گەرمانيادا ۆيرۋس جۇقتىرعاندار سانىنىڭ ارتۋىنا بايلانىستى، بەس ايماقتا شەكتەۋ شارالارى قايتادان كۇشەيتىلدى. بۇل تۋرالى EADaily حابارلادى.

رەسمي مالىمەتتەر بويىنشا، وتكەن تاۋلىكتە ەلدە ءبىر جارىم مىڭنان استام دەرتكە شالدىققان. مامانداردىڭ بولجاۋىنشا، ناۋقاستاردىڭ 40%-دان استامى ۆيرۋستى شەتەلدە جۇقتىرعان.

وسى ماسەلەگە بايلانىستى روبەرت كوح اتىنداعى ينستيتۋتتىڭ ءبولىم باسشىسى وساما حاماۋدا: «قازىر كوروناۆيرۋس جۇقتىرۋ دەرەكتەرى ارتىپ جاتقانىن كورىپ وتىرمىز. دەگەنمەن ەلدەگى احۋال اقپان نەمەسە ناۋرىز ايلارىنداعىداي ەمەس. قاۋىپتى ينفەكتسياعا شالدىققانداردىڭ باسىم بولىگى – 15 پەن 50 جاس ارالىعىنداعى ازاماتتار. ماسەلەن، روزەنحايم قالاسىندا ىندەت باستالعان كەزدەگىدەي 60-تان اسقان ازاماتتار مەن 5 جاس دەيىنگى بالالار اراسىندا ۆيرۋس جۇقتىرۋ دەرەكتەرى جوق. جالپى سىرقاتقا شالدىققانداردىڭ ايتۋىنشا، ولار قاتەرلى ۆيرۋستى ساياحات كەزىندە جۇقتىرعان»، – دەيدى.

گەرمانياداعى قاتاڭ شەكتەۋ شارالارىن ءبىرىنشى كەزەكتە باۆاريا ەنگىزەدى. ايماقتا ادام كوپ جينالاتىن جەرلەردە باقىلاۋ كۇشەيەدى. نەگىزىنەن مۇنداي شارا كوروناۆيرۋس جۇقتىرعانداردىڭ كۇرت ارتۋىمەن بايلانىستى.

وتكەن سەنبىنىڭ وزىندە ەلدە 2 مىڭنان استام دەرەك تىركەلگەن. بۇل ساۋىردەن بەرى بولماعان كورسەتكىش.تارتىپكە باعىنباعاندارعا سالىناتىن ايىپپۇل كولەمى دە جوعارى. بۇرىن باۆاريادا بەتپەردە كيمەگەندەر 150 ەۋرو ايىپپۇل تولەسە، ەندى ونىڭ مولشەرى 250 ەۋروعا ارتتى. ءتارتىپتى ەكىنشى رەت بۇزعاندارعا 500 ەۋرو ايىپپۇل سالىنادى. ءۇي جاعدايىنداعى كارانتيندى بۇزعان ناۋقاستار كوشەگە شىقسا، 2 مىڭ ەۋرو تولەيدى.

"The Qazaq Times"