تاجىكستاندا ويىن-ساۋىق ورتالىقتارى جابىلىپ جاتىر

تءاجىكستان ىشكى ىستەر مينيسترلىگىنىڭ حابارلاۋىنشا، پوليتسيا رەيدىنەن سوڭ دۋشانبە قالاسىنداعى 72 ويىن-ساۋىق ورتالىعى جابىلدى. بۇل مەكەمەلەردە كءامەلەت جاسقا تولماعان بالالار كءوپ بولعان.

تاجىكستان ءىىم ءباسپاسوز حاتشىسى ۋماردجوني ەموماليدىڭ حابارلاۋىنشا، ويىن-ساۋىق ورتالىقتارى مەن بۋكمەكەرلىك كەڭسەلەردىڭ قوجايىندارى جاسوسپىرىمدەردى بۇل مەكەمەلەرگە كىرگىزبەۋ تۋرالى جارلىقتى بۇزعان.

بۇعان دەيىن مينيسترلىك ويىن-ساۋىق ورتالىقتارى مەن بۋكمەكەرلىك كەڭسەلەرگە كەشكە جاستاردى كىرگىزبەۋ كەرەكتىگى تۋرالى ەسكەرتۋ تاراتقان ەدى.

ۋماردجون ەموماليدىڭ ايتۋىنشا، سوڭعى ءۇش ايدا استاناداعى ويىن-ساۋىق ورتالىقتارى مەن بۋكمەكەرلىك كەڭسەلەردە 3,5 مىڭعا جۋىق بالا مەن ءجاسوسپىرىم ۇستالعان. ولاردىڭ اتا-انالارىنا ايىپپۇل سالىندى.

كەيبىر بۋكمەكەرلىك كەڭسەلەر مەن كومپيۋتەرلىك ويىن زالدارىنىڭ قوجايىندارى وسىنداي شەكتەۋلەردەن سوڭ ازىق-تۇلىك دۇكەندەرىن اشۋعا ءماجبۇر بولعاندارىن ايتتى.

“The Qazaq Times”