كورنەكى سۋرەت-كوللاج. فوتو: "كراسنايا ۆەسنا" اا

قازاقستاندا پاندەميا كەزىندە قىزمەتى بارىسىندا ۆيرۋس جۇقتىرعان جانە  پنەۆمونياعا شالدىققان 899 مەديتسينا قىزمەتكەرىنە ماسق-دان 2 ملن تەڭگە كولەمىندە (ارقايسىنا – QT) وتەماقى تولەنگەن.

ەڭبەك جانە حالىقتى الەۋمەتتىك قورعاۋ مينيسترلىگىنىڭ الەۋمەتتىك جەلىدە جاريالاعان رەسمي مالىمەتىنە قاراعاندا، ۆيرۋستىڭ كەسىرىنەن ومىردەن وتكەن 3 دارىگەردىڭ وتباسىنا 10 ملن تەڭگەدەن بىرجولعى تولەم جاسالعان. بىراق بۇل وتكەن جۇمادان بەرى جاڭارماعان ەسكى دەرەك.

«جوعارىدا اتالعان تولەم تولەنەتىن مەديتسينا قىزمەتكەرلەرىن وڭىرلەردىڭ جانە رەسپۋبليكالىق ماڭىزى بار قالالاردىڭ دەنساۋلىق ساقتاۋ باسقارمالارى جانىنداعى ارنايى كوميسسيالار اۋىرعان مەديتسينا قىزمەتكەرلەرىن تەكسەرۋ ناتيجەلەرى نەگىزىندە انىقتايدى.وتىنىمدەردىڭ جيناقتاۋدى قر دەنساۋلىق ساقتاۋ مينيسترلىگى جۇزەگە اسىرادى، ودان كەيىن وتىنىمدەر ەلەكتروندىق ءىس ماكەتتەرىن قالىپتاستىرۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق-قا بەرىلەدى، كەيىن تولەم تاعايىنداۋ ءۇشىن ماسق-عا جىبەرىلەدى»، – دەلىنگەن رەسمي حابارلامادا.

تولەم العان مەديتسينا ماماندارىنىڭ 120-سى – ەلوردادان، 85-ءى – الماتى وبلىسىنان، 84-ءى – الماتىدان. سونداي-اق، اقمولا مەن بقو وڭىرلەرىنەن – 80 جانە 67 مەدقىزمەتكەرگە بىرجولعى وتەماقى بەرىلگەن.

3 تامىز كۇنى ورتكومدا وتكەن بريفينگتە دەنساۋلىق ساقتاۋ ۆيتسە-ءمينيسترى اجار عينيات كوروناۆيرۋس جۇقتىرعان مەديتسينا قىزمەتكەرلەرىنىڭ سانى 8 518-گە جەتكەنىن مالىمدەگەن.

قولدانىستاعى زاڭ بويىنشا وتەماقى جۇمىس بابىندا ۆيرۋس جۇقتىرعاندارعا عانا بەرىلەدى: كوروناۆيرۋس نە كوۆيدتىك پنەۆمونياعا شالدىقسا 2 ملن، ال وسى اۋرۋلاردىڭ كەسىرىنەن قايتىس بولسا 10 ملن تەڭگە.

دەگەنمەن دارىگەرلەر مەن ەل ازاماتتارىنىڭ ەڭ كوپ اۋىرعان شاعى «ماۋسىم-شىلدە قىرعىنىندا» دا، ودان بۇرىن كوكتەم كەزىندە دە كوپتەگەن كادرلاردىڭ دياگنوزى جاي پنەۆمونيا رەتىندە تىركەلگەن. قاڭتار-تامىز ارالىعىندا پنەۆمنيامەن اۋىرعان، بىلتىرعىدان 3,3 ەسەگە ارتىق 255 مىڭ ناۋقاستىڭ اراسىنداعى ەشبىر مەدقىزمەتكەرگە وتەماقى تولەنبەپ ەدى. وعان قوسا، قازاقستان بيلىگى ىندەت قارقىنى باسەڭدەگەن سوڭ 1 تامىزدان باستاپ قانا كوۆيدتىك پنەۆمونيانى رەسمي پاندەميا ەسەبىنە الا باستادى. مۇنىمەن كەلىسپەيتىن ماماندار مەن ساراپشىلار از ەمەس.

"The Qazaq Times"