جاپوننىڭ جاڭا پرەمەرى قىتاي باسشىسىمەن تەلەفوندا سويلەسپەك

جاپونيانىڭ جاڭادان تاعايىندالعان باس ءۋازىرى (پرەمەر-ءمينيسترى) يوشيحيدە سۋگا (Yoshihide Suga) ەرتەڭ، ياعني 25 قىركۇيەك كۇنى قىتاي باسشىسىمەن العاش رەت تەلەفون ارقىلى سويلەسپەك. جاپونيالىق Kyodo News حابارىنا قاراعاندا يوشيحيدە قىتاي باسشىسىمەن سويلەسۋ بارىسىندا شي جينپيڭنىڭ جاپونيا ساپارىنىڭ سوڭعى ۇيلەستىرۋ جۇمىستارىن اقىلداسادى.

ورىس تىلىندەگى دىبىستالۋىنا ىلەسىپ «يوسيحيدە» اتالىپ جۇرگەن بۇل جاڭا پرەمەر ناعىز ەڭبەكقور جاپوننىڭ سيمۆولى رەتىندە تانىلعان ساقا ساياساتكەر. ونىڭ قىتاي باسشىسىمەن تەلەفون ديالوگىندا نە ايتىلۋى مۇمكىن دەگەنگە «بال اشقان» جاپون ۇكىمەتىنىڭ لاۋازىمدى تۇلعالارى Kyodo News-قا بىرقاتار مالىمەتتەردى بولىسەن. سوعان قاراعاندا، العاشقى ديالوگ بارىسىندا يوشيحيدە مەن شي ەكى ەل قارىم-قاتىناسىن ودان سايىن كەڭەيتۋدى ءسوز ەتۋى مۇمكىن. بۇعان قوسا، قىتاي باسشىسىنىڭ كەشىكتىرىلە بەرگەن جاپونيا ساپارىنىڭ ۇيلەستىرۋ جۇمىستارىن سوڭعى مارتە پىسىقتايدى.

قىتاي باسشىسىنىڭ جاپونيا ساپارى ءساۋىر ايىنا جوسپارلانعان ەدى. جاڭا كوروناۆيرۋس پاندەمياسى سەبەبىنەن كەيىنگە شەگەرىلگەن ەدى. ول كەزدە يوشيحيدە پرەمەردىڭ ءباسپاسوز وكىلى رەتىندە قىتاي باسىشىسىنىڭ جاپونيا ساپارى ەكى ەلدىڭ ورتاق كەلىسىپ بەلگىلەگەن مەرزىمدە بولاتىنىن مالىمدەگەن ەدى. انىعىندا، جاپون مەن قىتاي باسشىلارى سوڭعى ەكى جارىم جىل ىشىندە تىكەلەي تەلەفونمەن سويلەسپەگەن. سوڭعى رەت شيندزو ابە مەن شي جينپيڭ 2018 جىلى ساۋىردە تەلەفوندا سۇحباتتاسىپ ەدى.

جاپون اقپارات قۇرالدارىندا ءدال وسى قىتاي باسشىسىمەن تەلەفوندا بولاتىن سوزدەر كوبىرەك تالقىلانىپ جاتىر. كەيبىر باسىلىمداردا يوشيحيجەنىڭ موينىندا اقش پەن قىتاي قايشىلىعى تۇسىندا اقش-جاپون-قىتاي قاتىناسىنىڭ تەپە-تەڭدىگىن ساقتاۋ مىندەتى تۇرعانىن جازسسا، كەيبىر باسىلىمدار العاشقى قوڭىراۋدا پرەمەر-ءمينيستردىڭ جىلى ءسوز، ارتىق ۋادەدەن اۋلاق بولۋى كەرەك دەسۋدە.

جاپون مەن قىتاي اراسىندا ەسكىلى-جاڭالى قايشىلىق كوپ. سونىڭ ءبىرى – شىعىس قىتاي تەڭىزىندەگى تالاستى ارالدار ماسەلەسى. ەرتەڭگى تەلەفون سۇحباتى كەزىندە وسى سەنكۋ ارالى (قىتايدا «ءدياوۇيداو» دەپ اتالادى) ماسەلەسىمەن بىرگە گونكونگ تاقىرىبى دا ءسوز ەتىلۋى مۇمكنى دەگەن بولجامدار دا بار. ارينە، قىتاي باسشىسىنىڭ ساپارىنىڭ الدىندا تاراپتار نازىك تاقىرىپتاردى الدىن الا ءسوز ەتىپ بەت جىلتىپ العانى دا كەرەك-ءتى.

يوشيحيدە سۋگا وتكەن اپتادا عانا جاپونيانىڭ باس ءۋازىرى بولىپ قىزمەتىنە كىرىستى، سودان بەرى الەم ەلدەرىنىڭ باسشىلارىمەن تەلەفون ارقىلى سويلەسىپ، قارىم-قاتىناستى پىسىقتاپ كەلەدى. اقش پرەزيدەنتى ترامپپەن 20 قىركۇيەك كۇنى تەلەفون ارقىلى سويلەسكەن بولاتىن.