ەۋروپالىق وداق قىرعىزستان پرەزيدەنتى سوورونباي جەەنبەكوۆ رەسپۋبليكاداعى جاعدايدى تۇراقتاندىرۋ ءۇشىن جەتكىلىكتى رەسۋرستارعا يە دەپ سانايدى. بۇل تۋرالى ەو ديپلوماتياسىنىڭ باسشىسى جوزەپ بوررەلدىڭ مالىمدەمەسىندە ايتىلعان.

ەۋرووداق جەەنبەكوۆكە قايتا پارلامەنتتىك سايلاۋدى ۇيىمداستىرۋعا كومەك كورسەتۋگە دايىن ەكەنىن ايتتى. بوررەلدىڭ مالىمدەمەسىندە: «ەو قىرعىزستاننىڭ قازىرگى پرەزيدەنتى سوورونباي جەەنبەكوۆتىڭ بيلىگىن مويىندايدى جانە مەملەكەت باسشىسىنىڭ ينستيتۋتى ەلدەگى جالعىز زاڭدى بيلىك دەپ سانايدى. ءبىز جەەنبەكوۆتىڭ قىرعىزستانداعى تۇراقتىلىققا بەيبىت ديالوگ ارقىلى قول جەتكىزەتىنەن سەنەمىز»، – دەلىنگەن.

4 قازاندا قىرعىزستاندا پارلامەنت سايلاۋى ءوتتى. 6 قازانعا قاراعان ءتۇنى سايلاۋدان كەيىن پارلامەنتكە وتە الماعان پارتيا وكىلدەرى بىشكەكتە نارازىلىق شەرۋىن ۇيىمداستىرىپ، مەملەكەتتىك ورگانداردىڭ عيماراتتارىن باسىپ الدى. سول كۇنى ەكس-پرەزيدەنت المازبەك اتامباەۆتى جانە باسقا دا بىرقاتار ساياساتكەرلەردى تەرگەۋ يزولياتورىنان شىعاردى. ەلدەگى تۇراقسىزدىقتان كەيىن وسك سايلاۋ قورىتىندىسىن جارامسىز دەپ تانىدى. بىشكەكتە توتەنشە جاعداي جاريالاعان پرەزيدەنت سوورونباي جەەنبەكوۆ پارتيا باسشىلارىن ساياسي پروتسەستى قۇقىقتىق ارناعا قايتارۋعا شاقىرىپ، ۇكىمەت پەن پرەمەر-ءمينيستردىڭ وتستاۆكاعا كەتۋى تۋرالى جارلىقتارعا قول قويدى.

كەشە سوورونباي جەەنبەكوۆ بىشكەك قالاسى اۋماعىندا قايتادان توتەنشە جاعداي ەنگىگەن. وعان پارلامەنتتىڭ بۇعان دەيىن وسىنداي ءتارتىپ ەنگىزۋ تۋرالى شەشىمدى ءۇش كۇن بويى قاراستىرۋى سەبەپ بولعان. قۇجاتتا ءتارتىپ قالادا تارتىپسىزدىكتەر بەلەڭ الىپ، ادام ومىرىنە قاۋىپ كۇشەيگەندىكتەن، ازاماتتاردىڭ قاۋىپسىزدىگىن قورعاۋ ءۇشىن قولعا الىنعانى ايتىلعان. توتەنشە جاعداي كەزىندە كوشەدە شەرۋ، ەرەۋىل جانە وزگە دە ءىس-شارالار وتكىزۋگە تىيىم سالىنعان.

"The Qazaq Times"