بەلارۋس ساربازدارى «ءمىنسىز قىزمەتى ءۇشىن» ماراپاتتالدى

بەلارۋس ىشكى ىستەر مينيسترلىگىنىڭ وكىلدەرى پوليتسيا قىزمەتكەرلەرىن، ساربازداردى «ءمىنسىز قىزمەتى ءۇشىن» مەدالىمەن ماراپاتتادى. ەلدەگى نارازىلىقتاردى باسۋ ءۇشىن كۇش قولدانعان ساربازداردىڭ بيلىك تاراپىنان ماراپاتتالۋى قاتاڭ سىنعا ىلىكتى.

كەيىننەن ءىىم ءباسپاسوز حاتشىسى ولگا چەمودانوۆا بۇل جونىندە رەسمي مالىمدەمە جاساپ، مينيسترلىكتىڭ ماراپاتى جونىندە تۇسىنىكتەمە بەردى. چەمودانوۆانىڭ ايتۋىنشا، قىزمەتكەرلەردى ماراپاتتاۋ ءۇشىن ماتەريالدار بەلگىلەنگەن تارتىپپەن مينيسترلەر كەڭەسىنە ناۋرىزدا جىبەرىلگەن. ياعني ۆەدومستوۆادا ايتىلعانداي، «ءمىنسىز قىزمەتى ءۇشىن» مەدالىمەن تيىسىنشە 10, 15 جانە 20 جىل ءمىنسىز قىزمەت اتقارعان ىشكى ىستەر ورگاندارىنىڭ باسشىلارى جانە قاتارداعى ساربازدار، اسكەري قىزمەتشىلەر ماراپاتتالادى.

بەلارۋس ءىىم حابارلاماسىندا: «كەيبىر Telegram-ارنالار مەن ينتەرنەت-سايتتار ىشكى ىستەر ورگاندارىنىڭ قىزمەتكەرلەرىن I, II جانە III دارەجەلى «ءمىنسىز قىزمەتى ءۇشىن» مەدالىمەن (№305 جارلىق) ماراپاتتاۋ تۋرالى اقپاراتتى بۇرمالاۋعا تىرىستى. بۇل شەشىم ناۋرىزدا شىعارىلعان. ولاردىڭ ارقايسىسىنا ماراپاتتاۋ پاراعى راسىمدەلىپ، مەملەكەت پەن حالىق الدىندا قۇقىق قورعاۋ سالاسىنا سىڭىرگەن ەڭبەگى، ەلدەگى قۇقىقتىق ءتارتىپتى نىعايتۋعا، سونداي-اق ىشكى ىستەر ورگاندارىنىڭ بارلىق قىزمەت كەزەڭىندەگى دامۋىنا قوسقان جەكە ۇلەسى باعالاندى»، – دەلىنگەن.

9 تامىزدا بەلارۋستە پرەزيدەنتتىك سايلاۋ ءوتىپ، ناتيجەسىندە ورتالىق سايلاۋ كوميسسياسى شيرەك عاسىر بيلىك ەتكەن الەكساندر لۋكاشەنكونىڭ جەڭىسىن جاريالادى. وپپوزيتسيا پرەزيدەنت سايلاۋىنىڭ رەسمي قورىتىندىسىن مويىنداۋدان باس تارتىپ، ەلدە ساياسي داعدارىس ۋشىعا ءتۇستى. ازاماتتىق بەلسەندىلەر سايلاۋ قورىتىندىسى بۇرمالاندى دەپ سانايدى. لۋكاشەنكونىڭ وتستاۆكاسىن تالاپ ەتكەن نارازىلىق شارالارى ەلدىڭ ءتۇرلى قالالارىندا جالعاسىپ جاتىر.

"The Qazaq Times"