فوتو: Deutche Welle

الەمدە كوروناۆيرۋس جۇقتىرعاندار سانى 44 ميلليونعا جۋىقتادى. دەنساۋلىق ساقتاۋ ۇيىمى ىندەتتىڭ ەكىنشى تولقىنى تەز تارالىپ جاتىر دەپ دابىل قاقتى. بار-جوعى ءبىر اپتادا ۆيرۋس 2 ميلليون 40 مىڭ ادامنان انىقتالىپ، جۇقتىرعاندار سانى 16%-عا اسقان.

دەرتكە شالدىققاندار سانى قايتا ارتقان مەملەكەتتەر توتەنشە جاعداي ەنگىزىپ، كارانتين شارالارىن قاتاڭداتا باستاعان. اسىرەسە، اقش پەن ەۋروپادا ۆيرۋستان تونگەن قاۋىپ ارتقان. وسىعان بايلانىستى دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا ايماعى بويىنشا بيۋرو ديرەكتورى حانس كليۋگە ەۋروپا ەلدەرىندە قابىلدانىپ جاتقان شەكتەۋ شارالارىن ماقۇلدادى.

اقش-تىڭ كەي وڭىرلەرىندە كومەندانتتىق ساعات ەنگىزىلدى. سونىمەن قاتار دەمالۋعا ارنالعان ساياباقتار مەن قوعامدىق ورىندار ەكى اپتاعا جابىلدى. مۇندا 9 ميلليونعا جۋىق كەيس تىركەلگەن. كارانتين تالاپتارى ايتارلىقتاي كۇشەيتىلمەسە دە، 3 قاراشادا وتەتىن پرەزيدەنتتىك سايلاۋعا پوشتا ارقىلى داۋىس بەرۋ ەنگىزىلگەن. جاقىندا اق ءۇي باسشىسى دونالد ترامپ تا وتباسىمەن كوروناۆيرۋس جۇقتىرعان بولاتىن.

ۆيرۋس جۇقتىرۋ دەرەگى بويىنشا انتيرەكوردتىزىمىندە كوش باستاعان مملەكەتتەر قاتارىندا برازيليا، ءۇندىستان جانە مەكسيكا تۇر.

گەرمانيادا كوروناۆيرۋستى جۇقتىرۋ دەرەكتەرى كۇرت ءوستى. وسىعان بايلانىستى باۆاريا ءوڭىرىنىڭ ەكىنشى ايماعى لوكداۋن ەنگىزدى. اۋستريامەن شەكارالاس روتتال ين اۋدانىندا بارلىق مەكتەپتەر مەن بالاباقشالار جابىلدى. جەرگىلىكتى تۇرعىندارعا تەك دارىگەرگە قارالىپ، دۇكەنگە شىعۋعا رۇقسات. سونداي-اق سپورتپەن اينالىسىپ، ءۇي جانۋارلارىن سىرتقا شىعارا الادى.

وتكەن تاۋلىكتە گەرمانيادا 11 409 ناۋقاس انىقتالعان. الايدا وسى اپتادا اۋرۋدى جۇقتىرعانداردىڭ سانى كۇرت ارتۋ قاۋپى بار. ەكونوميكا ءمينيسترى پەتەر التمايەردىڭ بولجامىنشا، كۇنىنە 20 مىڭداي ادام ۆيرۋستى جۇقتىرۋى مۇمكىن. وسىعان بايلانىستى گەرمانيادا فەدەرالدىق وڭىرلەردىڭ باسشىلارى باس قوسىپ، ەكىنشى لوكداۋن ەنگىزۋ ماسەلەسىن قاراستىرماق. ساۋالناما ناتيجەلەرىنە قاراعاندا، ەل تۇرعىندارىنىڭ جارتىسى كارانتين شەكتەۋلەرىنىڭ كۇشەيتىلۋىن قولداپ وتىر.

فرانتسيادا وتكەن تاۋلىكتە 33 مىڭنان استام ادامعا COVID-19 دياگنوزى قويىلدى. قازىر كوپتەگەن اۋرۋحانالاردا ورىن تاپشى. جەرگىلىكتى بيلىك ەلدە 4 اپتاعا لوكداۋن ەنگىزۋدى جوسپارلاپ وتىر. ازىرگە جاڭا شەكتەۋ شارالارى سەناتتىڭ قاراۋىندا. داۋىس بەرۋ اياقتالعاننان كەيىن پرەزيدەنت ەممانۋەل ماكرون بۇگىن كەشكىسىن جاڭا كارانتين تالاپتارىن تەلەۇندەۋ ارقىلى جاريا ەتپەك.

بىرىككەن كورولدىكتە دە ۆيرۋس جۇقتىرعاندار سانىنىڭ وسۋىنە بايلانىستى كارانتين شارالارى قاتاڭداتىلدى. لوندوندا شەكتەۋدىڭ ەكىنشى دەڭگەيى ەنگىزىلدى. جاڭا تارتىپكە ساي ءبىر ۇيدە تۇرمايتىن ادامداردىڭ كەزدەسۋىنە تىيىم سالىنادى; كوشەدە 6 ادامنان ارتىق جينالۋعا بولمايدى. بريتانيا بيلىگى قوعامدىق كولىكتەردىڭ ورنىنا ۆەلوسيپەد، ەلەكتروساموكاتتى پايدالانۋعا جانە الىس ساپارعا شىقپاۋعا كەڭەس بەردى.

بەلگيادا الەم بويىنشا وڭىردە جان باسىنا شاققانداعى ءولىم-ءجىتىمنىڭ ەڭ جوعارى كورسەتكىشى تىركەلگەن. وسىعان وراي بيلىك ايماقتاعى بارلىق جوعارعى وقۋ ورنىن، مادەني جانە ءدىني عيماراتتاردىڭ جۇمىسىن ۋاقىتشا توقتاتتى.

نورۆەگيا مەن سلوۆاكيادا ىندەتتىڭ ۋشىعۋىنا بايلانىستى شەكتەۋ شارالارى قاتاڭداتىلدى. ەندى نورۆەگيادا ءبىر نىساننىڭ ىشىندە 50-دەن استام ادامنىڭ جينالۋىنا تىيىم سالىنادى. ۇيگە 5 كىسىدەن كوپ قوناق شاقىرۋعا بولمايدى. سونىمەن قاتار 31 قازاننان باستاپ ەلگە كەلگەن شەتەلدىك جۇمىسشىلار ون كۇندىك كارانتينگە جاتقىزىلاتىن بولدى. ال سلوۆاكيادا 31 قازان مەن 1 قاراشا ارالىعىندا كوروناۆيرۋسقا جالپىۇلتتىق تەستىلەۋ وتكىزىلەدى.

يتاليادا جەرگىلىكتى بيلىكتىڭ شەكتەۋ شارالارىن قاتاڭداتۋ تۋرالى ەرەجەسىنە قارسى جەرگىلىكتى تۇرعىندار نارازىلىققا شىقتى. تۋرين قالاسىندا جينالعان جۇرت ۇكىمەتتەن بارلار مەن مەيرامحانالاردىڭ جۇمىسىن جالعاستىرۋىن تالاپ ەتتى. نارازىلىق اكتسيا تارتىپسىزدىككە ۇلاستى. اشۋعا بوي الدىرعانداردى پوليتسيا كوز جاساۋراتاتىن گازبەن تارقاتپاق بولعان. قازىر ەلدە 565 مىڭعا جۋىق كەيس تىركەلگەن.

رەسەيدە وتكەن تاۋلىكتە 17 347 ادامنان كوروناۆيرۋس ينفەكتسياسى انىقتالعان. بۇل – ىندەت باستالعالى بەرى ءبىر كۇن ىشىندە تىركەلگەن ەڭ جوعارى كورسەتكىش. ەندى رەسەيلىكتەر قوعامدىق كولىكتە، تاكسي، جەدەلساتى، ساياباق پەن وزگە دە حالىق كوپ جينالاتىن جەردە تاعۋى مىندەتتى. ال كافە، مەيرامحانا مەن وزگە دە ويىن-ساۋىق مەكەمەلەر تۇنگى 11-دەن تاڭعى 6-عا دەيىن جۇمىس ىستەمەيدى. جاڭا ەرەجە ەرتەڭنەن باستاپ كۇشىنە ەنبەك.

يران كوروناۆيرۋس ىندەتىنە بايلانىستى قابىلدانعان شەكتەۋلەردىڭ مەرزىمىن قاراشانىڭ جيىرماسىنا دەيىن ۇزارتتى. تەھراندا مەكتەپتەر، مەشىتتەر، دۇكەندەر مەن مەيرامحانالاردى جۇمىسى توقتاتىلدى. ىندەتتىڭ ورشۋىنە بايلانىستى كەيبىر وڭىرلەردە اۋرۋحانالاردا ورىن جەتىسپەيدى. ەل اۋماعىندا ءار ءتورت مينۋت سايىن وسى دەرتتەن ءولىم تىركەلىپ جاتىر. دەنساۋلىق ساقتاۋ مينيسترلىگىنىڭ وكىلدەرى ەگەر حالىق سانيتارلىق قاۋىپسىزدىك شارالارىن ساقتاماسا، كۇن سايىنعى ولىمدەر سانى 600-گە دەيىن ءوسۋى مۇمكىن دەپ ەسكەرتتى.

كەشە قازاقستاندا كوروناۆيرۋس پەن پنەۆمنونيادان 6 ادام قايتىس بولعان. 422 ادامنىڭ كوروناۆيرۋس ينفەكتسياسىن جۇقتىرعانى انىقتالدى. ونىڭ باسىم بولىگى (274) – Covid تەستى تەرىس ناتيجە بەرگەن، بىراق اۋرۋ بەلگىلەرى بويىنشا كوروناۆيرۋسقا ۇقسايتىن پنەۆمونياعا (U07.02) شالدىققاندار.

كوروناۆيرۋسپەن كۇرەس بويىنشا قۇرىلعان ۇكىمەتارالىق كوميسسيا 26 قازاندا جيىن وتكىزىپ، 2-توقساننان باستاپ كەيبىر مەكتەپتەردە وقۋشىلار سىنىپتان وقيتىنىن مالىمدەدى. سونىمەن قاتار 2 قاراشادان باستاپ تەاترلار مەن مەشىتتەر كەلۋشىلەردى قابىلداي باستايدى. تەاتر زالىندا كورەرمەندەر سانى جۇزدەن اسپاۋى ءتيىس. ال مەشىتتەر 100 ادامعا دەيىن كىرگىزىپ، بەس ۋاقىت ناماز وقۋعا رۇقسات الدى. بىراق جۇما نامازعا ءالى رۇقسات ەتىلمەيدى.

قازاقستان بيلىگى 1 تامىزدان بەرى كوروناۆيرۋس پنەۆمونياسىنا ارنايى كود بەرىپ، ەسەبىن بولەك جاريالاپ كەلەدى. مىسالى، بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. سول سەبەپتى جەرگىلىكتى ساراپشىلار اراسىندا رەسمي دەرەككە كۇمان كەلتىرىپ، اۋرۋعا شالدىققاندار مەن ودان قايتىس بولعاندار سانى رەسمي كورسەتكىشتەن جوعارى دەيتىندەر بار.

"The Qazaq Times"