پرەزيدەنت توقاەۆ ۆلاديمير ءپۋتيندى COVID-19 ۆيرۋسىنا قارسى العاشقى ۆاكتسينانىڭ تىركەلۋىمەن قۇتتىقتاپ، جەدەلحات جولدادى. رەسەيلىك ۆاكتسينانى ساتىپ الۋ ماسەلەسىن تالقىلاۋ ماقساتىندا تامىزدا قازاقستان دەلەگاتسياسى ماسكەۋگە جونەلتىلمەك.
11 تامىزدا ۆلاديمير پۋتين رەسەيدىڭ الەمدە ءبىرىنشى بولىپ كوروناۆيرۋس ينفەكتسياسىنا قارسى ۆاكتسينانى تىركەگەنىن حابارلاعان ەدى. پۋتين سوزىندە ەكپەنىڭ وتە ءتيىمدى جۇمىس ىستەيتىنىن، تۇراقتى يممۋندىق جۇيەنى قالىپتاستىراتىنىن جانە بارلىق قاجەتتى تەكسەرۋلەردەن وتكەنىن اتاپ ءوتتى. بىراق كەيبىر باتىس ساراپشىلارى مەن جەرگىلىكتى ماماندار سىناقتان تولىق وتپەگەن ۆاكتسينانىڭ قاۋىپسىزدىگىنە كۇمان كەلتىرگەن بولاتىن.
رەسەيدە تولىق سىناقتان وتپەسە دە تىركەۋدەن وتكەن ۆاكتسينا قىركۇيەك ايىندا مەديتسينا قىزمەتكەرلەرىنە ەگىلە باستايدى. ال كوپشىلىككە قولدانۋعا 2021 جىلى قاڭتاردا بەرىلەدى.
ەل پرەزيدەنتى توقاەۆ جەدەلحاتىندا: «بۇل وقيعا رەسەيلىك عىلىمنىڭ جوعارى الەۋەتى مەن بەدەلىن، سونداي-اق جاھاندىق قاۋىپ-قاتەرگە قارسى كۇرەستە رەسەيدىڭ جەتەكشى ءرولىن راستايدى. ءبىز بۇكىل الەم ءۇشىن قيىن-قىستاۋ كەزەڭدە قازاقستاننىڭ، ونىڭ ىشىندە گۋمانيتارلىق كومەك پەن ەلەۋلى ۇلەس قوسقان دارىگەرلەردىڭ باعىت-باعدارى ءۇشىن، ەلىمىزدەگى سانيتارلىق-ەپيدەميولوگيالىق جاعدايدى جاقسارتۋعا كومەكتەسكەنى ءۇشىن العىس بىلدىرەمىز»، – دەپ جازدى.
سونىمەن قاتار توقاەۆ قازاقستاندىق دەلەگاتسيا وسى ايدا رەسەيگە ۆاكتسينا ساتىپ الۋ مۇمكىندىگىن قاراستىرۋ ءۇشىن باراتىنىن ايتتى.
«تامىزدىڭ ەكىنشى جارتىسىندا ۇكىمەتتىك دەلەگاتسيا ماسكەۋگە رەسەي ۆاكتسينالارىن ساتىپ الۋ ماسەلەسىن تالقىلاۋعا بارادى»، – دەدى مەملەكەت باسشىسى.
قازاقستان دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ «كوروناۆيرۋسقا قارسى ۆاكتسينالار تولىق سىناقتان وتپەيىنشە ولاردى ساتىپ المايمىز» – دەپ مالىمدەگەن. ونىڭ ايتۋىنشا، قازاقستان ۆاكتسينا جانە يممۋنيزاتسيا جونىندەگى عالامدىق اليانسقا قوسىلسا، بۇل ۇيىمعا مۇشە مەملەكەتتەر 2020 جىلدىڭ 31 تامىزىنا دەيىن العاشقى جارناسىن (15%) تولەۋگە مىندەتتى.
بۇدان سوڭ ۆاكتسينانىڭ جەتۋىنە قاراي حالىقتىڭ 20 پايىزىنا جەتەتىندەي ۆاكتسينا قۇنىن تولىق تولەۋى ءتيىس بولادى. قازاقستان اليانسقا قوسىلۋعا كەلىسىم بەرگەنمەن ازىرگە ۇيىممەن كەلىسىم-شارتقا قول قويىلماعان.
قازىر الەمدە COVID-19 كوروناۆيرۋسىن 20 ميلليوننان استام ادامعا جۇقتىرعان. قايتىس بولعاندار سانى 740 مىڭعا جۋىقتادى. 12,5 ميلليون ادام جازىلىپ شىقتى. رەسمي ستاتيستيكا بويىنشا، قازاقستاندا 10 855 ادامنان ۆيرۋس دەرەگى انىقتالعان.
بۇعان دەيىن «سامارقاۋ ستاتيستيكا» ۇسىنىپ كەلگەن قازاقستان بيلىگى 17 شىلدە كۇنى 1 تامىزدان باستاپ كوروناۆيرۋس پەن اۋرۋ بەلگىلەرى بويىنشا سوعان ۇقسايتىن پنەۆمونيا دەرەگىن بىرىكتىرىپ جاريالاۋعا ۋادە بەرگەن. بىراق كوروناۆيرۋس ستاتيستيكاسىنا تامىزعا دەيىن تىركەلگەن 256 مىڭ پنەۆمونيا جاعدايىنىڭ ءبىر دە ءبىرى كىرمەگەن. 2 تامىزدان باستاپ جاريالانعان پنەۆمونيا دەرەگى كوروناۆيرۋس ستاتيستيكاسىنان بولەك جاريالانىپ كەلەدى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
رىسبەك سارسەنبايۇلى: اەس – جارىلىپ كەتۋگە شاق تۇرعان بومبانى قۇشاقتاپ وتىرعانمەن بىردەي
قاراعايعا قارسى بۇتاق. دۋماننىڭ سوت تەرگەۋى اياقتالدى. 29 شىلدە ءجارىسسوز.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
جاۋاعاشتى تۇرمەسى ايگەرىمدى تاعايىندالعان ەمگە جىبەرمەي جاتىر