر اسقار ءماميندى سىنعا العان. ول ۇكىمەت باسشىسىنا جولداعان حاتىندا بىلاي دەگەن ەدى:

«قۇرمەتتى اسقار ۇزاقبايۇلى، مەن ءسىزدى پارلامەنتكە كەلىپ، حالىق الدىندا جانە حالىق وكىلدەرى الدىندا كوروناۆيرۋسپەن كۇرەستە اتقارىلعان جۇمىسقا ەسەپ بەرۋىڭىزدى سۇرايمىن. قىرۋار قارجىنىڭ قالاي يگەرىلگەنىن، كوروناۆيرۋس قۇرباندارىنىڭ سانى مەن اۋىر جاعدايدىڭ سەبەبىن ايتىپ بەرسەڭىز. ايتپەسە، دەنساۋلىق ساقتاۋ ءمينيسترىن الىپ تاستادى دا، سونىمەن ءبارى تىنىشتالىپ قالدى. ال بولعان جاعدايعا كىم جاۋاپ بەرەدى؟» دەگەنمەن ءماجىلىس دەپۋتاتىنىڭ بۇل ساۋالىنا اسقار ۇزاقبايۇلى جاۋاپ بەرمەدى.

قازاقستاندا رەسمي تىركەلگەن التى ساياسي پارتيا بار. قازىر پارلامەنتتەگى نەگىزگى ورىندى ەكس-پرەزيدەنت نازارباەۆ باسقاراتىن «نۇر وتان» پارتياسى يەلەنىپ وتىر.

قازاقستاننىڭ جانە حالىقارالىق قۇقىق قورعاۋشىلارى مەن وپپوزيتسيالىق كۇشتەر ەلدەگى ساياسي ەركىندىكتىڭ جوقتىعىن، پارتيا قۇرۋدىڭ قيىندىعىن، ازاماتتىق قۇقىقتىڭ شەكتەلەتىنىن ءجيى سىنايدى.

"The Qazaq Times"