بەلگيا ۇكىمەتى ەلدە كارانتين تالاپتارىن كۇشەيتتى. بۇرىن ماسكالاردى تەك قوعامدىق كولىكتەردە كيۋ قاجەت بولسا، ەندى ولاردى عيماراتتاردىڭ ىشىندە دە كيۋ تالاپ ەتىلەدى.

بەلگيانىڭ دەنساۋلىق ساقتاۋ ءمينيسترى مەگگي دە بلوك: «ءبىز ەكىنشى تولقىنعا دايىن بولۋ ءۇشىن بارلىق شارانى قابىلدادىق. ەندى دەمالىستان ورالعان ازاماتتار ۆيرۋستىڭ تارالۋىنا تۇرتكى بولۋى مۇمكىن. ىندەتتىڭ قايتا ورشۋىنە جول بەرمەس ءۇشىن الدىن الۋىمىز شارت. ءبىز اۋرۋلاردى باقىلاۋ جانە الدىن الۋ بويىنشا ەۋروپا ورتالىعىنىڭ ۇسىنىستارىن ورىندادىق. ياعني راستالعان عانا ەمەس، سونىمەن بىرگە بارلىق كۇدىكتى جاعدايلار تۋرالى دا حابارلاندى. قارتتار ۇيىندەگى كوپتەگەن ناۋقاس جاسى كەلگەندىكتەن كوز جۇمدى ما، جۇرەگى، وكپەسى اۋىردى ما، الدە COVID-19 بولدى ما؟ ول جاعى بەلگىسىز. كوروناۆيرۋستان قايتىس بولۋى دا مۇمكىن. سەبەبى ولاردىڭ دەنى تىنىس الۋ جولدارىنا شاعىمدانعان»، – دەيدى.

بەلگيادا سوڭعى بىرنەشە تاۋلىكتە تەك 85 ادامنان ىندەت انىقتالعان. ەلدە كوروناۆيرۋستىڭ تارالۋىنا شەكتەۋ قويىلعاندىعىنا قاراماستان، بيلىك الاڭداۋلى. جەرگىلىكتى حالىق جازعى دەمالىستان ورالعان ساتتە دەرت قايتا دەندەيدى مە دەپ قاۋىپتەنىپ وتىر.

"The Qazaq Times"