اقمولا وبلىسىنىڭ اكىمى ەرمەك مارجىقپاەۆ. فوتو: وكق

اقمولا وبلىسىندا سانيتارلىق-ەپيدەميا قىزمەتىندە مامان جەتىسپەۋشىلىگى سەبەپتى اۋىرعاندار رەسمي ستاتيستيكاعا ەنبەي قالعان.

اقمولا وبلىسىنىڭ اكىمى ەرمەك مارجىقپاەۆ بۇگىن ورتكومدا وتكەن بريفينگتە ۆيرۋس جۇققانى انىقتالعان 100 ادامنىڭ مالىمەتى جالپى ەسەپكە دەر كەزىندە كىرمەي قالعانىن مويىندادى.

 «وبلىستىق شتاتا نەبارى 12 مامان بولعاندىقتان، 100 جاعداي ءوز ۋاقىتىنان كەشىگىپ راسىمدەلدى»، – دەپ اقتالدى مارجىقپاەۆ.

ونىڭ ايتۋىنشا، اۋرۋشاڭدىق ارتىپ، ناۋقاستار كوبەيگەن كەزدە جاۋاپتى قىزمەتكەرلەر بارلىق اقپاراتتى وڭدەپ-قۇجاتتاندىرىپ ۇلگەرمەيدى.

«ءبىز قازىرگى تاڭدا ستاتيستيكا دۇرىس ءارى سەنىمدى بولۋى ءۇشىن قولدان كەلگەننىڭ ءبارىن ىستەپ جاتىرمىز. ۋاقتىلى ەنگىزىلمەگەن مالىمەتتەر بۇگىن جالپى ەسەپكە قوسىلعان. ستاتيستيكا قالپىنا كەلتىرىلدى»، – دەدى اكىم.

ايماق باسشىسىنىڭ سوزىنە سەنسەك، وبلىستا كوروناۆيرۋسپەن كۇرەسكە شامامەن 16 ملرد تەڭگە باعىتتالعان. اقمولا وبلىسىندا 200 ورىندىق جاڭا جۇقپالى اۋرۋلار اۋرۋحاناسى سالىنىپ، 4 مىڭنان استام مەديتسينا قىزمەتكەرىنە ۇستەماقى رەتىندە 3 ملرد تەڭگە تولەنگەن.

16 قاراشا كۇنى پرەزيدەنت توقاەۆ «بىرقاتار وبلىستاردا  كوروناۆيرۋس ىندەتىنە قاتىستى جاڭا جاعدايلاردى جاسىرۋ دەرەكتەرى انىقتالعانىن» مالىمدەگەن. پرەزيدەنتتىڭ ايتۋىنشا، ستاتيستيكانى بۇرمالاۋ فاكتىسىنىڭ شقو، سقو، پاۆلودار،  اقمولا،  قوستاناي وبلىستارىندا تىركەلگەن، ءتىپتى «اتالعان پروبلەمانىڭ ءبىزدىڭ دەنساۋلىق ساقتاۋ جۇيەمىزدە دە سوزىلمالى سيپات العانىن مويىنداۋ كەرەك».

كوميتەت توراعاسى ايجان ەسماعامبەتوۆانىڭ رەداكتسياعا بەرگەن پىكىرىنە قاراعاندا، كادر تاپشىلىعىنان جۇكتەمە اۋىرلاپ، دەرەك دەر كەزىندە وڭدەلىپ-جولدانباعان. اۋرۋحانالاردا ناۋقاستار ارتقان تۇستا ۆيرۋس انىقتالعانداردىڭ مالىمەتىن ۇسىنۋ پروتسەسى كەشىكتىرىلگەن. سول سەبەپتى رەسمي ستاتيستيكاعا ۋاقتىلى تىركەلمەگەن جاعدايلاردىڭ كوبەيگەن كورىنەدى.

ءدال وسىعان ۇقساس جاعداي – پاۆلودار وبلىسىندا 59, قوستاناي وبلىسىندا 57 ناۋقاستىڭ مالىمەتى جالپى ەسەپكە كەشىگىپ ەنگىزىلگەن.

بۇعان دەيىن دەنساۋلىق ساقتاۋ مينيسترىلىگى كۇزگى-قىسقى تولقىنعا «تاس-ءتۇيىن»، ءتىپتى 100% پايىز دايىن ەكەنىن ءبىر ەمەس، بىرنەشە رەت مالىمدەگەن. بىراق بۇگىنگى تاڭدا تەست قورىتىندىسى داۋعا اينالىپ، ونى دەرەكقورعا تىركەۋ مەحانيزمىندە اقاۋ تۋعانى بەلگىلى بولىپ وتىر. رەسمي ەسەپتە پاندەميا باستالعالى بەرى 171 مىڭداي ادامنىڭ اۋىرعانى كورسەتىلگەنىمەن، كۇمانمەن قارايتىندار كوپ. «ساندج» زەرتتەۋ ورتالىعى قازاقستاندا كوروناۆيرۋسقا شالدىققانداردىڭ شىنايى ەسەبىن انىقتاۋ ماقساتىندا 9 مىڭنان استام رەسپوندەنتتەن ساۋالناما جۇرگىزگەن. ستاتيستيكا مەتودولوگياسىنىڭ كاسىبي شارتتارىن قاناعاتتاندىراتىن زەرتتەۋ قورىتىندىسىنا سايكەس، پاندەميا باستالعالى ناۋرىز-قىركۇيەك ايلارىنىڭ ارالىعىندا حالىقتىڭ 20%-ى نەمەسە 3,8 ميلليون ادام ۆيرۋس جۇقتىرعانى بەلگىلى بولعان. بۇل رەسمي ەسەپتەن 37 ەسە كوپ.

"The Qazaq Times"