13 شىلدە – قازاقستاندا كوروناۆيرۋستان قايتىس بولعانداردى ۇلتتىق ازا تۇتۋ كۇنى. ەلدە مەملەكەتتىك تۋلار تومەن ءتۇسىرىلىپ، ويىن-ساۋىق شارالارى توقتاتىلدى، تەلەراديو حابارلارىن تاراتۋ جەلىسى وزگەرتىلدى. 

ساعات 12.00-دە دەرتتەن كوز جۇمعانداردى ەسكە الۋ ءۇشىن ءبىر مينۋت ۇنسىزدىك جاريالاندى. مەشىتتەر مەن شىركەۋلەردە قۇرباندار رۋحىنا باعىشتالىپ، ءدىني جورالعىلار جاسالدى. مەملەكەتتىك تەلەارناداردان ۇندەۋ جاساعان پرەزيدەنت توقاەۆ: «مىناۋ الاپات ىندەت ارامىزدان تالاي اسىلدارىمىزدى جۇلىپ اكەتۋدە. بۇگىندە قارا جامىلىپ وتىرعان ازاماتتاردىڭ قايعىسىنا ورتاقتاسىپ، كوڭىل ايتامىن»، – دەدى.

بيلىكتىڭ 13 شىلدەنى قارالى كۇن دەپ جاريالاۋىن كەي ساراپشىلار «كوزبوياۋشىلىق، يتكە سۇيەك لاقتىرعانداي حالىقتى الداۋسىراتۋ» دەيدى. سەبەبى حالىق احۋالى ناشارلاپ، دەرت ىندەگەن تۇستا، 6 شىلدە – بۇرىنعى پرەزيدەنتتىڭ تۋعان كۇنى مەن استانا كۇنىنە وراي ەلوردادا وتشاشۋ اتىلىپ، مەرەكەلىك كونتسەرتتەر وتكەن. وسى ورايدا ازاماتتىق بەلسەندىلەر ازا تۇتۋ كۇنى رەتىندە 6 شىلدەنى ۇسىنعان.

قازاقستاندا پاندەميا باستالعالى بەرى 60 مىڭعا جۋىق ادام COVID-19 ىندەتىن جۇقتىردى، 34 مىڭنان استام ادام ساۋىعىپ شىقتى. 375 ناۋقاس قايتىس بولدى. ەلىمىزدە COVID-19 ىندەتىنەن العاشقى ادام – اقمولا وبلىسى قوسشى اۋىلىنىڭ تۇرعىنى،64 جاستاعى ايەل 26 ناۋرىزدا كوز جۇمدى.

كوروناۆيرۋسپەن قاتار ەلدە پنەۆمونيا ءورشىپ تۇر. 2020 جىلدىڭ العاشقى التى ايىندا 98 546 ادام پنەۆمونياعا شالدىققان. وسى جىلى ماۋسىمدا قازاقستاندا 628 ادام پنەۆمونيادان كوز جۇمعان.

تاۋەلسىزدىك جىلدارىندا قازاقستاندا توعىز رەت ۇلتتىق ازا تۇتۋ كۇنى جاريالانعان. ال توقاەۆ پرەزيدەنت بولعالى ەكىنشى رەت ۇلتتىق ازا تۇتۋ كۇنىن جاريالاپ وتىر. بۇعان دەيىن مەملەكەت باسشىسى قازاقستاندىقتاردى الماتى ماڭىنداعى ۇشاق اپاتىنان قازا بولعانداردى ەسكە الۋعا شاقىرعان.

"The Qazaq Times"