كورنەكى سۋرەت. قازاقستاندا كوروناۆيرۋستان قايتىس بولعاندار سانى ازايماي تۇر. فوتو: kapital.kz

سەيسەنبى كۇنى، 10 قىركۇيەكتە قازاقستاندا 77 ادامنان كوروناۆيرۋس، 353 ادامنان پنەۆمونيا انىقتالعان. قىركۇيەك ايىنىڭ العاشقى ونكۇندىگىندە كوروناۆيرۋس پەن ونىڭ پنەۆمونيالىق ءتۇرىن قوسا ەسەپتەگەندە 4 مىڭداي اۋرۋ جاعدايى، 88 ءولىم وقيعاسى تىركەلدى.

دەنمين دەرەگىنشە، اۋرۋ جاعدايىنىڭ ەڭ كوبى ءۇشىنشى كۇن قاتارىنان شىعىس قازاقستان وبلىسىندا 19 ادامنان تابىلعان.

قازىرگى تاڭدا 4 596 ادام ەمدەلىپ جاتىر. ونىڭ 2523-ءى ستاتسيوناردا، 2073-ءى امبۋلاتوريادا.
جاعدايى قيىن 137 ناۋقاستىڭ 25-ءسىنىڭ احۋالى قاتتى ناشارلاعان. سونداي-اق، 28 ادام وكپەنى جاساندى جەلدەتۋ اپپاراتىندا جاتىر.​

سونىمەن قوسا، سارسەنبى كۇنى كوروناۆيرۋس پنەۆمونياسىنا شالدىققان 353 ادام تىركەلىپتى. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس شىققانىمەن، كوروناۆيرۋس سالدارىنان اسقىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە سوزىندە تۇرعان جوق. ءالى كۇنگە دەيىن كوروناۆيرۋس پنەۆمونياسىنىڭ وڭىرلەردەگى ديناميكاسىن بىلە الماي كەلەمىز.

ەلدە كوروناۆيرۋس جۇققانى پتر-تەستىمەن راستالعاندار 106 مىڭنان اسىپ، اقوكپەگە اسقىنعاندارى 29 مىڭعا جۋىقتادى.

مينيسترلىك مالىمەتىنشە، وتكەن اپتادا (31 تامىز-6 قىركۇيەك) 46 ادام كوروناۆيرۋستان، 27 ادام كوروناۆيرۋستىق پنەۆمونيادان قايتىس بولعان. پاندەميا باستالعالى جالپى جيىنى ۆيرۋس جۇققانداردىڭ 2,5 مىڭنان ارتىق قازاقستاندىق (كۆي+ / U07.1 – 1656, كۆي- / U07.2 – 318, ىلەسپە اۋرۋلاردان – 556) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 556 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"