قىرعىزستان پرەزيدەنتى وتستاۆكاعا كەتتى

قىرعىزستان پرەزيدەنتى سوورونباي جەەنبەكوۆ وتستاۆكاعا كەتەتىنىن مالىمدەدى. بۇل تۋرالى پرەزيدەنتتىڭ ءباسپاسوز قىزمەتىنە سىلتەمە جاساعان ازاتتىق ۇنالعىسى حابارلادى.

پرەزيدەنتتىڭ سايتىندا جاريالانعان حابارلامادا: «مەن بيلىككە تالاسپايمىن، بيلىكتە قالمايمىن. قىرعىزستان تاريحىندا ءوز ازاماتتارىنىڭ قانىن توككەن جانە حالقىنا قارسى وق اتقان پرەزيدەنت رەتىندە قالعىم كەلمەيدى. سوندىقتان وتستاۆكاعا كەتۋ تۋرالى شەشىم قابىلدادىم»، – دەلىنگەن.

جەەنبەكوۆ قىرعىزستانداعى جاعداي قاۋىپسىزدىك كۇشتەرى مەن نارازىلاردىڭ قاقتىعىسىنا اينالۋى مۇمكىن دەپ مالىمدەدى. «وكىنىشكە وراي، اگرەسسيا ازايمايدى. مەنىڭ تەز ارادا وتستاۆكاعا كەتۋىمدى تالاپ ەتۋشىلەر سانى ارتتى. قازىرگى جاعداي ءىرى قاقتىعىسقا جاقىن. ءبىر جاعىنان – نارازىلىق بىلدىرۋشىلەر، ەكىنشى جاعىنان – قۇقىق قورعاۋ ورگاندارى. اسكەري قىزمەتشىلەر مەن قۇقىق قورعاۋ ورگاندارى مەملەكەتتىك رەزيدەنتسيانى قورعاۋ ءۇشىن قارۋ قولدانۋعا مىندەتتى. ال بۇل جاعدايدا قان توگىلەتىنى انىق. مەن ەكى تاراپتى دا ارانداتۋشىلىققا بوي الدىرماۋعا شاقىرامىن»، – دەدى ول ۇندەۋىندە.

14 قازاندا پرەمەر-مينيستر بولىپ سايلانعان سادىر جاپاروۆ بۇگىن سوورونباي جەەنبەكوۆتىڭ وتستاۆكاعا كەتۋىن تالاپ ەتكەن. بىراق مەملەكەت باسشىسىنىڭ ءباسپاسوز قىزمەتى پرەزيدەنتتىڭ وتستاۆكاعا كەتۋ قۇقىعى جوعىن حابارلاپ، سوورونباي جەەنبەكوۆ تەك جاڭا پارلامەنتتىك سايلاۋدان كەيىن عانا قىزمەتىن بوساتاتىنىن ايتقان.

5 قازاندا بىشكەكتە پارلامەنت سايلاۋىنىڭ ناتيجەسىمەن كەلىسپەيتىن ساياسي پارتيالاردىڭ ميتينگى ءوتتى. ولار 4 قازانداعى سايلاۋدىڭ ناتيجەسىن جارامسىز دەپ تاۋىپ، جاڭا سايلاۋ وتكىزۋدى جانە پرەزيدەنتتىڭ بيلىكتەن كەتۋىن تالاپ ەتتى. كەيىنىرەك بۇل اكتسيا دەمونسترانتتار مەن قۇقىق قورعاۋ ورگانى قىزمەتكەرلەرى اراسىنداعى قاقتىعىسقا اينالدى. رەسمي مالىمەتتەر بويىنشا، قاقتىعىستان 1000-نان استام ادام جاراقاتتانعان.

سول كۇنى نارازى توپ قاماۋدا وتىرعان بىرقاتار ساياساتكەردى تۇرمەدەن بوساتىپ الدى. ولاردىڭ قاتارىندا قىرعىزستاننىڭ پاراقورلىق ايىبىمەن 11 جىلعا سوتتالعان بۇرىنعى پرەزيدەنتى المازبەك اتامباەۆ، بۇرىنعى پرەمەر-مينيستر ساپار يساكوۆ، جوعارعى كەڭەستىڭ بۇرىنعى دەپۋتاتتارى راۆشان دجەەنبەكوۆ جانە سادىر جاپاروۆ بار.

ايتا كەتەيىك، سوورونباي جەەنبەكوۆ – قىرعىزستاننىڭ بەسىنشى پرەزيدەنتى. ول 2017 جىلى قازاندا كونستيتۋتسياعا ساي مەرزىمدە پرەزيدەنت بولىپ سايلانعان. جالپى تاۋەلسىزدىك العان 30 جىل ىشىندە ەلدە ءتورت پرەزيدەنت اۋىسىپ، ونىڭ ەكەۋى شەتەلدە باس ساۋعالاۋعا ءماجبۇر بولعان.

"The Qazaq Times"