دارىگەرلەر ناۋقاستىڭ توموگرافيا ءتۇسىرىلىم-ناتيجەسىن تالداپ تۇر. فوتو: Getty Images

قازان ايىنىڭ العاشقى كۇنى ەلدە 65 ادامنان كوروناۆيرۋس، 234 ادامنان كوروناۆيرۋس پنەۆمونياسى انىقتالدى. ۇكىمەت ستاتيستيكاسى بويىنشا، كوروناۆيرۋس پنەۆمونياسىنا شالدىققاندار بىردەن 55 كەيسكە ارتقان. 

#كوروناۆيرۋس 1 قازان كۇنى كورونۆيرۋس جۇقتىرعان 91 ادام ايىعىپ شىقسا، 3 ادام ومىردەن وتكەن. ال جاڭادان تىركەلگەن ناۋقاستاردىڭ ەڭ كوبى – ادەتتەگىدەي شقو (18) جانە سقو-دا (10). سونداي-اق، شىمكەنت قالاسى، ماڭعىستاۋ جانە تۇركىستان وبلىستارىندا مۇلدەم ناۋقاس تىركەلمەگەن.

دەنميننىڭ رەسمي مالىمەتىنشە، ەمدەلىپ جاتقان 3279 ادامنىڭ 1745-ءى اۋرۋحانالاردا. ال قالعان 1534 ناۋقاس امبۋلاتوريالىق تەراپيادا. ولاردىڭ اراسىندا 64 (30 قىركۇيەك ەسەپ 59 ەدى – QT) بالا بار. احۋالى ناشارلاعان 97 ناۋقاستىڭ اراسىندا 11 ادامنىڭ جاعدايى قاتتى قيىنداعان. جانە 20 پاتسيەنت جاساندى اپپاراتپەن تىنىستاپ جاتىر.

1 قازانداعى جاعداي بويىنشا، قازاقستاندا كەزەكشى سىنىپتاردا وقيتىن 36 بالادان، قاشىقتان وقيتىن 73 بالادان كوروناۆيرۋس انىقتالعان. ولارمەن بايلانىستا بولعان 800-دەن ارتىق ادامنىڭ تاعى 25-ىنەن پتر تەستى ارقىلى كوۆيد ينفەكتسياسى تابىلعان.

رەسپۋبليكا بويىنشا بارلىعى 108 044 ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 103 مىڭنان ءسال اسقان. بۇل جالپى ناۋقاستاردىڭ 90%-دان استامى.

#كوروناۆيرۋس_پنەۆمونياسى سونىمەن قوسا، بەيسەنبى كۇنى كوروناۆيرۋس پنەۆمونياسىنا شالدىققان 234 ادام، ەكى ءولىم جاعدايى تىركەلگەن. سونداي-اق، 95 ادام جازىلىپ شىققان. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس قورىتىندى كورسەتكەنىمەن، كوروناۆيرۋس سالدارىنان قابىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە ءسوزىن بۇرمالاپ، ءار ون كۇن سايىن جاريالاۋعا كوشكەن. كوروناۆيرۋس پنەۆمونياسىنىڭ وڭىرلەردەگى كۇندەلىكتى ديناميكاسى بەلگىسىز. قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... تامىز جانە قىركۇيەك ايلارىندا قازاقستاندا كوروناۆيرۋس جۇقتىرعاندار 17 مىڭنان اسسا، كوروناۆيرۋس پنەۆمونياسىنا شالدىققاندار 33 مىڭعا جۋىقتاعان. ەكەۋىن قوسا ەسەپتەگەندە، كەيىنگى ەكى ايدا ىندەتتەن 600-دەي قازاقستاندىق ومىردەن وتكەن. سونىمەن بىرگە، وسى ارالىقتا (تامىز-قىركۇيەك)  پنەۆمونيانىڭ باسقا تۇرلەرىمەن 82 مىڭنان استام جاعداي تىركەلگەن.

ددسۇ مالىمەتىنشە، قازاقستاندا اۋىرعانداردىڭ سانى 140 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى جيىنى ۆيرۋس جۇققانداردىڭ 2670-ءى (كۆي+ / U07.1 – 1 737, كۆي- / U07.2 – 357, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

“The Qazaq Times”