ۋكراينا سوتى زەلەنسكيدىڭ ۇسىنىسىنا دەمارش جاريالادى

ۋكراينا كونستيتۋتسيالىق سوتى پرەزيدەنت زەلەنسكيدىڭ ەلدەگى ساياسي جاعدايدىڭ شيەلەنىسۋىنە اكەلىپ سوقتىرعان «سىبايلاس جەمقورلىقتىڭ الدىن الۋ تۋرالى» زاڭ نورمالارىنىڭ ءبىر بولىگىن الىپ تاستاۋ تۋرالى شەشىمىنە دەمارش جاريالادى. مۇنى زەلەنسكي «وليگارحتاردىڭ قاستاندىعى» دەپ قاتاڭ سىنعا الدى.

ەل پرەزيدەنتى ءوزىنىڭ Telegram كانالىندا: «كونستيتۋتسيالىق سوتتىڭ دەمارشاسى – ەسكى ەليتالار مەن وليگارحتاردىڭ پرەزيدەنتكە جانە ەلگە قارسى جاساعان قاستاندىعىنىڭ قوعامدىق كورىنىسى. باسقا جول جوق. بۇل – حالىققا قارسى تۇرۋ. سەبەبى ءالسىز پرەزيدەنت پەن ءالسىز مەملەكەت – ولاردىڭ سىبايلاس جەمقورلىققا قۇرىلعان ءومىر سالتىن ساقتاۋدىڭ كەپىلى» ، – دەپ جازدى.

27 قازاندا ۋكراينانىڭ كونستيتۋتسيالىق سوتى «سىبايلاس جەمقورلىقتىڭ الدىن الۋ تۋرالى» زاڭ نورمالارىنىڭ ەداۋىر بولىگىن، اتاپ ايتقاندا شەنەۋنىكتەردىڭ ەلەكتروندىق دەكلاراتسيالاردى جاريالاۋ جانە ولاردى تەكسەرۋ قاجەتتىلىگىن ەلدىڭ نەگىزگى زاڭىنا سايكەس ەمەس دەپ تانىدى.

29 قازاندا ۇلتتىق قاۋىپسىزدىك جانە قورعانىس كەڭەسىنىڭ شۇعىل وتىرىسىندا زەلەنسكي «كيەۆ سىبايلاس جەمقورلىققا قارسى زاڭناما تۋرالى سوت شەشىمىنە بايلانىستى باتىس سەرىكتەستەرىنىڭ قارجىلىق قولداۋىن جوعالتادى» – دەپ مالىمدەدى.

ۋكراينا پرەزيدەنتىنىڭ ەل پارلامەنتىنە ۇسىنعان زاڭ جوباسىندا كونستيتۋتسيالىق سوت سۋديالارىنىڭ وكىلەتتىكتەرىن توقتاتۋدى، ونىڭ دەكلاراتسيالاۋ تۋرالى شەشىمىن جارامسىز دەپ تانۋدى جانە «سىبايلاس جەمقورلىقتىڭ الدىن الۋ تۋرالى» زاڭعا ءتيىستى وزگەرىستەردى جويۋ قاراستىرىلعان.

ەۋروپا كەڭەسىنىڭ ۆەنەتسيالىق كوميسسياسى رادا سپيكەرى دميتري رازۋمكوۆقا حات جىبەرىپ، زەلەنسكيدىڭ ۇسىنىسىنا الاڭداۋشىلىق بىلدىرەتىنىن ايتتى. كوميسسيا سپيكەردى «كونستيتۋتسيالىق سۋديالاردىڭ وتستاۆكاعا كەتۋى تۋرالى شەشىمنىڭ ەل ءۇشىن سالدارىن قاراۋعا» جانە قالىپتاسقان جاعدايدى رەتتەۋدىڭ «ىقتيمال بالاما جولدارىن زەرتتەۋگە» شاقىردى.

"The Qazaq Times"