كورنەكى سۋرەت. فوتو: يليا پيتالەۆ / ريا نوۆوستي

ەڭبەك جانە حالىقتى الەۋمەتتىك قورعاۋ مينيسترلىگى بۇگىن پاندەميا كەزىندە كوروناۆيرۋس پەن ونىڭ پنەۆمونيا ءتۇرىن جۇقتىرعان 1 727 مەديتسينا قىزمەتكەرىنە جانە قايتىس بولعان 24 كادردىڭ تۋىستارىنا مەملەكەت تاراپىنان وتەماقى تولەنگەنىن حابارلادى.

مەملەكەتتىك الەۋمەتتىك ساقتاندىرۋ قورىنان ءبىر اپتادا (14-21 قىركۇيەك) 240 مەدقىزمەتكەرگە 2 ملن، ال قىزمەت بارىسىندا اۋىرىپ-قايتقان 4 ادامنىڭ تۋىستارىنا 10 ملن تەڭگەدەن بىرجولعى الەۋمەتتىك تولەمدى بەرىلگەن.

وتەماقى تولەۋ تۋرالى شەشىمدى وڭىرلەر مەن ءۇش مەگاپوليستەردىڭ دەنساۋلىق ساقتاۋ باسقارمالارى جانىنداعى ارنايى كوميسسيا قابىلدايدى. ال وتىنىمدەردى جيناقتاۋدى قر دەنساۋلىق ساقتاۋ مينيسترلىگى جۇزەگە اسىرادى. ماماندار ءوتىنىم تىركەۋ جانە راسىمدەۋ مەحانيزمىنىڭ جەتىلمەگەنىن، جەكەلەگەن ىستەر باياۋ قارالاتىنىن ايتادى.

COVID-19 ۆيرۋسىن جۇقتىرعان جانە ونىڭ اسقىنعان ءتۇرى پنەۆمونياعا شالدىعىپ، تولەم العان مەدقىزمەتكەرلەردىڭ ايماقتارداعى سانى:
استانادا – 393,
الماتى قالاسىندا – 373,
شىمكەنت قالاسىندا – 102,
قاراعاندى وبلىسىندا – 115,
اقمولا وبلىسى – 107 مامان.

پاندەميا باستالعالى بەرى قازاقستاندا مىڭداعان مەدقىزمەتكەر ۆيرۋس جۇقتىرىپ، ونداعانى ومىردەن وتكەن. بىراق بيلىك ولاردىڭ بارىنە بىردەي وتەماقى بەرمەيدى. قىزمەتتەن تىس كەزدە جۇقتىرعانداردى سۇرىپتاپ تولەيدى. ساراپشىلار تالعاۋ-تەكسەرۋ تەتىگى وتەماقىنى ازايتۋدىڭ امالىنا اينالدى دەپ سانايدى.

"The Qazaq Times"