كورنەكى سۋرەت. فوتو: https://eadaily.com

امەريكانىڭ اەروناۆتيكا جانە عارىش كەڭىستىگىن زەرتتەۋ جونىندەگى ۇلتتىق باسقارماسى (NASA) اقش قورعانىس مينيسترلىگىمەن ىنتىماقتاستىق تۋرالى مەموراندۋمعا قول قويدى. قۇجات بويىنشا پەنتاگون اتالعان اگەنتتىكتىڭ عارىشتىق ينفراقۇرىلىمى قاۋىپسىزدىگىن قامتاماسىز ەتەدى. بۇل تۋرالى رەسمي Defense News حابارلادى.

ميتچەلل اەروعارىشتىق زەرتتەۋلەر ينستيتۋتىنىڭ ونلاين سەمينارىندا NASA باسشىسى دجەيمس برايدەنشتەين: «عارىش سالاسىندا قيىندىقتار ارتتى جانە بۇل ماسەلەلەر NASA-عا كوممەرتسيالىق وپەراتورلار سياقتى اسەر ەتەدى. ءبىز اقش-تىڭ عارىشتىق كۇشتەرىنە سەنىم ارتامىز. قيىندىقتان بىرگە شىعۋعا ارەكەت ەتەمىز»، – دەدى. ول NASA-عا تونەتىن قاۋىپ-قاتەردىڭ مىسالى رەتىندە برايدەنشتەين عارىش اپپاراتتارىنا كەدەرگى كەلتىرىپ، ولاردى لازەرمەن، كيبەرشابۋىلدارمەن جويۋعا مۇمكىندىك بەرەتىن تەحنولوگيالاردىڭ تارالۋىن كەلتىردى.

اقش عارىش كۇشتەرى پرەزيدەنت دونالد ترامپتىڭ 2020 جىلعا ارنالعان اسكەري بيۋدجەتىنە قول قويعاننان كەيىن 2019 جىلدىڭ 20 جەلتوقسانىندا رەسمي تۇردە قۇرىلدى. بۇل – امەريكا قارۋلى كۇشتەرىنىڭ التىنشى ءتۇرى. سونىمەن قاتار 1947 جىلى جەرگىلىكتى ارميانىڭ زاماناۋي قۇرىلىمىنان كەيىن قۇرىلعان العاشقى ۇيىم.

ۋاشينگتون اكىمشىلىگى «اقش عارىشتى ىقتيمال سوعىس تەاترى رەتىندە قاراستىرۋى كەرەك»، دەپ بىرنەشە رەت ايتقان. امەريكانىڭ بۇل قادامىن رەسەي مەن قىتاي بيلىگى ءجىتى باقىلاۋدا ۇستاپ وتىر. جاقىندا عانا اق ءۇي باسشىسى دونالد ترامپ اتالعان ەكى مەملەكەتتى «اقش-قا عارىش سالاسىندا دا، ساياساتتا دا قاۋىپ توندىرەتىن ەلدەر»، دەپ اتاعان.

كەيىننەن رەسەي پرەزيدەنتى ۆلاديمير پۋتين ۋاشينگتوننىڭ مۇنداي ۇستانىمىنان كەيىن «ماسكەۋ سپۋتنيكتەردىڭ وربيتالىق توبىن، جالپى زىمىران-عارىش سالاسىن نىعايتۋعا ەرەكشە نازار اۋدارۋى ءتيىس»، دەگەن. ياعني عارىش كۇشتەرىندەگى باسەكەلەستىك كۇن سايىن ارتىپ وتىر.

"The Qazaq Times"