دونالد ترامپ جانە دجو بايدەن. فوتو: cnn.com

امەريكانىڭ اقاپارت قۇرالدارى پرەزيدەنتتىككە ۇمىتكەر دجو بايدەننىڭ جەمقورلىققا قاتىستى دەرەكتەرىن ادەيى جاريالاماي وتىر، – دەيدى اقش پرەزيدەنتى دونالد ترامپ.

ترامپتىڭ ايتۋىنشا، گازەت-جۋرنال، سايتتار كوروناۆيرۋسقا قاتىستى مالىمەتتەردى عانا شىعارىپ، بايدەننىڭ «بىلىقتارىن» جاسىرىپ وتىر. سونداي-اق باسىلىمدار اقش-تاعى ىندەت قۇرباندارىنىڭ سانىن اسىرعان كورىنەدى. «ويتكەنى كوروناۆيرۋسقا بايلانىستى ولىمدەر تۋرالى حابارلاسا، دارىگەرلەرگە كوبىرەك اقشا تولەيدى»، – دەيدى دونالد ترامپ.

بىرنەشە اپتا بۇرىن  «New York Post» گازەتىندە اقش-تىڭ بۇرىنعى ۆيتسە-پرەزيدەنتى جانە بيىلعى پرەزيدەنتتىك سايلاۋعا كانديدات دجوزەف (دجو) بايدەننىڭ ۇلى حانتەر بايدەن تۋرالى ماقالا شىقتى. ماتەريالدا بايدەن جانە ونىڭ ۇلىنا قاتىستى ايىپتاۋ حاتتارى مەن باسقا دا ماتەريالدار جاريالاندى. قاراشادا وتەتىن ءىرى ساياسي دوداعا ساناۋلى كۇندەر قالعاندا ءمالىم بولعان «قۇپيا حاتتاردان» كەيىن بايدەننىڭ رەيتينگىنە نۇقسان كەلگەن.

حانتەردىڭ نوۋتبۋگى 2019 جىلدىڭ ساۋىرىندە دەلاۆەردەگى جوندەۋ شەبەرحاناسىندا قالدىرىلعان. نوۋتبۋكتەگى ەلەكتروندىق حاتتاردا دەموكراتيالىق پارتيادان اقش پرەزيدەنتتىگىنە ۇمىتكەر دجو بايدەن 2015 جىلى ۋكراينالىق Burisma كومپانياسىنىڭ اعا قىزمەتكەرى ۆاديم پوجارسكيمەن كەزدەسۋ وتكىزگەنى جازىلعان. بۇعان دەيىن بايدەننىڭ ءوزى مۇنداي بايلانىستاردىڭ ەشقاشان بولماعانىن ايتقان.

امەريكاداعى پرەزيدەنت سايلاۋى بيىل 3 قاراشادا وتەدى. قىزۋ دودادا قوس كانديدات – قازىرگى 45-ءشى پرەزيدەنت دونالد ترامپ جانە دەموكرات دجو بايدەن باق سىنايدى. رەسپۋبليكالىق پارتيا وكىلى ترامپ الداعى سايلاۋدىڭ ناتيجەسىن تەك اقش جوعارعى سوتى انىقتايدى دەپ بولجاعان. اق ءۇي باسشىسى سوڭعى كەزدەرى دەموكراتتار پاندەمياعا بايلانىستى الداعى سايلاۋدا كەڭىنەن قولدانۋدى ۇسىناتىن پوشتا ارقىلى داۋىس بەرۋ ءادىسىن بىرنەشە رەت سىنعا العان. ترامپ سونىمەن بىرگە پوشتا ارقىلى داۋىس بەرۋ كەزىندە باسقا مەملەكەتتەردىڭ قاتىسۋ قاۋپى جوعارى دەيدى.

"The Qazaq Times"