اقش ەۋروپا ەلدەرىمەن بەلارۋسكە قارسى «ماقساتتى سانكتسيالار» ەنگىزۋدى تالقىلاپ جاتىر. بۇل تۋرالى اقش مەملەكەتتىك حاتشىسىنىڭ ءبىرىنشى ورىنباسارى ستيۆەن بيگان مالىمدەدى.  تامىزدىڭ سوڭىندا ول ۆيلنيۋس، ماسكەۋ، كيەۆ جانە ۆەناعا بارىپ، بەلارۋستەگى جاعدايعا قاتىستى ماسەلەلەردى تالقىلاعان. رەسمي وكىلدىڭ ايتۋىنشا، جەكەلەگەن سانكتسيا بەلارۋستەگى ادام قۇقىعى تاپتالىپ، بيلىكتىڭ حالىققا قىسىم كورسەتۋنە بايلانىستى ەنگىزىلەدى. نەگىزىنەن ەۋروپالىق وداق 1997 جىلدان بەرى بەلارۋسكە سانكتسيا ەنگىزىپ كەلەدى. نەگىزىندە بۇل سانكتسيالار جەكە تۇلعالارعا قاتىستى بولدى جانە ەۋروپالىق وداق ەلدەرىنە جەكە اكتيۆتەردىڭ كىرۋىنە قاتاڭ تىيىم سالىندى. 2016 جىلدىڭ باسىندا ەو لۋكاشەنكوعا جانە تاعى 169 شەنەۋنىككە، سۋديالار مەن قاۋىپسىزدىك كۇشتەرىنە، سونداي-اق ءتورت كومپانياعا قارسى سانكتسيالاردى جويدى. بۇل قادام الەكساندر لۋكاشەنكو رەسەيدىڭ ۋكرايناعا قاتىستى ارەكەتتەرىن اشىق قولداۋدان باس تارتىپ، ءوزىن جانجالدى شەشۋدە دەلدال رەتىندە ۇسىنعاننان كەيىن، سونىمەن قاتار 2015 جىلدىڭ تامىزىندا التى ساياسي تۇتقىنداردى، ونىڭ ىشىندە 2010 جىلعى سايلاۋدا پرەزيدەنتتىككە بۇرىنعى كانديدات نيكولاي ستاتكەۆيچتى بوساتقاننان كەيىن جاسالدى. بيىل الدىن-الا ناۋقان كەزىندە سۆەتلانا تيحانوۆسكايانى قولداعان ستاتكەۆيچ قايتادان قاماۋعا الىنىپ، وعان قارسى قىلمىستىق ءىس قوزعالدى. ەو-نىڭ بەلارۋسكە قاتىستى بارلىق سانكتسيالارىنىڭ ىشىندە ءوز كۇشىن جويماعان قاتاڭ قاۋلىلار: قارۋ-جاراق ەمبارگوسى; ىشكى رەپرەسسياعا باعىتتالعان سانكتسيا; 1999-2000 جىلدارى لۋكاشەنكونىڭ ساياسي قارسىلاستارى سايلاۋ كوميسسياسىنىڭ بۇرىنعى باسشىسى ۆيكتور گونچار، بۇرىنعى ىشكى ىستەر ءمينيسترى يۋري زاحارەنكو جانە تەلەجۋرناليست دميتري زاۆادسكيدى قاستاندىقپەن «ولتىرگەن» ءتورت ادامعا ەنگىزىلگەن سانكتسيالار. 2020 جىلدىڭ اقپانىندا سانكتسيالاردىڭ مەرزىمى تاعى ءبىر جىلعا ۇزارتىلدى.

"The Qazaq Times"