Qazaqstan men Resey prezidentteri. Foto: aşıq derekköz

Prezident Toqaev Vladimir Putindi COVID-19 virusına qarsı alğaşqı vakcinanıñ tirkeluimen qwttıqtap, jedelhat joldadı. Reseylik vakcinanı satıp alu mäselesin talqılau maqsatında tamızda Qazaqstan delegaciyası Mäskeuge jöneltilmek.

11 tamızda Vladimir Putin Reseydiñ älemde birinşi bolıp koronavirus infekciyasına qarsı vakcinanı tirkegenin habarlağan edi. Putin sözinde ekpeniñ öte tiimdi jwmıs isteytinin, twraqtı immundıq jüyeni qalıptastıratının jäne barlıq qajetti tekserulerden ötkenin atap ötti. Biraq keybir batıs sarapşıları men jergilikti mamandar sınaqtan tolıq ötpegen vakcinanıñ qauipsizdigine kümän keltirgen bolatın.

Reseyde tolıq sınaqtan ötpese de tirkeuden ötken vakcina qırküyek ayında medicina qızmetkerlerine egile bastaydı. Al köpşilikke qoldanuğa 2021 jılı qañtarda beriledi.

El prezidenti Toqaev jedelhatında: «Bwl oqiğa reseylik ğılımnıñ joğarı äleueti men bedelin, sonday-aq jahandıq qauip-qaterge qarsı küreste Reseydiñ jetekşi rölin rastaydı. Biz bükil älem üşin qiın-qıstau kezeñde Qazaqstannıñ, onıñ işinde gumanitarlıq kömek pen eleuli üles qosqan därigerlerdiñ bağıt-bağdarı üşin, elimizdegi sanitarlıq-epidemiologiyalıq jağdaydı jaqsartuğa kömekteskeni üşin alğıs bildiremiz», – dep jazdı.

Sonımen qatar Toqaev qazaqstandıq delegaciya osı ayda Reseyge vakcina satıp alu mümkindigin qarastıru üşin baratının ayttı.

«Tamızdıñ ekinşi jartısında ükimettik delegaciya Mäskeuge Resey vakcinaların satıp alu mäselesin talqılauğa baradı», – dedi memleket basşısı.

Qazaqstan Densaulıq saqtau ministrliginiñ resmi ökili Bağdat Qojahmetov «koronavirusqa qarsı vakcinalar tolıq sınaqtan ötpeyinşe olardı satıp almaymız» – dep mälimdegen. Onıñ aytuınşa, Qazaqstan vakcina jäne immunizaciya jönindegi ğalamdıq al'yansqa qosılsa, bwl wyımğa müşe memleketter 2020 jıldıñ 31 tamızına deyin alğaşqı jarnasın (15%) töleuge mindetti.

Bwdan soñ vakcinanıñ jetuine qaray halıqtıñ 20 payızına jetetindey vakcina qwnın tolıq töleui tiis boladı. Qazaqstan al'yansqa qosıluğa kelisim bergenmen äzirge wyımmen kelisim-şartqa qol qoyılmağan.

Qazir älemde COVID-19 koronavirusın 20 millionnan astam adamğa jwqtırğan. Qaytıs bolğandar sanı 740 mıñğa juıqtadı. 12,5 million adam jazılıp şıqtı. Resmi statistika boyınşa, Qazaqstanda 10 855 adamnan virus deregi anıqtalğan.

Bwğan deyin «samarqau statistika» wsınıp kelgen Qazaqstan biligi 17 şilde küni 1 tamızdan bastap koronavirus pen auru belgileri boyınşa soğan wqsaytın pnevmoniya deregin biriktirip jariyalauğa uäde bergen. Biraq koronavirus statistikasına tamızğa deyin tirkelgen 256 mıñ pnevmoniya jağdayınıñ bir de biri kirmegen. 2 tamızdan bastap jariyalanğan pnevmoniya deregi koronavirus statistikasınan bölek jariyalanıp keledi.

"The Qazaq Times"