امەريكا شتاتتارىنا فەدەرالدىق كۇش قويىلادى

اقش پرەزيدەنتى دونالد ترامپ ناسىلشىلدىككە قارسى شەرۋلەردەن كەيىن قىلمىس كوبەيگەن قالالارعا قوسىمشا فەدەرالدىق كۇشتەر قويۋ تۋرالى شەشىم شىعاردى.

ميننەاپوليستەگى وقيعادان سوڭ كەي شاھارلاردا قارۋ قولدانۋ مەن زورلىق-زومبىلىق كوبەيگەن. ترامپ باسىلىمدارعا بەرگەن سۇحباتىندا: «مەن بۇگىن قىلمىس كوبەيگەن قالالارعا قوسىمشا فەدەرالدىق قۇقىق قورعاۋ كۇشتەرىن جۇمىلدىرۋ تۋرالى شەشىم قابىلدادىم. ءبىز قوعامدىق قاۋىپسىزدىكتى قالپىنا كەلتىرىپ، قىلمىستىق توپتاردىڭ ارەكەتتەرىنە توسقاۋىل قويۋىمىز كەرەك. ەلدە زورلىق-زومبىلىق كوبەيۋىنە بايلانىستى وسىنداي شارا قابىلداۋدان باسقا امال قالعان جوق»، – دەپ مالىمدەدى.

فەدەرالدىق كۇش ءبىرىنشى كەزەكتە چيكاگوعا جىبەرىلەدى. سەبەبى قالادا سوڭعى اپتالاردا قارۋلى قاقتىعىستاردان كوز جۇمعانداردىڭ سانى ارتقان. وتكەن سەيسەنبىدە ءبىر افروامەريكالىقتى جەرلەۋ بارىسىندا اتىس بولىپ، 14 ادام جاراقات العان. ال ورەگون شتاتىنىڭ استاناسى پورتلەند قالاسىندا ناسىلشىلدىككە قارسى شەرۋلەر ءالى باسىلار ەمەس. نارازىلىق اكتسيالارى بارىسىندا دۇكەندەردى قيراتۋ مەن توناۋلار توقتاعان جوق.

25 مامىردا ميننەاپوليس قالاسىندا 46 جاستاعى دجوردج فلويد پوليتسەي وكىلدەرىنىڭ كوز الدىندا جان تاپسىرعان. دۇكەن كاسسيرى مارقۇم جالعان بانكنوتپەن ەسەپ ايىرىسپاق بولدى دەگەن ۋاجبەن پوليتسيا شاقىرادى. ارتىنشا وقيعا ورنىنا كەلگەن ءتارتىپ ساقشىلارى كۇدىكتىنىڭ قولىنا كىسەن سالعاننان كەيىن وفيتسەرلەردىڭ ءبىرى ونىڭ جەلكەسىن اياعىمەن 7 مينۋتتاي باسىپ تۇرعان. داۋىسى قارلىققان افروامەريكالىق ءوزىنىڭ دەم الا الماي جاتقانىن ايتادى، بىراق وعان پوليتسەيلەر قۇلاق اسپاعان. وسىدان كەيىن «مەن تۇنشىعىپ قالدىم!» تىركەسى شەرۋدىڭ باستى ۇرانىنا اينالعان.

"The Qazaq Times"