«ساياسي استارى بار»: بايدەننىڭ جەڭىسىن مويىنداماعان ساناۋلى پرەزيدەنتتەردىڭ ءبىرى

اقش-تا وتكەن پرەزيدەنت سايلاۋىندا باسىم تۇسكەن دەموكراتيالىق پارتيا وكىلى دجوزەف بايدەندى پرەزيدەنت رەتىندە مويىنداماعان سانالۋى پرەزيدەنتتەر بار. سولاردىڭ ءبىرى – رەسەي پرەزيدەنتى ۆلاديمير پۋتين.  

جەرگىلىكتى تەلەارنالاردىڭ بىرىندە پۋتين: «ءبىز امەريكالىقتاردىڭ سەنىمىنە يە بولاتىن كەز كەلگەن اداممەن جۇمىس ىستەيمىز. بىراق بۇل سەنىم كىمگە بەرىلدى، ءالى دە بەلگىسىز قالىپ تۇر. تاراپتاردىڭ ءبىرى ەكىنشىسىنىڭ جەڭىسىن مويىنداعان كەزدە نەمەسە سايلاۋدىڭ تۇپكىلىكتى ناتيجەلەرى زاڭدى تۇردە جاريالانعان كەزدە عانا بەلگىلى بولادى. بۇل جەردە ءبىز ءۇشىن ەشقانداي ماسەلە جوق. باستىسى، كەز كەلگەن دۇنيەەنىڭ زاڭدى تۇردە بولۋى»، – دەپ مالىمدەدى.

امەريكادا وتكەن بيىلعى سايلاۋدى 2016 جىلعى وقيعالارمەن سالىستىرعان پۋتين: «ايىرماشىلىق ايقىن. كورىپ وتىرعانىڭىزداي، قازىرگى پرەزيدەنت جاريالاعان بەلگىلى ءبىر زاڭدى راسىمدەر بولۋى ءتيىس. سوندىقتان ءبىز رەسمي حابارلاندىرۋدى كۇتۋ دۇرىس دەپ سانايمىز»، – دەدى.

13 قاراشادا قىتاي ۇزاق ۇنسىزدىكتەن كەيىن دجو بايدەنگە قۇتتىقتاۋ حاتىن جولدادى. ال ۆلاديمير پۋتين بايدەندى ازىرگە جەڭىمپاز دەپ تانۋدان باس تارتتى.

2016 جىلى اقش پرەزيدەنتى بولىپ دونالد ترامپ سايلانعاننان كەيىن ۆلاديمير پۋتين كانديداتتى قۇتتىقتاعان العاشقى كوشباسشىلاردىڭ ءبىرى بولدى.

9 قاراشادا ءپۋتيننىڭ وكىلى دميتري پەسكوۆ قۇتتىقتاۋلار سايلاۋ قورىتىندىلارى رەسمي جاريالانعاننان كەيىن جولداناتىنىن ايتقان.

اقش-تا پرەزيدەنت سايلاۋى 3 قاراشادا ءوتتى. ترامپتىڭ قارسىلاسى دەموكرات دجوزەف بايدەن 270-تەن استام داۋىس جيناپ، سايلاۋداعى جەڭىسىن جاريالادى. رەسپۋبليكالىق پارتيا وكىلدەرى مەن ترامپ بايدەننىڭ جەڭگەنىن مويىندامادى جانە سايلاۋشىلاردىڭ داۋىستارىن ساناۋعا قاتىستى سوتتارعا جۇگىنۋگە نيەت ءبىلدىردى. سەبەبى ولار «سايلاۋدا زاڭ بۇزۋشىلىقتار بولدى جانە بايدەننىڭ جەڭىسكە جەتۋى ءۇشىن سىرتقى فاكتورلار ىقپال ەتتى»، – دەپ سانايدى. كەيىننەن دونالد ترامپتىڭ كومانداسى دەموكراتتار باسىم بولعان جەرلەردە بەرىلگەن سايلاۋدى نەمەسە بيۋللەتەندەردىڭ ءبىر بولىگىن جارامسىز دەپ تانۋدى تالاپ ەتىپ، سوتقا جۇگىنگەن.

كەي ساراپشىلار ءپۋتيننىڭ بايدەندى قۇتتىقتاماۋىنىڭ «ساياسي استارى بار» دەپ سانايدى. سەبەبى دەموكرات دجو بايدەن پرەزيدەنت بولعان جاعدايدا، قىتايمەن تىعىز بايلانىس ورناتىپ، رەسەيدى سانكتسيا قىسپاعىنا الۋى مۇمكىن. ال رەسپۋبليكالىق پارتيا وكىلى دونالد ترامپ بيلىكتەگى 4 جىل ىشىندە بىرنەشە مارتە قىتايعا قارسى سانكتسيالار ەنگىزگەن.

"The Qazaq Times"