قىرعىزستاندا ءارتۇرلى تالاپپەن التى پيكەت ءوتتى

بىشكەكتىڭ ورتالىعىندا قىرعىزستان بيلىگىنە قويىلاتىن ءتۇرلى تالاپتارى بار التى ءتۇرلى پيكەت ءوتتى. ورتالىق الاڭدا شامامەن 50 ادامنان تۇراتىن ءۇش توپ جينالعان.

نارازى توپتاردىڭ ءبىرى «سەۆەرەلەكترو»اق-نىڭ جۇمىستان بوساتىلعان باس ديرەكتورى دوسكۋل بەكمۋرزاەۆتى قايتادان قىزمەتكە الۋدى ال، ءبىر توپ ۇلتتىق بانك توراعاسى تولقىنبەك ابدىعۇلوۆتان حالىققا بۇرىن بەرىلگەن نەسيەلەردى ەسەپتەن شىعارۋدى تالاپ ەتتى.

سونىمەن قاتار پارلامەنت عيماراتىنىڭ جانىندا ورنالاسقان الا-توو الاڭىندا ورتالىق ازياداعى ەڭ ءىرى بازاردىڭ ءبىرى «دوردوي» جۇمىسشىلارى ميتينگ ۇيىمداستىردى. ولار قىتايدىڭ قىرعىزستان شەكاراسىندا ورنالاسقان وتكىزۋ پۋنكتتەرىن اشۋدى سۇرادى. سەبەبى ولاردىڭ جۇمىسى كوروناۆيرۋس پاندەمياسىنا بايلانىستى توقتاتىلعان. ولاردىڭ جانىندا ءبىر توپ پيكەتشى ايەلدەر رەسپۋبليكانىڭ ەكس-پرەزيدەنتى المازبەك اتامباەۆتى ساياسي قۋدالاۋدى توقتاتۋدى تالاپ ەتتى.

قىرعىزستاندا ساياسي داعدارىس قازاننىڭ باسىنان بەرى بىرنەشە كۇنگە سوزىلدى. 6 قازانعا قاراعان ءتۇنى پارلامەنت قۇرامىنا ەنگىزىلمەگەن پارتيالاردىڭ جاقتاستارى سايلاۋ قورىتىندىلارى بويىنشا جاپپاي نارازىلىق شەرۋلەرىن ۇيىمداستىرىپ، اق ۇيگە باسىپ كىردى. كەيىننەن وسك داۋىس بەرۋ ناتيجەلەرىن جارامسىز دەپ تانىدى. ەل پرەزيدەنتى سوورونباي جەەنبەكوۆ، پرەمەر-مينيستر كۋباتبەك بورونوۆ جانە پارلامەنت سپيكەرى داستان جۇمابەكوۆ وتستاۆكاعا كەتتى. جاڭا پرەمەر بولىپ سادىر جاپاروۆ سايلاندى. قازىر ول پرەزيدەنتتىڭ مىندەتىن اتقارۋشى.

قىرعىزستانداعى مەملەكەت باسشىسىنىڭ مەرزىمىنەن بۇرىن سايلاۋى كەلەسى جىلدىڭ 10 قاڭتارىنا جوسپارلانعان. دەپۋتاتتاردىڭ شەشىمىنە سايكەس قايتا پارلامەنتتىك سايلاۋ «كەلەسى جىلدىڭ 1 ماۋسىمىنان كەشىكتىرىلمەي» وتكىزىلۋى ءتيىس.

"The Qazaq Times"