يزرايلدە مىڭداعان ادام پرەمەر-مينيستر بەنيامين نەتانياحۋدىڭ ساياساتىنا قارسى ەرەۋىلگە شىقتى.

نارازى جۇرت پرەمەر-مينيستر رەزيدەنتسياسىنىڭ الدىندا جينالىپ، ساياساتكەردىڭ وتستاۆكاعا كەتۋىن تالاپ ەتتى. ولار بيلىكتى كوروناۆيرۋس ىندەتىنە قارسى دەر كەزىندە ءتيىستى شارا قولدانبادى دەپ ايىپتاپ جاتىر. نارازىلاردى ءتارتىپ ساقشىلارى تاراتپاق بولدى.

ەلدەگى ەپيدەميولوگيالىق احۋالدىڭ ناشارلاۋىنا بايلانىستى ۇيىمداستىرىلعان نارازىلىق اكتسيا بىرنەشە اپتا بۇرىن باستالعان ەدى. ەنگىزىلگەن جاڭا ەرەجەگە سايكەس تۇرعىندار ءوز ۇيلەرىنەن 1 مىڭ مەتر جەردەن ارتىق الىستاماۋى ءتيىس. جالپى بۇگىندە قاۋىپتى ىندەتتىڭ ىلمەگىنە ىلىككەندەردىڭ قاتارى 190 مىڭنان كوپ. مىڭنان استامى دەرتتەن ايىعا الماي كوز جۇمدى.

الەمدە Covid-19 كوروناۆيرۋسى 31 ميلليونعا جۋىق ادامعا جۇقتى. قايتىس بولعاندار 960 مىڭعا جەتتى. 21 ميلليون ادام اۋرۋدان جازىلعان. دۇنيەجۇزىلىك دەنساۋلىق ساقتاۋ ۇيىمى قىتايدان تاراعان بۇل ۆيرۋستى «پاندەميا» دەپ جاريالاعان.

"The Qazaq Times"