كوروناۆيرۋستىڭ الەمگە اكەلگەن داعىدارىسىنان تەك ناتيجەلى ۆاكتسينا عانا الىپ شىعادى. بۇنداي مالىمدەمەنى كەشە دۇنيەجۇزىلىك دەنساۋلىق ساقتاۋ ۇيىمى جاسادى. بۇگىندە جەر شارىنىڭ 38 ملن شاماسىنداعى تۇرعىنى ۆيرۋس جۇقتىرىپ، ونىڭ 1,1 ميلليونى كوز جۇمدى، 70 مىڭ ادام اۋىر حالدە جاتىر.

ەكسپەرتتەر ىندەتتىڭ كۇز ايلارىندا قايتا ءورشيتىنىن بولجاعان، بولجامدارى دۇرىس كەلىپ جاتقانداي. قازىر الەمنىڭ بىرقاتار ەلىندە ۆيرۋستىڭ تارالۋى قايتا كۇشەيدى. بۇعان جاڭا وقۋ جىلىنىڭ باستالۋى مەن قوعامدىق قارىم-قاتىناستاردىڭ قايتا جاندانۋى سەكىلدى سەبەپتەر بولدى. وعان قارسى كارانتين شارالارىن ەنگىزۋ تاپ قازىر الەمنىڭ قاي-قايسى ۇكىمەتى ءۇشىن قيىن بولىپ وتىر. سەبەبى، ەكونوميكا جىل بويى اۋىر سوققى الىپ كەلدى.

Lancet جۋرنالى جاقىندا كوروناۆيرۋس تۋرالى جاڭا زەرتتەۋ ماقالانى جاريا ەتتى. وندا ادامداردىڭ ۆيرۋسقا قايتالاي شالدىعۋ قاۋپىنىڭ كۇشتى ەكەنىن دالەلدەگەن زەرتتەۋلەر بار. بەلگىلى بولعانداي، ءبىر رەت كوروناۆيرۋسقا شالدىققان ادام ەكىنشى رەت تە جۇعىمدالۋى مۇمكىن. ءتىپتى، ەكىنشى رەتىندە ناۋقاستاردىڭ جاعدايى تىم اۋىر بولعان. بۇل كوروناۆيرۋسقا بولعان ادام يممۋنيتەتىنىڭ تۇراقتىلىعىنا دەگەن كۇماندى كۇشەيتتى. ءبىر سوزبەن ايتقاندا، ءبىر رەت كوروناۆيرۋسقا شالدىققان ادام ونى قايتالاي جۇقتىرمايدى دەگەنگە ەش كەپىلدىك جوق.

قوعامدىق قوزعالىستاردىڭ شەكتەلگەن كەزىندە كەيبىر ساراپشىلار جاعىنان كارانتين شاراسىنىڭ قاجەتى جوق دەگەن پىكىرلەر دە ايتىلعان. ولاردىڭ ويىنشا ۆيرۋستىڭ تارالۋىنا مەيلىنشە جول بەرىپ، ادامدار اۋىرىپ ساقايىپ شىقسا ۆيرۋس تولىعىمەن توقتايدى. بىراق، جاڭا زەرتتەۋ ناتيجەلەرى بۇل پىكىردىڭ قاۋىپكە باستايتىنىن بىلدىرسە كەرەك. ددسۇ بولسا ۇجىمدىق يممۋنيتەت قالىپتاستىرۋ دەگەندى سوراقى قادام دەپ ەسكەرتتى.

قازىر جەر بەتىندە جەتى ميللياردتان اسا ادام جاساپ جاتسا، ۇجىمدىق يممۋنيتەت قالىپتاستىرۋ ءۇشىن ونىڭ تەڭ جارتىسىنان استامى ۆيرۋس جۇقتىرىپ جانە ونى جەڭىپ شىققان بولۋى كەرەك. الايدا، قاۋىپتى ىندەت ادامزاتتىڭ 0,5 پايزىنا جەتپەدى. سونىڭ وزىندە 1,1 ملن ادامنىڭ جانىن الدى. الەمدە جەتى ادامنىڭ بەسەۋىندە يممۋنيتەت بار كەزەڭگە جەتەمىز دەسە بۇل قارقىنمەن 30 ميلليونعا جۋىق ادام كوز جۇمباق.

“The Qazaq Times”