جۋىردا بريۋسسەلدە ەۋرووداق ەلدەرى 1 شىلدەدەن باستاپ ەۋروپاعا قاي مەملەكەتتەردىڭ ازاماتتارى قاتىناي الاتىندىعى جايىندا ءتىزىم جاسادى. بۇعان دەيىن ەۋروپا ءوز شەكاراسىن اشۋى مۇمكىن دەگەن مەملەكەتتەر قاتارىندا قازاقستان دا بار ەدى.

25 ماۋسىم كۇنى ەۋروپا بايلانىسىن ۇزبەيتىن مەملەكەتتەردىڭ تىزىمىندە 54 ەل بار بولاتىن. بىراق، 30 شىلدە كۇنگى تىزىمدە ولاردىڭ سانى 15-كە بىراق ءتۇستى. قازىر ەۋروپادا كوروناۆيرۋس پاندەمياسىنا بايلانىستى مەملەكەتارالىق قاتىناۋلار ءۇشىن ەكى ءتىزىم جاسالعان. ولاردىڭ بىرىنشىسىندە ەو ايماعىنا قاي ەلدىڭ ازاماتتارى كىرە الاتىندىعى، ەكىنشىسىندە قاي ەلدىڭ ازاماتتارى كىرە المايتىندىعى كورسەتىلگەن.

ەۋروپالىق دەرەككوزدەردىڭ مالىمەتىنە سايكەس جاڭا ءتىزىمنىڭ جوباسى ەو مەملەكەتتەرىنىڭ قاتىسۋىمەن 26 ماۋسىمدا قابىلدانعان. جوبا بويىنشا ەۋروپا ءوز شەكاراسىن 15 مەملەكەتكە اشادى. ولار: الجير، اۆستراليا، كانادا، گرۋزيا، جاپونيا، چەرنوگوريا، ماروككو، جاڭا زەلانديا، رۋاندا، سەربيا، وڭتۇستىك كورەيا، تايلاند، تۋنيس، ۋرۋگۆاي جانە قىتاي. ءتىزىمدى جاساۋ بارىسىندا ءۇش كريتەريگە نازار اۋدارىلعان. بىرىنشىدەن، ازاماتتارى ەۋروپاعا قاتىناي الۋى ءۇشىن مەملەكەتتەگى ەپيدەميولوگيالىق احۋال ەۋرووداقتاعى ورتاشا كورسەتكىشتەن جاقسى بولۋى لازىم. بۇل جەردە ەلدەگى ينفەكتسيا جۇقتىرعانداردىڭ 100 000 ادامعا شاققانداعى كوەففيتسەنتى مەن مەملەكەتتىڭ ۆيرۋسپەن كۇرەستەگى دايىندىعى ەسكەرىلەدى. تىزىمگە تەك وسى اسپەكتىلەر جايىندا شىنايى اقپارات بەرگەن مەملەكەت قانا ىلىنەدى.

ەكىنشىدەن، ساپار كەزىندەگى ينفەكتسيا جۇقتىرۋعا قارسى قولدانىلاتىن شارالار نەگىزگە الىنادى. مۇنىڭ قاتارىندا اەروپورت پەن ۆوكزالدارداعى الەۋمەتتىك ارا-قاشىقتىقتىڭ ساقتالۋى  دا بار. سونىمەن قاتار، مەملەكەتتىڭ ەۋروكوميسسيانىڭ تالاپتارىنا ساي كەلمەيتىن ەلدەر تاراپىنان قانشالىقتى ترانزيتتىك پۋنكت رەتىندە قولدانىلاتىندىعى دا ەسكەرىلەدى.

ۇشىنشىدەن، ەۋروپا شەكاراسىن كەسىپ ءوتۋ تەك وسى ايماقتىڭ تۇرعىندارىنا ءوز شەكاراسىن اشقان مەملەكەتتەردىڭ ازاماتتارى ءۇشىن عانا مۇمكىن بولادى.

سوڭعى ءتىزىم بويىنشا قازاقستان ەۋروكوميسسيانىڭ تالاپتارىنا ساي كەلمەيتىن مەملەكەت رەتىندە تانىلىپ وتىر. 1 اي بۇرىن قازاقستان ءۇشىن ەسىگىن جاپپاعان ەۋروپا ەلدەگى ۆيرۋس جۇقتىرعاندار سانى 40 مىڭعا تاياعان شاقتا قازاقستان ازاماتتارىنىڭ ەو ەلدەرىنە قاتىناۋىنا تىيىم سالدى. قازاقستاننىڭ ءوز ىشىندە دە كوپتەگەن ازاماتتار بيلىك ينفەكتسيانىڭ تارالۋىن باقىلاۋدان شىعارىپ الدى دەگەن پىكىردە. بۇعان دەيىن ددسۇ دا قازاقستاندى ەپيدەميولوگيالىق احۋالى تۇراقتى مەملەكەتتەردىڭ قاتارىنان شىعارىپ تاستاعان بولاتىن.

"The Qazaq Times"