بىشكەكتەگى نارازىلىق شەرۋلەرىنەن. فوتو: ار

قىرعىزستان استاناسىندا كۇزەت كۇشەيتىلىپ، اسكەري قىزمەتكەرلەر، پوليتسيا جانە حالىق جاساقتارى قورشاۋعا العان. بۇل تۋرالى قالالىق ءىىب حابارلادى.

ۆەدومستۆو حابارلاماسىندا: «12 قازان تاڭەرتەڭنەن بەرى استاناداعى احۋال تۇراقتى. بىشكەك قالاسى تاۋلىك بويىنا قارۋلى كۇشتەردىڭ، ىشكى ىستەر ورگاندارىنىڭ جانە ازاماتتاردىڭ قوعامدىق قاۋىپسىزدىگى مەن ءتارتىپتى قورعاۋدى قامتاماسىز ەتەتىن حالىق جاساقتارىنىڭ قورعاۋىندا»، – دەلىنگەن.

مالىمەتتەرگە سۇيەنسەك، قازىر ەلدە كولىك قوزعالىسى قالىپتى رەجيمدە ءجۇرىپ جاتىر. بارلىق كاسىپكەرلىك وبەكتىلەر مەن مەملەكەتتىك مەكەمەلەر تولىق كولەمدە جۇمىسقا شىققان.

4 قازاندا قىرعىزستاندا پارلامەنت سايلاۋى ءوتتى. 6 قازانعا قاراعان ءتۇنى سايلاۋدان كەيىن پارلامەنتكە وتە الماعان پارتيا وكىلدەرى بىشكەكتە نارازىلىق شەرۋىن ۇيىمداستىرىپ، مەملەكەتتىك ورگانداردىڭ عيماراتتارىن باسىپ الدى. سول كۇنى ەكس-پرەزيدەنت المازبەك اتامباەۆتى جانە باسقا دا بىرقاتار ساياساتكەرلەردى تەرگەۋ يزولياتورىنان شىعاردى. ەلدەگى تۇراقسىزدىقتان كەيىن وسك سايلاۋ قورىتىندىسىن جارامسىز دەپ تانىدى.

بىشكەكتە توتەنشە جاعداي جاريالاعان پرەزيدەنت سوورونباي جەەنبەكوۆ پارتيا باسشىلارىن ساياسي پروتسەستى قۇقىقتىق ارناعا قايتارۋعا شاقىرىپ، ۇكىمەت پەن پرەمەر-ءمينيستردىڭ وتستاۆكاعا كەتۋى تۋرالى جارلىقتارعا قول قويدى. ساعات 21:00-دەن تاڭعى 05:00-گە دەيىن بىشكەكتە كومەندانتتىق ساعات ەنگىزىلدى.

11 قازاندا قىرعىزستاندا ميتينگتەر مەن ءارتۇرلى اكتسيالار ۇيىمداستىرۋعا دا تىيىم سالىنعان. سوعان قاراماستان، رەسپۋبليكانىڭ جاڭا پرەمەر-ءمينيسترى بولىپ سايلانعان سادىر جاپاروۆتىڭ جاقتاستارى ورتالىق الاڭعا جيىلىپ، ءوز كوشباسشىلارىن قولداۋ شاراسىن وتكىزدى. ال ەكس-پرەزيدەنت المازبەك اتامباەۆ قايتا قاماۋعا الىندى. كۇشتىك قۇرىلىمدار وعان قارسى بۇرىنعى تاعىلعان ايىپتارىنا قوسا، جاپپاي تارتىپسىزدىك ۇيىمداستىردى دەگەن دەرەك بويىنشا ءىس قوزعادى.

"The Qazaq Times"