سەنات 18 جىلدان سوڭ كوكجايلاۋ داۋىنا نۇكتە قوياتىن زاڭ قابىلدادى

بۇگىن سەنات وتىرىسىندا كوكجايلاۋ كۋرورتتىق ايماعىن ىلە-الاتاۋ مەملەكەتتىك ۇلتتىق تابيعي باعىنا قايتارۋ تۋرالى زاڭ جوباسىن ەكىنشى وقىلىمدا قابىلدانىپ، پرەزيدەنتكە قول قويۋعا جىبەرىلدى.   

سەناتقا قۇرامىنداعى اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى ازىرلەگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اقىرى قابىلداندى. پارلامەنت سەناتىنىڭ سپيكەرى ماۋلەن اشىمباەۆ قابىلدانعان زاڭ قورشاعان ورتانى قورعاۋ سالاسىنداعى، ونىڭ ىشىندە ىلە-الاتاۋ ۇلتتىق پاركىنىڭ جەر ماسەلەسىنە قاتىستى داۋدى شەشەتىنىن ايتتى.

«بۇل ماسەلە بۇكىل قوعامدى الاڭداتتى، ال بۇگىن ءوز شەشىمىن تاۋىپ، نۇكتە قويىلدى. سوندىقتان مەن قابىلدانعان زاڭ ءبىزدىڭ مەملەكەتىمىزدىڭ يگىلىگىنە قىزمەت ەتەتىنىنە سەنىمدىمىن»، – دەدى توراعا  اشىمباەۆ.

اتالعان زاڭ جوباسى جەر كودەكسى مەن «ەرەكشە قورعالاتىن تابيعي اۋماقتار تۋرالى» زاڭعا وزگەرىستەر مەن تولىقتىرۋلار ەنگىزۋدى كوزدەيدى. تۇزەتۋلەر بۇرىن تۋريزم وبەكتىلەرى، سۋ شارۋاشىلىعى قۇرىلىستارى، مەملەكەتتىك شەكارا وبەكتىلەرىن سالۋ جانە پايدالانۋ ءتارتىبىن جەڭىلدەتۋگە باعىتتالعان.

سەنات ءباسپاسوز قىزمەتىنىڭ مالىمەتىنشە, ۇسىنىلىپ وتىرعان وزگەرىستەر ەرەكشە ەكولوگيالىق، عىلىمي، تاريحي-مادەني جانە رەكرەاتسيالىق قۇندىلىعى بار تابيعي كەشەندەر مەن تابيعي-قورىق قورىنىڭ نىساندارىن ساقتاۋعا مۇمكىندىك بەرەدى.

قوعامدا قىزۋ پىكىرتالاس تۋدىرىپ كەلگەن «كوكجايلاۋ» تاۋ شاڭعىسى كۋرورتىن سالۋ تۋرالى باستامانى 2002 جىلى بيلىك كوتەرگەن ەدى. كۋرورت جوباسىن ىسكە اسىرۋ ءۇشىن جەرلەردى ىلە-الاتۋ ۇلتتىق باعىنان شىعارىپ، الماتى قالاسى شەكاراسىنا قوسقان. «مەدەۋ» مۇز ايدىنىنان ءتورت شاقىرىم قاشىقتىقتا ورنالاسقان شاتقالعا كۋرورت سالۋ جوباسىنا ەكولوگتار مەن بەلسەندىلەر، جالپى قالا حالقى جىلدار بويى جاپپاي تاباندى تۇردە نارازىلىق تانىتتى. قالا ماڭىنداعى وزگە التى تاۋ شاڭعىسى كەشەنىنىڭ جۇلدىزىن جاعىپ، تۋريزم وشاعىنا اينالدىرا الماعان اكىمدىك جەتىنشى نىسان ءۇشىن بەلسەندىلەرمەن ۇزاق ايتىسقان. بىراق دەگەنى ىسكە اسپادى. سەبەبى پرەزيدەنت توقاەۆ قارسىلىعىن ءبىلدىرىپ، بۇل ماسەلەگە ەندى ورالمايتىنىن ايتقان. بەلسەندىلەر پرەزيدەنت وزىنە جولدانعان زاڭ جوباسىنا ويلانباي قول قويارىنا سەنىمدى.

"The Qazaq Times"