«ەستۋشى ۇكىمەتتىڭ» نازارىنان تىسقارى اۋىل جولىن «جىلۋمەن» جوندەپ جاتىر

شقو اياگوز اۋدانىنداعى مايلين اۋىلىنىڭ تۇرعىندارى نەگىزگى تاسجولعا اپاراتىن كۇرە جولدى ءوز اراسىندا جىلۋ جيناپ، جوندەپ جاتىر. بيلىكتەن «قايىر بولماعان سوڭ» جۇرت قالتاسىنان قۇراعان ورتاق قارجىعا ءوز بەتىنشە جوندەپ جاتىر. ماسەلەنىڭ ءمان-جايىن بىلمەك ماقساتتا وڭىردەگى ءتىلشى اۋىل اكىمىمەن تىلدەسىپ كوردى.

– اۋىل مايلين دەپ اتالادى. اۋدان ورتالىعىنا دەيىن – 24 شاقىرىم. ونىڭ 12 شاقىرىمى – «وسكەمەن – الماتى» باعىتىنداعى رەسپۋبليكالىق جول، قالعان 12 شاقىرىمى – اۋىلعا دەيىنگى جول. ءبىز سول، 12 شاقىرىمدى اۋىلدىڭ ازاماتتارى، مۇعالىمدەر، اۋىل اكىمشىلىگى – ءبارىمىز ۇيىمداسىپ، ۋاقىتشا جوندەي تۇرايىق دەدىك. تەحنولوگيا بويىنشا جاماپ جاتقانىم جوق، ارينە، – دەيدى اۋىل اكىمى ەرجان نۇرعاليەۆ.

ونىڭ ايتۋىنشا، جول 2017 جىلى ءبىرشاما جوندەوگەن.

– وي-شۇڭقىرىمىز كوبەيىپ كەتىپتى. ءوزىمىزدىڭ جۇرەتىن جول بولعان سوڭ بيۋدجەتتەن اقشا ءبولىنىپ، ىسكە اسقانعا دەيىن قاراپ وتىرمايىق دەدىك. قازىرشە ءبىراز بولىگىن ىستەدىك، قالعانىن الداعى سەنبىدە جوندەپ، رەسپۋبليكالىق جولعا دەيىن اپارامىز عوي. جىلدا-جىلدا شۇڭقىرلارعا توپىراق توگەتىنبىز، ونى جەل ۇشىرىپ كەتەتىن. بيىل بەتون قۇيىپ جاتىرمىز، – دەيدى اكىم.

ەلدىڭ كۇشىمەن سالىنىپ جاتقان جول تۋرالى اقپارات Facebook پەن Instagram جەلىلەرىندە قىزۋ تالقىلانىپ جاتىر. اياگوزدەن

بۇعان دەيىن وبلىستا وسىعان ۇقساس جاعداي بىلتىر كۇزدە بولعان. ءۇرجار اۋدانى كوكتال اۋىلىنىڭ تۇرعىندارى اۋىلعا اسپالى كوپىر سالىپ العان دەسەدى. كوكتال اۋىلدىق وكرۋگىنىڭ اكىمى نۇرىم سادۋاقاسوۆتىڭ ايتۋىنشا، بيۋدجەتتىك جوسپارعا ەنبەگەن ستراتەگيالىق ماڭىزدى نىسانعا جاتپايتىن كوپىردى 1973 جانە 1983 جىلعى تۇلەكتەر مەن اۋىل ازاماتتارى ۇيىمداسىپ سالعان. ۇزىندىعى 100, ال ەنى 1,4 مەتر شاماسىنداعى قۇرىلىسقا 10 ملن تەڭگە شاماسىندا قاراجات جۇمسالعان. اكىمنىڭ ايتۋىنشا، ءار جىلعى تۇلەكتەر قال-قادىرىنشە اۋىلدىڭ كەم-كەتىگىنە بولىساتىن كورىنەدى. «تىڭداۋشى ۇكىمەتكە» ەندى «كورۋشى» دەگەن ەپيتەتتى تىركەۋ كەرەك، سوندا نازار اۋدارار دەيدى ازاماتتىق بەلسەندىلەر.

زاڭگەر الەكسەي بوجكوۆتىڭ سوزىنە قاراعاندا، ادامدار كونستيتۋتسيالىق قۇقىعىن بىلمەي وتىر. «سالىق تولەپ وتىرعاندىقتان، ولار جولدى جوندەپ بەرۋدى تالاپ ەتۋگە قۇقىلى».

تاسقىن بولاتۇلى

شقو

"The Qazaq Times"