Foto: Deutche Welle

Älemde koronavirus jwqtırğandar sanı 44 millionğa juıqtadı. Densaulıq saqtau wyımı indettiñ ekinşi tolqını tez taralıp jatır dep dabıl qaqtı. Bar-joğı bir aptada virus 2 million 40 mıñ adamnan anıqtalıp, jwqtırğandar sanı 16%-ğa asqan.

Dertke şaldıqqandar sanı qayta artqan memleketter tötenşe jağday engizip, karantin şaraların qatañdata bastağan. Äsirese, AQŞ pen Europada virustan töngen qauip artqan. Osığan baylanıstı Düniejüzilik densaulıq saqtau wyımınıñ Europa aymağı boyınşa byuro direktorı Hans Klyuge Europa elderinde qabıldanıp jatqan şekteu şaraların maqwldadı.

AQŞ-tıñ key öñirlerinde komendanttıq sağat engizildi. Sonımen qatar demaluğa arnalğan sayabaqtar men qoğamdıq orındar eki aptağa jabıldı. Mwnda 9 millionğa juıq keys tirkelgen. Karantin talaptarı aytarlıqtay küşeytilmese de, 3 qaraşada ötetin prezidenttik saylauğa poşta arqılı dauıs beru engizilgen. Jaqında Aq üy basşısı Donal'd Tramp ta otbasımen koronavirus jwqtırğan bolatın.

Virus jwqtıru deregi boyınşa antirekordtiziminde köş bastağan mmleketter qatarında Braziliya, Ündistan jäne Meksika twr.

Germaniyada koronavirustı jwqtıru derekteri kürt östi. Osığan baylanıstı Bavariya öñiriniñ ekinşi aymağı lokdaun engizdi. Austriyamen şekaralas Rottal In audanında barlıq mektepter men balabaqşalar jabıldı. Jergilikti twrğındarğa tek därigerge qaralıp, dükenge şığuğa rwqsat. Sonday-aq sportpen aynalısıp, üy januarların sırtqa şığara aladı.

Ötken täulikte Germaniyada 11 409 nauqas anıqtalğan. Alayda osı aptada aurudı jwqtırğandardıñ sanı kürt artu qaupi bar. Ekonomika ministri Peter Al'tmayerdiñ boljamınşa, künine 20 mıñday adam virustı jwqtıruı mümkin. Osığan baylanıstı Germaniyada federaldıq öñirlerdiñ basşıları bas qosıp, ekinşi lokdaun engizu mäselesin qarastırmaq. Saualnama nätijelerine qarağanda, el twrğındarınıñ jartısı karantin şekteuleriniñ küşeytiluin qoldap otır.

Franciyada ötken täulikte 33 mıñnan astam adamğa COVID-19 diagnozı qoyıldı. Qazir köptegen auruhanalarda orın tapşı. Jergilikti bilik elde 4 aptağa lokdaun engizudi josparlap otır. Äzirge jaña şekteu şaraları Senattıñ qarauında. Dauıs beru ayaqtalğannan keyin prezident Emmanuel' Makron bügin keşkisin jaña karantin talaptarın teleündeu arqılı jariya etpek.

Birikken Korol'dikte de virus jwqtırğandar sanınıñ ösuine baylanıstı karantin şaraları qatañdatıldı. Londonda şekteudiñ ekinşi deñgeyi engizildi. Jaña tärtipke say bir üyde twrmaytın adamdardıñ kezdesuine tıyım salınadı; köşede 6 adamnan artıq jinaluğa bolmaydı. Britaniya biligi qoğamdıq kölikterdiñ ornına velosiped, elektrosamokattı paydalanuğa jäne alıs saparğa şıqpauğa keñes berdi.

Bel'giyada älem boyınşa öñirde jan basına şaqqandağı ölim-jitimniñ eñ joğarı körsetkişi tirkelgen. Osığan oray bilik aymaqtağı barlıq joğarğı oqu ornın, mädeni jäne dini ğimarattardıñ jwmısın uaqıtşa toqtattı.

Norvegiya men Slovakiyada indettiñ uşığuına baylanıstı şekteu şaraları qatañdatıldı. Endi Norvegiyada bir nısannıñ işinde 50-den astam adamnıñ jinaluına tıyım salınadı. Üyge 5 kisiden köp qonaq şaqıruğa bolmaydı. Sonımen qatar 31 qazannan bastap elge kelgen şeteldik jwmısşılar on kündik karantinge jatqızılatın boldı. Al Slovakiyada 31 qazan men 1 qaraşa aralığında koronavirusqa jalpıwlttıq testileu ötkiziledi.

Italiyada jergilikti biliktiñ şekteu şaraların qatañdatu turalı erejesine qarsı jergilikti twrğındar narazılıqqa şıqtı. Turin qalasında jinalğan jwrt Ükimetten barlar men meyramhanalardıñ jwmısın jalğastıruın talap etti. Narazılıq akciya tärtipsizdikke wlastı. Aşuğa boy aldırğandardı policiya köz jasauratatın gazben tarqatpaq bolğan. Qazir elde 565 mıñğa juıq keys tirkelgen.

Reseyde ötken täulikte 17 347 adamnan koronavirus infekciyası anıqtalğan. Bwl – indet bastalğalı beri bir kün işinde tirkelgen eñ joğarı körsetkiş. Endi reseylikter qoğamdıq kölikte, taksi, jedelsatı, sayabaq pen özge de halıq köp jinalatın jerde tağuı mindetti. Al kafe, meyramhana men özge de oyın-sauıq mekemeler tüngi 11-den tañğı 6-ğa deyin jwmıs istemeydi. Jaña ereje erteñnen bastap küşine enbek.

Iran koronavirus indetine baylanıstı qabıldanğan şekteulerdiñ merzimin qaraşanıñ jiırmasına deyin wzarttı. Tehranda mektepter, meşitter, dükender men meyramhanalardı jwmısı toqtatıldı. İndettiñ örşuine baylanıstı keybir öñirlerde auruhanalarda orın jetispeydi. El aumağında är tört minut sayın osı dertten ölim tirkelip jatır. Densaulıq saqtau ministrliginiñ ökilderi eger halıq sanitarlıq qauipsizdik şaraların saqtamasa, kün sayınğı ölimder sanı 600-ge deyin ösui mümkin dep eskertti.

Keşe Qazaqstanda koronavirus pen pnevmnoniyadan 6 adam qaytıs bolğan. 422 adamnıñ koronavirus infekciyasın jwqtırğanı anıqtaldı. Onıñ basım böligi (274) – Covid testi teris nätije bergen, biraq auru belgileri boyınşa koronavirusqa wqsaytın pnevmoniyağa (U07.02) şaldıqqandar.

Koronaviruspen küres boyınşa qwrılğan ükimetaralıq komissiya 26 qazanda jiın ötkizip, 2-toqsannan bastap keybir mektepterde oquşılar sınıptan oqitının mälimdedi. Sonımen qatar 2 qaraşadan bastap teatrlar men meşitter keluşilerdi qabılday bastaydı. Teatr zalında körermender sanı jüzden aspauı tiis. Al meşitter 100 adamğa deyin kirgizip, bes uaqıt namaz oquğa rwqsat aldı. Biraq jwma namazğa äli rwqsat etilmeydi.

Qazaqstan biligi 1 tamızdan beri koronavirus pnevmoniyasına arnayı kod berip, esebin bölek jariyalap keledi. Mısalı, boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Sol sebepti jergilikti sarapşılar arasında resmi derekke kümän keltirip, auruğa şaldıqqandar men odan qaytıs bolğandar sanı resmi körsetkişten joğarı deytinder bar.

"The Qazaq Times"