SS كارل ۆينسون. فوتو: The Wall Street Journal

اقش قارۋلى كۇشتەرى حابارلاما جاريالاپ، USS Carl Vinson اۆيا-تاسىمال كەمەسىن اۆسترالياداعى پورتقا ورنالاستىرۋ جوسپارىن كۇشىنەن قالدىرىپ، الىپ اۆياماتكاسىن (اۆيانوسەتس) كورەي تۇبەگىنە اكەلەتىندىكتەرىن جاريا ەتتى. اقش ارمياسى ونىڭ سەبەبىن سولتۇستىك كورەيانىڭ جاڭا يادرولىق سىناعىنان الاڭداۋدان قابىلداعان شەشىم دەپ كورسەتتى. بۇل تۋرالى «The Wall Street Journal» باسىلىمى حابارلايدى.

ەكى ەل باسشىلارىنىڭ كەزدەسۋىندە كەلىسىمگە جەتە الماعان ماسەلەنىڭ ءبىرى رەتىندە، سولتۇستىك كورەيا ىسىندە اقش پرەزيدەنتى: «ەگەر قىتاي دەگەنىمىزگە كونبەسە، وندا جەدەل اسكەري ارەكەت جاساۋعا شەشىم قابىلدايمىز»، – دەگەن بولاتىن. اۋىر اسكەري تەحنيكاسىن سولتۇستىك شىعىس ازياعا كوپتەپ اكەلۋى اقش ۇكىمەتىنىڭ وسى وڭىرگە قاراتقان بىردەن ءبىر پوزيتسياسى بولىپ تابىلادى.

اقش اسكەري كۇشتەرى سپۋتنيكتىك باقىلاۋ ارقىلى سولتۇستىك كورەيانى جاڭا يادرولىق سىناققا دايىندالىپ جاتقان بولۋى مۇمكىن دەگەندى العا تارتادى. اتالعان ەل ءۇشىن الداعى ەڭ ماڭىزدى مەرەكە – 15 ساۋىردەگى سولتۇستىك كورەيا جوعارى كوشباسشىسىنىڭ تۋىلعان كۇنى. جاڭا سىناقتى وسى اتاۋلى كۇنگە تۋرالاۋى مۇمكىن.

5 ساۋىردە اتىلعان «Scud» زىمىرانىن قامتىعاندا، وتكەن ءبىر ايدا سولتۇستىك كورەيا ءۇش بالليستيكالىق زىمىران سىناعىن جاساپ ۇلگەردى. اقش اۋىر اسكەري تەحنيكالاردىڭ قوزعالىسى وسىنىڭ جاۋابى دەپ وتىر. اقش مەملەكەتتىك حاتشىسى تيللەرسون سول ۋاقىتتا قىسقا عانا مالىمدەمە جاساپ: «اقش سولتۇستىك كورەياعا جاساعان ەسكەرتۋى جەتكىلىكتى، ەندى ەشقانداي قوسىمشا مالىمدەمەلەر جاريالاۋدىڭ كەرەگى جوق»، – دەدى. ال  «The Wall Street Journal» باسىلىمىنىڭ ايتۋىنشا، اق ءۇي رەسمي وكىلدەرىنىڭ ءبىرى سوزىندە: "اقش تەڭىز ارمياسىنىڭ قۋاتى الداعى ۋاقىتتا سولتۇستىك شىعىس ازيادا سىناقتان وتەتىن بولادى", – دەگەن ەكەن.

بۇنىڭ ءبارى اقش ۇكىمەتىنىڭ سولتۇستىك كورەيا ءۇشىن رەسمي ارەكەتتى باستاعانىن تۇسىندىرەدى. سولتۇستىك كورەيا يادرولىق سىناق جاساۋ نيەتىنەن قايتپاسا، ەكىنشى ءسۇريا بولۋى دا عاجاپ ەمەس.

“The qazaq Times”