ليۆان پرەزيدەنتى ميشەل اۋن. فوتو: Duma.gov

پرەزيدەنت قاسىم-جومارت توقاەۆ بەيرۋتتەگى جارىلىس كەزىندە قازا بولعانداردىڭ وتباسىلارىنا كوڭىل ايتىپ، زارداپ شەككەندەردىڭ ساۋىعىپ كەتۋىنە تىلەكتەستىك ءبىلدىردى.

پرەزيدەنت ءوزىنىڭ ەwitter پاراقشاسىندا: «بۇگىن ليۆان پرەزيدەنتى ميشەل اۋنمەن تەلەفون ارقىلى سويلەسىپ، بەيرۋت پورتىنداعى جارىلىس كەزىندە قازا بولعان ادامداردىڭ وتباسىنا كوڭىل ايتىپ، زارداپ شەككەندەردىڭ ساۋىعىپ كەتۋىنە تىلەكتەستىك ءبىلدىردىم. قر ازاماتتارىنىڭ (200-گە جۋىق), ونىڭ ىشىندە قازاق ديپلوماتتارىنىڭ جانە بۇۇ-نىڭ بىتىمگەرشىلىك كۇشتەرى قۇرامىندا قىزمەت اتقارىپ جۇرگەن اسكەري قىزمەتشىلەردىڭ قاۋىپسىزدىگىن قامتاماسىز ەتۋ جونىندە شارالار قابىلداۋ تۋرالى ءوتىنىش ءبىلدىردىم. ليۆان پرەزيدەنتى وسىنداي قيىن-قىستاۋ كەزەڭدە قولداۋ بىلدىرگەنىمىز ءۇشىن العىس ايتىپ، قازاقستان ازاماتتارىنىڭ قاۋىپسىزدىگىن قامتاماسىز ەتۋگە ۋادە بەردى»، – دەپ جازدى.

4 تامىز كەشكە بەيرۋتتەگى تەڭىز پورتىنىڭ بازاسىندا بىرنەشە قاتتى جارىلىس بولدى. سالدارىنان 100-دەن استام ادام قازا تاۋىپ، 4 مىڭنان استام ادام زارداپ شەككەن. جارىلىستىڭ جويقان بولعانى سونشالىق، جاقىن ماڭدا ورنالاسقان ۇيلەردە، سونداي-اق جارىلىس ەپيتسەنترىنەن بىرنەشە شاقىرىم جەردە ورنالاسقان عيماراتتاردا تەرەزەلەرى سىنعان. جەلىدە جارىلىستىڭ ۆيدەوسى تاراعان بولاتىن.

جويقىن جارىلىستان ليۆانداعى قر ديپلوماتيالىق ميسسياسىنىڭ عيماراتىنا زيان كەلگەن. وسى وقيعاعا قاتىستى قر سىرتقى ىستەر ءمينيسترى مۇحتار تىلەۋبەردى تۇسىنىكتەمە بەردى.

ليۆان تەلەارناسى مالىمەتىندە، جوعارى لاۋازىمدى تۇلعالار پورتتا ساقتالعان جارىلعىش ناتري نيتراتى جارىلىسقا سەبەپ بولۋى مۇمكىن دەگەن بولجام ايتىلدى. ادامدار جارىلىس بولعان جەردە سارعىش ءتۇتىن كورگەندەرىن ايتتى. كەيىننەن بەلگىلى بولعانداي، دۇرىس ساقتالماعان اممياك سەليتراسى بەيرۋتتەگى جارىلىسقا سەبەپ بولعان.

ەل پرەمەر-ءمينيسترى حاسان دياب 5 تامىزدى ۇلتتىق ازا كۇنى دەپ جاريالادى.

"The Qazaq Times"