بەرىك يماشەۆ: سايلاۋ ونلاين ەمەس، بۇرىنعىشا وتەدى

سايلاۋ تۋرالى زاڭعا سايكەس قازاقستاندا ءماجىلىس جانە ءماسليحاتتار سايلاۋى ونلاين وتپەيدى.

ورتالىق سايلاۋ كوميسسياسىنىڭ 22 قازان كۇنگى بريفينگتە وسك تورەعاسى بەرىك يماشەۆ «ءماجىلىس سايلاۋىن ءداستۇرلى جۇيەمەن قاعاز بيۋللتەندەر ارقىلى وتكىزەمىز» دەدى.

وسك مۇشەسى سەرىك سىدىقوۆتىڭ ايتۋىنشا، كونستيتۋتسيالىق نە قۇقىقتىق زاڭنامالاردىڭ ەشبىرىندە سايلاۋ پروتسەسىن كارانتينگە بايلانىستى كەيىنگە شەگەرۋ قاراستىرىلماعان.

«ءماجىلىس سايلاۋى ونلاين وتەدى دەگەن سۇراقتىڭ  قايدان شىققانى تۇسىنىكسىز.  ساياسي ناۋقان «سايلاۋ زاڭى» شەڭبەرىندە وتەدى. ءمان بەرەتىن جايت، ونلاين-سايلاۋ تۋرالى جانە كەلىپ جاتقان ۇسىنىستارداعىداي بىرنەشە كۇن بويى داۋىس بەرۋ زاڭدا كوزدەلمەگەن. ءماجىلىس سايلاۋىن ءداستۇرلى جۇيەمەن قاعاز بيۋللتەندەر ارقىلى وتكىزەمىز»، – دەدى بىرنەشە جىل بويى وسك باسشىسى قىزمەتىندە وتىرعان يماشەۆ.

بۇعان دەيىن، 7 قازان كۇنى دەنساۋلىق ساقتاۋ ءمينيسترى الەكسەي تسوي كوروناۆيرۋس ىندەتىنە بايلانىستى سايلاۋ ونلاين ءوتۋى مۇمكىن ەكەنىن مالىمدەگەن. دەگەنمەن ونلاين داۋىس بەرۋگە نارازى ازاماتتار پەتيتسيا جاريالاپ، پرەزيدەنتتەن وعان تىيىم سالۋدى سۇراعان.

سايلاۋ كوميسسياسىنىڭ ماماندارى «ماۋسىم-شىلدە قىرعىنىنا» جول بەرىپ العان پاندەمياداعى مودەراتور-ۆەدومستۆو دەنمين-ءنىڭ كاسىبيلىگىنە يەك ارتادى، ونىڭ سايلاۋ وتكىزۋگە قاتىستى بارلىق شارالاردى قابىلدايتىنىنا سەنىمدى. ءتىپتى سىدىقوۆ سەزد، ۇگىت-ناسيحات، سايلاۋ تۇگەل دەرلىگىنە جەكە-جەكە ارنايى نۇسقاۋ ازىرلەنەتىنىن ايتتى. ونىڭ ايتۋىنا قاراعاندا، سايلاۋشىلار 10 قاڭتار كۇنى قولىنا كەمى 2-3 بيۋللەتەن الادى. ءبىرى ءماجىلىس دەپۋتتاتتارىن، ەكىنشىسى وبلىستىق نە اۋداندىق ءماسليحات «حالىق قالاۋلىسىن» انىقتاۋعا بەرۋ جوسپارلانىپ جاتىر.

وسك مۇشەسىنىڭ ءبىرى اناستاسيا ششەگورتسوۆا حالىقارالىق باقىلاۋشىلار كەلەتىنىن جەتكىزدى. دەگەنمەن مۇنداي باقىلاۋشىلار كوميسسيا مەن سىرتقى ىستەر مينيسترلىگىنىڭ ءتىزىمى بويىنشا شاقىرىلاتىندىقتان، ونىڭ «اشىق ءارى ءمولدىر» پرينتسيپىنە تولىقتاي كەپىل بولارى انىق ەمەس. ساراپشىلار مەن ازاماتتىق قوعام بەلسەندىلەرى مۇنى «بيلىكتىڭ قولايىنا كەلەتىن قۋىرشاقتار» دەپ سىنايدى.

كەشە مەملەكەت باسشىسى توقاەۆ ءماجىلىس پەن ءماسليحات سايلاۋىن 10 قاڭتارعا بەلگىلەگەن. وعان بيۋدجەتتەن 15,3 ملرد تەڭگە جۇمسالماق.

“The Qazaq Times”