فوتو: ەرا

«ۇلكەن جەتىلىك» (G7) وكىلدەرى وپپوزيتسيونەر الەكسەي ناۆالنىيدىڭ ۋلانۋىنا بايلانىستى رەسەي بيلىگىنەن ءىستى تەرگەپ، كىنالىلەردى جازالاۋدى تالاپ ەتتى.

Reuters اگەنتتىگىندە جاريالانعان مالىمدەمەدە اقش دەپارتامەنتى: «ۇلكەن جەتىلىك مۇشەلەرى – كانادا، گەرمانيا، جاپونيا، يتاليا، فرانتسيا، جاپونيا، امەريكا وكىلدەرى مەن ەۋرووداق تاراپى رەسەيدىڭ وپپوزيتسيونەر ناۆالنىيدىڭ قاستاندىقپەن ۋلانۋىنا قاتىستى رەسمي جاۋاپ تالاپ ەتەمىز. ءبىزدىڭ تاراپ ناۆالنىيدىڭ حيميالىق قارۋدان ۋلانعانىنا تولىقتاي سەنەمىز. ال بۇل جاعداي – الەم ءۇشىن قاۋىپتى»، – دەلىنگەن.

20 تامىز تومسك قالاسىنان ماسكەۋگە بەت العان وپپوزيتسيونەر ساياساتكەر الەكسەي ناۆالنىي بورتتا جاعدايى ناشارلاپ، ۇشاق دەرەۋ ومبى قالاسىنا قونۋعا تۋرا كەلگەن. كەيىن جەدەل جاردەممەن وپپوزيتسيونەردى ومبىداعى اۋرۋحاناعا جەتكىزگەن. كەيىن گەرمانيا ناۆالنىيدى بەرليندەگى اۋرۋحاناعا اكەتۋ ءۇشىن ارنايى ساناۆياتسيا جىبەرگەن. باستاپقىدا ومبى دارىگەرلەرى ناۆالنىيدى ورنىنان قوزعاۋعا بولمايدى دەپ ونى گەرمانياعا جىبەرۋدەن باس تارتقان. كەيىن ومبىلىق دارىلەرلەر ناۆالنىيدى اۋرۋحانادان اكەتۋگە رۇقسات بەرىپ، ناۆالنىي 22 تامىزدا بەرلينگە جەتكىزىلدى.

وسى وقيعادان كەيىن كەشكىسىن ناۆالنىيدى قولداۋ ماقساتىندا ماسكەۋ، پەتەربۋرگ، نوۆوسيبيرسك، تومەنگى نوۆگورود قالالارىندا ونداعان ادام نارازىلىق وتكىزگەن. باق وكىلدەرى تاراتقان اقپارات بويىنشا، ولاردىڭ كوبىن پوليتسيا ۇستاپ اكەتكەن.

وتكەن اپتادا گەرمانيا ۇكىمەتى نەمىس اسكەري توكسيكولوگتارى الەكسەي ناۆالنىي «نوۆيچوك» جۇيكە-سال اۋرۋىن تۋدىرۋشى زاتتەگىدەن ۋلانعانىن حابارلادى. كەيىننەن گەرمانيا كانتسلەرى انگەلا مەركەل رەسەيدىڭ بۇل وقيعاعا بايلانىستى مالىمدەمە جاساۋىن تالاپ ەتتى.

نەگىزىنەن 2018 جىلى 4 ناۋرىزدا رەسەي فەدەراتسياسى بارلاۋ قىزمەتىنىڭ بۇرىنعى قىزمەتكەرى سەرگەي سكريپال مەن قىزى يۋليا سكريپال «نوۆيچوك» جۇيكە-سال اۋرۋىن تۋدىرۋشى زاتتەگى ارقىلى ۋلانعان بولاتىن. اسا قاۋىپتى حيميالىق قارۋدىڭ رەسەيدە جاسالىنعانى انىقتالىپ، اقش پەن ۇلىبريتانيا بۇل ىستە تىكەلەي رەسەيدى ايىپتادى. وسى جاعدايلاردى ەسەپكە العان شەتەلدىك باسىلىمدار «ءپۋتيننىڭ تولقۇجاتى – حيميالىق قارۋ «نوۆيچوك» دەپ جازعان.

"The qazaq Times"