اۋعانستانداعى بەيبىت كەلىسسوزدەر داعدارىستا: قارۋلى شابۋىلدار جيىلەدى

اۋعانستاننىڭ گازني پروۆينتسياسىنداعى اسكەري بازاعا جاسالعان لاڭكەستىك شابۋىلدان كەمىندە 31 ادام قازا تاۋىپ، 24 ادام جاراقات الدى. اۋعانستان قارۋلى كۇشتەرىنە جاسالعان شابۋىل ەلدەگى ىشكى ديالوگتىڭ داعدارىسىن كورسەتتى.

گازگيداعى اسكەري بازا اۋعان ۇكىمەتىنىڭ ارنايى جاساعىنا قاراستى بازا. كۋاگەرلەردىڭ اقپارات قۇرالدارىنا بەرگەن مالىمەتىنە قاراعاندا جويقىن جارىلىس بومپا تيەلگەن كولىك ارقىلى جاسالعان.  جەرگىلىكتى رەسميلەردىڭ مالىمەتىنە قاراعاندا وسىمەن ءبىر ۋاقىتتا زابۋل پروۆينتسياسىندا دا جارىلىس بولىپ 3 ادام قازا تاۋىپ، 20-دان استام ادام جاراقات العان. زابۋلداعى شابۋىل اسسامبلەيا توراعاسىنا باعىتتالعانى تۋرالى مالىمەتتەر بار.

قازىرگە دەيىن ءبىر دە ءبىر ۇيىم اتالعان ەكى شابۋىلدى ءوز موينىنا العان جوق. دەگەنمەن، شابۋىل اۋعانستاننىڭ رەسمي بيلىگى مەن تاليبان اراسىنداعى كەلىسسوزدەردىڭ داعدارىسى كەزىندە جاسالدى. تاليبان وكىلى دە مالىمدەمەسىندە اتالعان شابۋىلعا قاتىستى مالىمەت بەرمەگەن.

قازىر اۋعانستانداعى رەسمي بيلىك پەن تالىپتەر اراسىندا كەلىسسوزدەر توقتاپ تۇر. ارا اعايىندىق جاساپ وتىرعان كاتار تارابى دا تاراپتاردىڭ ديالوگى ەڭ ماڭىزدى كەزەڭدە ءۇزىلىپ قالعانىنا الاڭداۋلى. تاراپتاردىڭ كەلىسسوزدەرى توقتاعان تۇستا ەلدەگى زورلىق-زومبىلىق اكتلەرى كوبەيدى. ءبىر عانا قاراشا ايىنىڭ وزىندە ونداعان قاۋىپسىزدىك قىزمەتكەرلەرى مەن بەيبىت تۇرعىن قازا تاپتى. جاراقات العاندار سانى جۇزدەپ سانالۋدا.

بەيبىتشىلىك ماقساتىنداعى كەلىسسوزدەرگە قاراماستان تالىپتەر مەن رەسمي ۇكىمەت اراسىندا ەلدەگى پروۆينتسيالارعا دەگەن قارۋلى تالاس ءالى ءجۇرىپ جاتىر.

“The Qazaq Times”